ارتىق قىلام دەپ، تىرتىق قىلعان

ءبىراق، بۇنداي «مەيىرىمسىز» ادامداردىڭ ءوسىپ شىعۋىنا نە سەبەپ؟ بۇل ماسەلەنى مەنىڭ ءوز انام وتە ادەمى تۇسىندىرەدى. ول كىسىنىڭ ايتۋىنشا، كەڭەستىك «ۆاكۋۋمدا» وسكەن ۇرپاق ەركىندىك كەڭىستىگىنە ۇيرەنىسە الماي جاتىر، «وسىنشا بەرگەن داۋلەتتى كوتەرىپ تۇرا الماي جاتىر». ايتەۋىر، «بالامنىڭ مەنەن گورى تۇرمىسى جوعارى بولسىن، ەش قيىندىق كورمەسىن» دەگەن ۇران، شىنىندا دا، جەگەنى الدىندا، جەمەگەنى ارتىندا، ەشتەڭەنىن قادىرىن بىلمەيتىن سورلىنى تاربيەلەيدى. ونىڭ ومىرىندە مۇلدە قيىندىق بولمايدى. سەبەبى، اتا-اناسى وعان ەڭ ءتاتتى تاماق، ەڭ قىمبات كيىم، ەڭ جاڭا ۇيالى تەلەفون، ەڭ ۇلكەن تەلەۆيزور، ەڭ زاماناۋي كومپيۋتەر الىپ بەرىپ، قارىق قىلادى. ءبىر كەرەگى ەسكىرسە الدە ۇناماسا، ويلانباي باسقاسىن، جاڭاسىن اپەرەدى. ءومىر-بويى سولاي. كيىم ۇناماسا، تاستايدى، جاڭاسىن اپەرەدى، ۇيالى تەلەفون سىنسا، تاستايدى، جاڭاسىن اپەرەدى، مۇعالىم «بەس» قويماسا، مەكتەبىن اۋىستىرادى، ايەلى نە كۇيەۋى جاقپاي قالسا، وپ-وڭاي تاستايدى، جاڭاسىن الادى. ءتىپتى، تۋعان بالاسى وعان «قيىندىق» بولسا، تاستايدى... ەڭ جامانى... مىنە، ومىرىندە ەشبىر قيىندىق كورمەي، اتا-اناسى الپەشتەگەن بالانىڭ ومىرىندەگى ەڭ العاشقى ءوزى شەشۋ كەرەك بولعان ماسەلەسى - اتا-اناسىنىڭ قارتايعانى. ولار ەشتەڭەگە جارامايدى، ەسكىردى... ەندى ولار بىرەۋدى باعىپ-قاقپاق تۇگىل، ءوزى بىرەۋدىڭ قامقورلىعىنا مۇقتاج. ءبىراق، بەيشارا بالالارى ونى قايدان ءتۇسىنسىن؟ ول بىرنارسە ەسكىرسە، تاستاپ ۇيرەنگەن. سودان، امال نە، ادەتىنشە، تۇككە جارامسىز بولعان اكە-شەشەسىن ءوز قولىمەن قارتتار ۇيىنە تابىستايدى. ەڭ سوراقىسى، بۇل جاساعان امالى - ءوز اتا-اناسىنىڭ بەرگەن تاربيەسى ەدى...

سولاي... انامنىڭ ماعان قاتال بولعان كەزىندە دە مەنىڭ بولاشاق ومىرىمە، مىنەزىمنىڭ قالىپتاسۋىنا الاڭداعان مەيىرىم جاتقانىن ەندى ءتۇسىنىپ جاتقاندايمىن...

سىرىم اسىلحان ۇلىنىڭ VK جازباسىنان