وڭتۇستىك قازاقستاندا بۇحار بۇعىسىنىڭ ءوسىمى رەكوردتىق كورسەتكىشكە جەتتى
ناقتىراق ايتساق، بۇگىندە «سىرداريا-تۇركىستان» مەملەكەتتىك وڭىرلىك تابيعي پاركى» ك م م- ندە 35 باس انالىق، 46 باس اتالىق جانە 22 باس تولىمەن بۇحار بۇعىسى وسىرىلۋدە.
بۇل تۋرالى و ق و «اكىمىنىڭ» باسپا ءسوز قىزمەتى حابارلادى.
ەسكە سالساق، 2000-جىلى «سىرداريا-تۇركىستان» مەملەكەتتىك وڭىرلىك تابيعي پاركىنىڭ تۇركىستان فيليالىندا سىرداريا وزەنىنىڭ بويىنداعى توعاي ورمانىنان 2 گەكتار جەر ۋچاسكەسىنە قورشاۋ ورناتىلىپ، بۇحار بۇعىلارىنىڭ تۇقىمباعى ۇيىمداستىرىلعان. سول كەزدە تۇركىستان قالاسىنىڭ 1500 جىلدىق مەرەيتويىنا كەلگەن مەملەكەت باسشىسى وسى ءوڭىردىڭ توعاي، ورمانىندا مەكەندەگەن جانۋارلاردى كوبەيتىپ، كەلەشەك ۇرپاققا ساقتاپ قالۋ ماقساتىندا 8 باس بۇحار بۇعىسىن سىيعا تارتقان بولاتىن. وسىلايشا، جەرسىندىرىلگەن بۇعىلاردىڭ سانى 15 جىلدا 95 باسقا ارتىپ، 103 كە جەتتى.
وبلىستىق تابيعي رەسۋرستار جانە تابيعات پايدالانۋدى رەتتەۋ باسقارماسى ماماندارىنىڭ حابارلاۋىنشا، جانۋارلاردىڭ جىلدىق ءوسىمى 6-8 باس ارالىعىندا بولسا، سوڭعى ءۇش جىلدا انالىق بۇعىلار جىلىنا 11-16 باس ارالىعىندا تولدەگەن. ال وتكەن 2015-جىلى بۇعى سانىنىڭ ءوسۋى رەكوردتىق كورسەتكىشكە جەتىپ، 22 ءتول الىندى.
ايتا وتەيىك، بۇحار بۇعىلارىنىڭ ءومىر ءسۇرۋ ۇزاقتىعى 15-20 جىل. جانۋار ءتۇرى قازىرگى تاڭدا قازاقستاننىڭ جانە حالىقارالىق تابيعات قورعاۋ وداعىنىڭ قىزىل كىتاپتارىنا ەنىپ، قورعاۋعا الىنعان. ونىڭ بيولوگيالىق ەرەكشەلىكتەرى - انالىقتارىندا ءمۇيىز بولمايدى. اتالىقتارىندا بەس بۇتاقتى ءمۇيىز بولادى. ءمۇيىزى جىلما جىل ءتۇسىپ، اۋىسىپ وتىرادى. كۇيگە ءتۇسۋ ۋاقىتى تامىزدىڭ اياعىنان قازاننىڭ باسىنا دەيىن جۇرەدى. مامىر-ماۋسىم ايلارىندا تولدەيدى.
