ەلوردا پوليتسياسى ايالدامانى بۇلدىرگەن بۇزاقىلاردى ىزدەۋدە

استانا. قازاقپارات - ەلوردانىڭ پوليتسياسى قورعالجىن تاس جولى بويىنداعى ايالدامانى بۇلدىرگەن كۇدىكتىلەردى انىقتاۋ جانە ۇستاۋ ماقساتىندا جەدەل-ىزدەۋ شارالارىن جۇرگىزىپ جاتىر.

سوت الدىنداعى تەرگەۋ امالدارى باستالدى، دەپ حابارلادى استانا قالالىق ءى ءى د باسپا ءسوز قىزمەتىنەن.

ۆەدومستۆو اقپاراتىنا سايكەس، ەسىل اۋداندىق ءى ءى ب قىزمەتكەرلەرى تەكسەرۋ بارىسىندا ايالدامانىڭ ىشىندەگى ەكى اقپارات قابىرعاسىنىڭ جۇلىپ الىنعانىن جانە wi-fi مودەمىنىڭ ۇرلانعانىن انىقتادى.

ايتا كەتەرلىگى، قازىرگى ۋاقىتتا بۇل ايالداما تولىق پايدالانۋعا بەرىلمەگەن. ونىڭ ىشىندە ەلەكتر جارىعى، جىلى بەرۋ جانە بەينە باقىلاۋ جۇيەسى ىسكە قوسىلماعان. اتالعان فاكتى سوت الدىنداعى تەرگەۋدىڭ ءبىرىڭعاي تىزىلىمىنە قر قىلمىستىق كودەكسىنىڭ 188 (ۇرلىق) جانە 202-باپتارى بويىنشا (وزگەنىڭ مۇلكىن قاسقانا ءبۇلدىرۋ) تىركەلگەن.

اۆتور: مارلان جيەمباي