ينتەرنەتتى جاۋلاپ العان جامبىلدىق «ديكتور» ءوز دارىنى جايلى ايتىپ بەردى

Tengrinews.kz تىلشىسىنە بەرگەن سۇحباتىندا ول ءوز دارىنى جايىندا جانە ويدا جوقتا كەلگەن تانىمالدىعى تۋرالى ايتىپ بەردى.

ول تۋرالى ۆيدەو تاياۋدا الەۋمەتتىك جەلىلەردە تارالعان ەدى. اۋىل جىگىتى تەلەارنا تىلشىلەرى سەكىلدى ەلدەگى جاعدايدى ءوز مانەرىندە ايتىپ بەرەدى. جەلى قولدانۋشىلارى ونىڭ دارىندى ەكەنىن ايتادى. ولاردىڭ پىكىرىنشە، «ديكتوردى» تەز ارادا رەسپۋبليكالىق تەلەارنالاردىڭ بىرىنە قىزمەتكە الۋ كەرەك. ال تاعى بىرەۋلەرى ونىڭ م س سايلاۋبەك سەكىلدى اتاقتى بولىپ كەتەتىنىن ايتىپ وتىر.

جاسۇلان كەنجەبايدىڭ ايتۋىنشا، ول جامبىل وبلىسىنىڭ قاراقات اۋىلىندا دۇنيەگە كەلگەن. 32 جاستاعى ەر ادام بالا كەزىندە جۋرناليست بولۋدى ارمانداپتى، الايدا قازىرگى ۋاقىتتا ءتىپتى دە باسقا سالادا جۇمىس ىستەيدى. «دارىنىمدى ءۇشىنشى سىنىپتا وقىپ جۇرگەنىمدە قاتىسقان «جىگىت سۇلتانى» بايقاۋىندا جەڭىمپاز بولعانىمدا بايقادىم. كەيىن جوعارعى سىنىپتاردا ءتۇرلى كونكۋرستاردا جەڭىپ، ۇزدىك وقىدىم. وسىدان كەيىن مال دارىگەرلىگى كوللەدجىنە ءتۇسىپ، ونى قىزىل ديپلوممەن ءبىتىردىم جانە 2004-2006 -جىلدارى ق ر ۇ ق ك شەكارا قىزمەتىندە بورىشىمدى وتەدىم»، - دەيدى جاسۇلان. قازىر ول كۇزەتشى بولىپ جۇمىس ىستەيدى. ۇيلەنگەن، ەكى بالانىڭ اكەسى.

ول كامەرا الدىندا ءبىرىنشى رەت وتكەن جىلدىڭ جازىندا ونەر كورسەتە باستاپتى. «دوسىم قوناققا كەلىپ، تەلەفون كامەراسىنا قاراپ تۇرىپ، سويلەۋىمدى سۇرادى. ادەتتە ماتىندەردى تەز جاتتاپ الامىن، كولەمدى بولسا دا. ونى ءبىر-ەكى رەت وقىپ السام جەتەدى، ارى قاراي جالعاستىرا بەرەمىن. ءماتىن اراسىندا تولە ءبيدىڭ، قازىبەك ءبيدىڭ، ايتەكە ءبيدىڭ قاناتتى سوزدەرىن قوسامىن. نەگىزىندە كوبى توسىننان شىعادى»، - دەيدى ول.

كەنجەباي وتاندىق جۋرناليست نارتاي ارالباي ۇلىن ۇلگى تۇتاتىنىن ايتادى. «ونىڭ سويلەۋ مانەرى، داۋىسى قالىپتاسقان. مەن دە سول باعىتتا دارىنىمدى كورسەتكىم كەلەدى. ءبىراق اۋىل جىگىتتەرى كوپ جاعدايدا نازاردان تىس قالىپ، دارىنىمىز اشىلماعان كۇيى قالىپ قويىپ جاتامىز»، - دەدى جاسۇلان.