دوللاردىڭ تۇراقسىزدىعىنان قارا بازارداعى كولىك باعاسى ەكى ەسەگە تۇسكەن

  ساتۋشىلار دوللار وسكەن سايىن، كولىك باعاسىن تۇزەتىپ، تومەندەتىپ جازۋعا ءماجبۇر دەپ حابارلايدى، 31 - ارنا.

 سودان- اق بولار بازارداعى ەڭ قىمبات باعا 25 مىڭ دوللاردان اسپاۋدا. ال ساتىپ الۋشىلار دوللارلىق ەكۆيۆالەنتتە ارزان كورىنگەن تەمىر تۇلپار، تەڭگەگە اۋدارعاندا اسپانداپ شىعا كەلەدى- دەپ وتىر.

عابيت تورعايەۆ كولىك ساۋداسىمەن 15 جىلدان بەرى اينالىسىپ كەلەدى. باستاپقىدا ساۋداعا شىعاراتىن تەمىر تۇلپارلارىن گەرمانيا مەن بالتىق ەلدەرىنەن اكەلگەن ەكەن. بىلتىرعى جىلدان باستاپ قىمبات شەتەلدىك كولىكتەردى رەسەيدەن جەتكىزىپ ءجۇر. ونىڭ ءوزى مەملەكەتتىك الىم قىمباتتاعان كەيىن ءتيىمسىز بولىپ قالدى - دەيدى.

«كوبىنەسە باعانى ءبىلىپ قايتايىق، بازار نە بولىپ جاتىر دەپ كەلەدى. ال ناقتى ماشينا الامىن دەپ كەلەتىندەر قازىر بىرەن- ساران بولىپ قالدى. ال ارزان ماشينالار تەڭگەمەن ساۋدالاناتىن. قازىرگى ۋاقىتتا 300 مىڭ، 600 مىڭ تەڭگەلىك ماشينالار ءوتىپ جاتىر. قىمبات ماشينالار تۇر»، - دەيدى ساتۋشى عابيت تورعايەۆ.

جىلى جاڭا، پرەميۋم ساناتىنداعى كولىكتەردى بازاردان نەبارى 14 مىڭ دوللارعا تابۋعا بولادى. اقشاسىن الىپ، كولىك تاقىمداپ قايتۋعا وقتالىپ كەلگەندەرگە ساۋداگەرلەر تاعى ءبىر- ەكى مىڭ دوللار تۇسۋگە بار. باعانىڭ بارلىعى دوللارمەن بەلگىلەنگەن. الايدا كۋرس ايىرماشىلىعىن شەگەرىپ، شىنايى باعاسىنان اسىرماي ارزانىراق بەرەمى - دەيدى الىپ- ساتارلار.

«40 مىڭ دوللار تۇراتىن كولىكتەر قازىر ەكى ەسە ءتۇستى. جەڭىل، جۇك ماشينالاردىڭ قۇنى ءتۇسىپ كەتتى. وندا دا الىپ جاتقان ادام جوق. بازار بوس، ماشينالار وتپەي جاتىر»، - دەيدى ساتۋشى نۇرجان شىڭعىسبايەۆ.

دەسە دە دوللارمەن قول جەتىمدى كورىنگەن كولىكتەردى تەڭگەگە اۋدارىپ، دوللاردىڭ ەسكى كۋرسىنا شاقساق باعانىڭ بۇرىڭعىدان وزگەرمەگەنىن بايقايمىز. ءتيىمدى ۇسىنىستى قازىر تەك جىلجىمالى مۇلكىن دەرەۋ ساتامىن دەۋشىلەر مەن كولەمى ۇلكەن، جەر تالعامايتىن كولىكتەرىن ساتۋشىلاردان عانا تابۋعا بولادى.