الماتىدا اتاقتى اپورت الماسىن ءوسىرۋ قولعا الىنادى
الماتى قالاسىنىڭ اۋىل شارۋاشىلىعى باسقارماسى باسپا ءسوز قىزمەتىنىڭ حابارلاۋىنشا، بۇل ءۇشىن ارنايى جەر تەلىمى بەلگىلەنىپ قويىلدى.
الەۋەتتى ينۆەستور - «Apple world» ج ش س 2016 -جىلدىڭ ءساۋىر ايىنان باستاپ، ول جەرگە الما كوشەتتەرىن وتىرعىزادى. بولاشاقتا بۇل جەر الما باعىنا اينالادى.
سونداي- اق، تاعى ءۇش بەيىندى اگرارلىق كومپانيا الما باقتارىن جانداندىرۋ ءىسىن قولعا الۋعا دايىن ەكەندىكتەرىن ءبىلدىردى. قازىر ولارعا لايىقتى جەر تەلىمدەرى قاراستىرىلىپ جاتىر.
ايتا كەتەلىك، بۇگىنگى تاڭدا الماتى قالاسىندا الماعا دەگەن سۇرانىس جىلىنا 17 مىڭ توننانى قۇرايدى. وسىعان بايلانىستى، الماتى قالاسىنىڭ اكىمدىگى الما ءوندىرىسىن 2020 - جىلعا قاراي، جىلىنا 3,5 مىڭ تونناعا جەتكىزۋدى جوسپارلاپ وتىر.
ال بۇل، قالا تۇرعىندارىنىڭ وسى ءبىر ءدامدى جەمىسكە دەگەن سۇرانىسىنىڭ بەستىن ءبىر بولىگىن عانا قامتاماسىز ەتە الادى.
سوندىقتان، الماتىعا الما باقتارى اۋاداي قاجەت.
اۆتور: جاپپاربەرگەن ايبوتا
