قازاقستاندىق بويجەتكەندەر نە ءۇشىن شەتەلدىك كۇيەۋ تاڭدايتىندارىن ايتتى

شەتەلدىك ازاماتتارعا تۇرمىسقا شىققان بويجەتكەندەردى كوپشىلىك جاقتىرا بەرمەيدى. بارلىعىنىڭ ايتارى ەلىمىزدە دە سىمباتى دا، ساليقالى ەر جىگىتتەر جەتەرلىك.

ارينە، بار. الايدا تاعدىردىڭ جازۋى بولار كەيبىر قازاقستاندىق بويجەتكەننىڭ تاڭداۋى شەكارا سىرتىنداعى شەتەلدىككە ءتۇسىپ جاتادى. NUR. KZ پورتالىنىڭ جۋرناليستەرى شەتەلدىككە كۇيەۋگە شىعىپ، الەمنىڭ ءار تۇكپىرىندە تۇرىپ جاتقان 3 جەرلەسىمىزدىڭ تاعدىرى تۋرالى جازباق.

جاننا مەن مارتين

جاننا مەن مارتين وزدەرىن قوسقان ءبىرىنشى قۇدايعا، سوسىن دامىعان تەحنولوگياعا العىس ايتادى. «عالامتور بولماسا بۇگىن ءبىز بىرگە بولماق تۇگىل، ءبىر- ءبىرىمىزدى تانىماستا ەدىك» دەپ كۇلەدى جۇبايلار. قىز - قوستانايدان، ال جىگىت ۇلىبريتانيادا تۇراتىن لاتىنامەريكالىق ازامات. الەۋمەتتىك جەلى ارقىلى تانىسىپ، ءتىل تابىسقان جاستاردىڭ ويلارى ءبىر جەردەن شىققان. العاشىندا لوندوندا كەزدەسكەن ولار جاقىن ارالاسىپ، ۇيلەنۋگە بەل بۋعان. جارتى جىلدان سوڭ جاستار قوستانايدا شاڭىراق كوتەردى.

«مەنىڭ اتا- انام العاشىندا اعىلشىن ازاماتىمەن تانىستىعىما كۇدىكتەنە قارادى. كەيىن كۇيەۋ بالالارىن كورگەن سوڭ، مەنىڭ تاڭداۋىمنىڭ دۇرىس ەكەنىنە كوزدەرى جەتتى. ال، ءمارتيننىڭ اكە- شەشەسى بۇل جاڭالىقتى جاقسى قابىلداپتى. سەبەبى ولاردىڭ جانۇياسى كەڭەس ۇكىمەتى تۇسىندا قازاقستاندا بولىپ، جەرگىلىكتى جۇرتتىڭ قوناقجايلىلىعىنا قانىق بولعان» ، - دەيدى جاننا.

قازىر وتباسى ۇلىبريتانيادا تۇرادى. جاننانى العاشىندا كوشەدەگى فاست- فۋدتقا ۇيمەلەگەن ادامدار، كوشەدە قاڭعىباس ءيتتىڭ جوقتىعى تاڭقالدىرعان. سەبەبى، بۇل ەلدە يەسىز ءتورت اياقتىعا ادامدار جاۋاپتى قارايدى جانە ارنايى ورىنداردا ۇستايدى.

ليا مەن كونستانتين

ليا قازاقستانداعى تەلەارنالاردىڭ بىرىندە تانىمال جۇرگىزۋشى بولىپ قىزمەت اتقارىپ، سونىمەن قاتار ۋنيۆەرسيتەتتە ءتالىم العان. قولىنا ديپلوم العان بويجەتكەن ءبىلىمىن جەتىلدىرۋ ءۇشىن گرەتسياعا جول تارتادى. بۇل ەلدى جەرلەسىمىز جاي تاڭدامادى. سەبەبى بويجەتكەننىڭ تۋىستارى وسى ەلدە تۇرادى جانە ۇزاق ۋاقىت بويى كونستانتين ەسىمدى ءتىس دارىگەرىندە ەمدەلگەنىنەن قۇلاعدار.

گرەتسياعا ءبىلىم ىزدەپ كەلگەن بويجەتكەننىڭ تاعدىرى قۇددى ءبىر كينوداعىداي ماحاببات وقيعاسىمەن ۇلاسادى. جاس ءجۋرناليستىڭ ءتىسى اۋىرىپ، ەمدەتۋ ءۇشىن وتباسىلىق دارىگەرگە بارادى. وسىلايشا العاشقى تانىستىق باستالعان. جەرلەسىمىز وزگە ەلدە ءجۇرىپ، ماگيسترانت ديپلومى مەن قاتار وزىنە ومىرلىك جار جانە جاڭا ەل تاپتى.

«مەن قازاقستان ازاماتى بولعاندىقتان نەكەمىزدى جەرگىلىكتى اكىمدىكتە قيدىق. گرەكتەردىڭ ۇيلەنۋ تويى قازاقتارعا ۇقساس 200-300 ادام كەلىپ، كۇن بويىنا ءان سالىپ، بيلەپ، تويلايدى. ءبىز ءوز تويىمىزعا ەت جاقىن دەگەن 50 ادامدى شاقىردىق. داستارحاندا گرەك ۇلتتىق تاعامىمەن قاتار قازاقتىكى تۇردى. ماسەلەن، قازى»، - دەيدى ليا.

ليانىڭ سوزىنشە، كەلىن مىندەتىندە گرەكتەر مەن قازاقتىڭ ۇقساستىعى بار. ماسەلەن، جاس كەلىن كەسەگە تولتىرماي، دۇرىس شاي قۇيىپ ءبىلۋ، «ەللينيكو» كوفەسىن ءدامدى قىلىپ دايارلاۋ سىندى جۇمىس جۇكتەلگەن. جەرلەسىمىزدى گرەكياداعى ۋاقىت تاپشىلىعى تاڭ قالدىرعان. ماسەلەن، بانكتەر تۇسكى اسقا دەيىن عانا جۇمىس جاساسا، ءدارىحانالار 14 00 - دە جابىلىپ قالادى ەكەن.

ءجاميلا مەن حاكان

ءجاميلاعا شەتەلگە كۇيەۋگە شىعاتىنىن ءبىرىنشى بولىپ قازاقستاندىق تانىمال كورىپكەل ايتقان. العاشىندا بويجەتكەن بالگەردىڭ سوزىنە سەنبەپتى. سەبەبى، ءدال سول كەزدە ءوز جەرلەسىمەن كەزدەسىپ جۇرگەنىن ايتادى. مالايزيادا ءبىلىم العان ءجاميلا كاناداداعى بيزنەس- مەكتەپتىڭ ستۋدەنتى اتانادى. شتاتتا وقىپ ءجۇرىپ، دوستارىمەن باس قوسۋ كەزىندە قۇربىلارى تۇركيالىق حاكان ەسىمدى ازاماتپەن تانىستىرادى.

«مەن كۇيەۋىمنىڭ سىمباتتىلىعىن سوڭعى ورىنعا قويدىم. مەن ءۇشىن ەڭ باستىسى بيازىلىق پەن ونىڭ ماعان دەگەن قۇرمەتى. حاكان وتە ءازىلقوي، ەرجۇرەك، قايرىمدى جان. ءبىز تانىسقاننان كەيىن ءبىر جارىم جىلداي ارالاسىپ بارىپ ۇيلەندىك. ۇيلەنۋ تويىمىز حاكان تۇرىپ جاتقان تورونتو قالاسىندا، جاقىن دوستارىمىزدىڭ قاتىسۋىمەن بولدى. ارتىنشا ءبىز قازاقستانعا كەلىپ، قۋانىشىمىزدى مەنىڭ تۋىستارىممەن بولىستىك. اكە- شەشەم حاكاندى جاقسى قابىلدادى. ەت اسىپ، اسقا تويدىرىپ، قوناقجايلىقتارىن كورسەتتى. وسىدان سوڭ حاكاننىڭ تۋىستارى بىراز ۋاقىتقا دەيىن تاماققا قاراي المادى»، - دەپ كۇلەدى ءجاميلا.

شەتەلدىككە كۇيەۋگە شىعۋ كەيبىر بويجەتكەندەر ءۇشىن ماحاببات تاريحى بولسا، ەندى ءبىرى ءۇشىن- جۇرەگىنىڭ جارتىسىن تاۋىپ، جەكە ءومىرىن قالىپتاستىرۋ.

Megalove اگەنتىگىنىڭ ديرەكتورى جاننا مۇقانوۆانىڭ سوزىنشە، قازاقستاندىق بويجەتكەندەر سۇيگەن جارىن ءبىرىنشى جەرلەستەرىنىڭ اراسىنان ىزدەيدى. كەيبىرى تاپتىم دەگەننىڭ وزىندە بالالى بولعان سوڭ اجىراسىپ جۇرەك قالاۋىن شەتەلدىكتەردەن كەزدەستىرەدى. وزگە ەلدىڭ ازاماتارىنا تۇرمىسقا شىققانداردىڭ بارلىعى جوعارى ءبىلىمدى، قالتالى، ءارى مانساپ قۇرىپ ۇلگەرگەندەر.

«ءبىزدىڭ ەلدە 30-40 جاسقا تاقاپ قالعان ەرازاماتتار بالاسىمەن اجىراسقاندار، ءوزى قاتارلاستارىنا قارامايدى، جاس قىزعا ۇيلەنگىسى كەلەدى. ءتىپتى 50 دى القىمداعانداردىڭ دا قالاۋى سول. ال، جاس قىزدار "اعاشكالارعا" كۇيەۋگە شىقپايدى عوي. وسىلايشا ۋاقىت ءوتىپ، كارى قىزدا، ءسۇر بويداقتىڭ دا سانى كوبەيە بەرەدى. شەتەلدە ماحاببات جاسقا قارامايدى دەگەن قاعيدا قالىپتاسقان. ولار جۇبىنىڭ جاسىنا، بۇرىنعى وتكەن ومىرىنە ءمان بەرمەيدى. ولار ءۇشىن بولاشاق ماڭىزدى. سول ءۇشىن دە كەزدەسكەن جارتىسىمەن ءتىل تابىسسا بولدى، ۇيلەنۋگە دايىن» ، - دەيدى جاننا.

اگەنتتىك باسشىسىنىڭ سوزىنشە، شەتەلدىك كۇيەۋ جىگىتتەرمەن جۇمىس جاساۋعا اسا قۇلىقسىز. سەبەبى شەكارا سىرتىنداعى ازاماتتاردى تەكسەرۋ وتە قيىن. ونىڭ الاياق نەمەسە قىلمىسكەر ەكەنىن ەشكىم دالەلدەي دا، تاني دا المايدى. سوعان قاراماستان ولاردىڭ قازاق جەرىنەن قىز الۋعا دەگەن قۇلشىنىستارى جوعارى.

«ءبىزدىڭ اگەنتتىكتىڭ كومەگىنە جۇگىنگەن قىز- كەلىنشەكتەردىڭ بارلىعى شەتەلدىككە تۇرمىسقا شىققىسى كەلەدى. ال، جىگىتتەر جاعىنان ونداي سۇرانىس جوق. ايەلدەر جاعى: امەريكا، يسپانيا، يتاليا، فرانتسيا، گەرمانيا سىندى ەلدەردىڭ ەر ازماتتارىمەن تانىسۋعا دايىن. ال ءبىزدىڭ ەلدىڭ قىزدارىنا سۇرانىستى ەڭ كوپ جاسايتىندار تۇرىكتەر مەن قىتايلار. ءبىز بۇل ەلدەردىڭ ازاماتتارىنا جاۋاپ قايتارمايمىز. سەبەبى تۇرىكتەردىڭ وتانىندا جانۇياسى بار. ال، قىتايلاردا وتباسى قۇرۋ ءۇشىن قوماقتى سالىق تولەۋ قاجەت. سول ءۇشىن ولار قازاقستاندىق قىزدارعا كوز تىگەدى»، - دەيدى اگەنتتىك باسشىسى.

اگەنتىكتەردىڭ مالىمەتىنشە، قازاقستاندىقتاردىڭ اراسىندا شەتەلدىككە كۇيەۋگە شىعۋعا كەلىسىم بەرەتىن ورىس كەلىنشەكتەر از. ال، قازاق قىزدارى ءوز جارتىلارىن شەتەلدەگى قازاقتاردىڭ اراسىنان ىزدەيدى. تاپپاعان جاعدايدا باسقا ۇلت وكىلىنە شىعۋعا دايىن. ەلدى دە، جىگىتىنىڭ دە ۇلتىنا قارامايتىنداردىڭ كوش باسىندا كورەيلىكتەر مەن ۇيعىرلار تۇر. تالاي جىلدان بەرى جۇزدەگەن جۇپتىڭ باسىن قوسقان جاننا مۇقانوۆا قىزدارعا ءجيى كەڭەس ايتادى. «اسپانعا قاراپ، حانزادا كۇتپە. جان- جاعىنا قاراپ ءجۇر، ومىرلىك جارىڭ جانىندا»، - دەيدى.

 nur.kz