ميلليارد قىتايدى مويىنداتقان قازاقشا مۋلتفيلمنىڭ اۆتورى كىم؟
سول قوماقتى جەڭىسكە قول جەتكىزگەن دارىندى جاس - التاي قالاسىنىڭ تۇرعىنى، قانداس باۋىرىمىز ارىسبەك نۇقان ۇلى بولاتىن.
ارىسبەك 1987-جىلى ومىرگە كەلگەن. كىشكەنتايىنان سۋرەت سىزۋعا اۋەس بالانى اكە-شەشەسى دە بەتىنەن قاقپاي، قاناتتاندىرىپ وتىرىپتى. ورتالاۋ مەكتەپكە كىرە سالا ءار ءتۇرلى بايقاۋلاردا جەڭىمپاز اتانىپ، سالعان سۋرەتتەرى جاقسى باعالانادى. سۋرەت قانا ەمەس، «مۇشەل جىل ساعات»، «كەرگىش رامكا» قاتارلى قاراپايىم تاپقىرلىق دۇنيەلەرىنە پاتەنت تە الادى.
2006-جىلى التاي ايماقتىق 2- ورتا مەكتەپتى قىتاي تىلىندە ءتامامداعان ول، شىڭجاڭ پەداگوگيكا ۋنيۆەرسيتەتىنىڭ ماي بوياۋلى سۋرەت بولىمىنە وقۋعا تۇسەدى. سونىمەن بىرگە، ول مۋلتفيلم جاساۋ تەحنيكاسىنا دا قىزىعىپ، ساباقتان سىرتقى ۋاقىتتارىندا قوسىمشا ءبىلىم الادى.
ۋنيۆەرسيتەتتى بىتىرگەن سوڭ ول، 2010-جىلى بەيجىڭ كينو ينستيتۋتى، مۋلتفيلم جوبالاۋ ستۋدياسىنىڭ ماگيستراتۋراسىنا قابىلدانادى. قالاعان، ءوزى قىزىعاتىن ماماندىعىن قۇلشىنا وقىپ، بار زەيىنىمەن ءبىلىم الادى. تاجىريبەلى ۇستازدارىنىڭ جول كورسەتىپ، ءجون سىلتەۋىنە ارقا سۇيەيدى. وقۋىن اياقتاۋ الدىندا ارىسبەك ءوزىنىڭ وسى ۋاقىتقا دەيىن العان بىلىمىنەن ءبىر ناتيجە شىعارۋدى ويلاپ، «ساحارالىقپىن» مۋلتفيلمىن جاساۋعا بەل بايلايدى.
سۋرەت سىزۋ مەن مۋلتفيلم جاساۋ ەكەۋى ەكى ءتۇرلى سالا ەكەنى ءمالىم. ارىسبەك بالا كەزىنەن گرافيكا سۋرەتتەردى جاقسى سىزاتىن. بۇل جايىندا ول «سۋرەت سىزۋدا بەينەلەۋ قابىلەتىڭ جوعارى بولۋى جانە سۋرەتكە سەزىمىڭدى سىڭىرە ءبىلۋىڭ ءتيىس. ەگەر بار زەيىنىڭدى ارناساڭ سۋرەت سالۋ ونشا قيىنعا سوقپايدى، ءبىراق ونى فۋلتفيلمگە اينالدىرۋ ناقتى ءبىلىمدى، شەبەرلىكتى، كومپيۋتەر تەحنيكاسىن جاقسى يگەرۋدى تالاپ ەتەدى» دەيدى.
التايعا قايتىپ ورالعان ول «ساحارالىقپىن» مۋلتفيلمىن جاساۋعا كىرىسەدى. ۋاقىتتى ۇنەمدەپ، ويىن-كۇلكىنى تيىپ، ءار كۇنىن كومپيۋتەر ۇستەلىنىڭ الدىندا وتكىزەدى. دوستارى دا اقىل-كومەگىن بەرەدى. اقىرى، قاجىرلى ەڭبەكتىڭ بوداۋى تولەنىپ، 8 مينۋت 52 سەكۋندتىق «ساحارالىقپىن» كارتيناسىن جاساپ شىعادى.
ول قىتاي بويىنشا وتكىزىلگەن ۇلكەن باسەكەدە قارا ءۇزىپ، 500 تۋىندىنىڭ ىشىنەن ۇزدىك شىعادى.
قىتاي ءتىلدى مەكتەپتە وقىسا دا، ساحارا ۇلاندارىنىڭ شىنايى بولمىسىن، ۇلتتىق رۋحىن ءوز تۋىندىسىنا سىڭىرە بىلگەن ارىسبەكتىڭ تالانتى مەن شەبەرلىگى كورەرمەننىڭ ىقىلاسىنا بولەندى. بالاسىنىڭ قۇلاعىنا قازاقتىڭ سالت-ءداستۇرىن، عۇرىپ-ادەتتەرىن قۇيىپ وتىرعان اكە تاربيەسى دە ونىڭ دارىندى ونەر يەسى بولىپ شىعۋىنا اسەر ەتكەنى انىق.
قازاق جاستارى ەندى-ەندى قولعا الىپ جاتقان مۋلتفيلم جاساۋ باعىتىندا، وسىنداي تىرناقالدى تۋىندىلارى ۇلكەن باعاعا يە بولعان ونەرلى قانداستارىمىزدىڭ تابىسى كوڭىلگە ۇلكەن ءۇمىت سىيلايدى.
25 جاستى ەندى باعىندىرعان ارىسبەكتىڭ الدا جاسايتىن جۇمىستارى ءالى ۇشان-تەڭىز. ءوز كاسىبىنە جاڭا عانا جول سالىپ كەلە جاتقان جاستىڭ ءالى تالاي جەتىستىگىنە ءتانتى بولامىز دەپ ۇمىتتەنەمىز.
قازاقستاندا دا قازاق ءتىلدى، ۇلتتىق ماندەگى مۋلتفيلم جاساۋ ەندى وركەن جايىپ كەلەدى. «تاستۇلەك»، «ەرتوستىك»، «قوشقار مەن تەكە» ت. ب تۋىندىلار كورەرمەنگە جول تارتىپ، جاقسى اڭىس قوزعادى. ارىسبەك تە قازاق مۋلتفيلمى سالاسىنىڭ قاتارىن تولتىرىپ، كەتىگىن بۇتىندەيدى دەگەن سەنىم بار.
مۇرات الماسبەك ۇلى
Baq.kz
