وڭتۇستىك قازاقستان وبلىسىندا ۇلتتىق جانە تابيعي ساياباقتار اۋماعىندا تۋريستىك نىساندار سالىنباق

استانا. قازاقپارات - وڭتۇستىك قازاقستان وبلىسىندا ەكولوگيالىق تۋريزمدى دامىتۋ ماقساتىندا «سايرام-وگەم» مەملەكەتتىك ۇلتتىق تابيعي ساياباعى مەن «سىرداريا-تۇركىستان» مەملەكەتتىك وڭىرلىك تابيعي ساياباقتارىنىڭ ورمان تابيعي رەزەرۆتارىنىڭ اۋماعىندا تۋريزمدى دامىتۋ جوبالارىن بيزنەس-قاۋىمداستىققا كەڭىنەن تانىستىرۋ ءىس-شاراسى ۇيىمداستىرىلدى.

بۇل تۋرالى و ق و اكىمىنىڭ باسپا ءسوز قىزمەتى حابارلادى.

نەگىزگى ماقساتى - مەملەكەتتىك ۇلتتىق تابيعي ساياباقتار اۋماقتارىندا تۋريستىك جانە دەمالۋ قىزمەتىن جۇزەگە اسىرۋ ءۇشىن تۋريزم وبەكتىلەرىن سالۋعا ءوڭىردىڭ كاسىپكەرلەرىن تارتۋ بولىپ تابىلاتىن جيىندا «سايرام-وگەم» مۇتس مەن «تۇركىستان-سىرداريا» م ءو ت س-ىنەن ۇسىنىلعان 5 جەر ۋچاسكەسىنىڭ تانىستىرىلىمى ءوتتى.

اتاپ ايتقاندا، «سايرام-وگەم» ساياباعىنىڭ ماشات شاتقالىنان 4,4 گەكتارعا (تۇلكىباس فيليالى)، ءيىرجول شاتقالىنان 1,5 گەكتارعا (تولەبي فيليالى) تۋريستىك كەشەن قۇرىلىسىن جۇرگىزۋ ۇسىنىلسا، باك-شەلپەك شاتقالىنىڭ 1,5 گەكتار اۋماعىنان (وگەم فيليالى) دەمالىس ورنىن سالۋ جوسپارلاندى. سونىمەن قاتار، تۋريزم نىساندارى «تۇركىستان-سىرداريا» تابيعي ساياباعىنىڭ سىرداريا فيليالىنداعى بايىرقۇم جانە تاقىركول ورمانشىلىعىنىڭ ماڭىنان دا بوي كوتەرەتىن بولدى.

جوبالاردىڭ تانىستىرىلىم قورىتىندىسى بويىنشا وسى جىلدىڭ اقپان ايىندا مەملەكەتتىك ۇلتتىق تابيعي ساياباقتار مەن مەملەكەتتىك ورمان تابيعي رەزەرۆاتتارى جەر ۋچاسكەلەرىن ۇزاق مەرزىمدى پايدالانۋعا بەرۋ بويىنشا تەندەر وتكىزۋ تۋرالى حابارلاندىرۋلار بەرەتىن بولدى.

ايتا كەتەيىك، بۇگىنگە دەيىن «سايرام-وگەم» مۇتس-ءنىڭ 9,5 مىڭ گەكتاردان استام اۋماعىن قۇرايتىن 218 جەر ۋچاسكەسى ۇزاق مەرزىمدى پايدالانۋعا، 217 گەكتاردان استام اۋماقتى الاتىن 114 جەر تەلىمى قىسقا مەرزىمدى پايدالانۋعا بەرىلگەن.