الەمدەگى ەڭ داۋلەتتى ايەلدىڭ بايلىققا جەتۋ قۇپياسى
ميللياردتار سانى جاعىنان ونىڭ الدىندا كريستي ۋولتون، ليليان بەتانكۋر، جاكلين مارس پەن سيۋزاننا كلاتتەن تۇر. دەسە دە، 20 ميللياردەر حانىمنىڭ اراسىندا 51 جاستاعى قىتاي ازاماتشاسى داۋلەتتى اكەسىنەن نەمەسە كۇيەۋىنەن مۇراعا الماي، تازا ەڭبەگىمەن تاپقان جالعىز ايەل.
ۋ ياتسزيۋن 1954 -جىلى دۇنيەگە كەلدى. 16 جاسىندا قىتايداعى وڭتۇستىك- باتىس تەحنيكالىق ۋنيۆەرسيتەتىنە تۇسەدى. ارينە، ج و و- عا ءتۇسۋ ەكىنىڭ ءبىرىنىڭ قولىنان كەلەدى دەپ ويلاۋىڭىز مۇمكىن، ءبىراق اسپان استى ەلىندە سول كەزدە ءبىر ورىنعا 200 ادام كەزەكتە تۇرعانىن ەسكەرسەك، ۋدىڭ جەتىستىگى شىن مانىندە ۇلكەن ەرلىكپەن پارا- پار. ۋنيۆەرسيتەتتى بىتىرگەن سوڭ ۋ مىندەتتى ءتورت جىلىن زاۋىتتا جۇمىس ىستەۋمەن وتكىزەدى. كەيىن «قىتاي قالالىق گازەتىنىڭ» جىلجىمايتىن مۇلىك بولىمىنە ءتىلشى بولىپ ورنالاسادى.
تاعى ءتورت جىلدان سوڭ رەداكتورلىق قىزمەتكە كوتەرىلەگەن ۋ ياتسزيۋن ديەۆەلوپەرلىك كومپانيالاردىڭ بىرىنە جالدامالى مەنەدجەر بولىپ ورنالاسادى. جۇمىس بارىسىندا قۇرىلىس سالاسىمەن بايلانىسى بار شەنەۋنىكتەردەن ەش جالىقپاستان سۇحبات الىپ جۇرەدى. ونىڭ بۇل تانىستىعى ءوز پايداسىن بەرىپ، بىرنەشە جىلدان سوڭ (1993 -جىلى) ينۆەستورلاردىڭ قولداۋىمەن ۋ جەكە كومپانياسىن اشۋعا بەل بۋادى. Jiacheng Economic Development Company دەپ اتالعان كومپانيانىڭ باستاپقى كاپيتالى 10 ميلليون يۋان ەدى. ال جاس بينەسۆۋمەننىڭ ءوزى 29 جاستا عانا بولاتىن. ءسال ۋاقىتتان سوڭ كومپانياعا Chongqing Longfor Properties Co Ltd دەگەن جاڭا اتاۋ بەرىلەدى، ول ءوز جۇمىسىن كۇنى بۇگىنگە دەيىن ءساتتى جالعاستىرىپ كەلەدى. قىتايدا قۇرىلىس سالاسىنىڭ قۇردىمعا ۇشىراۋ قاۋپى جوعارى بولعانىنا قاراماستان، تابىسىن ازايتقان ەمەس.
مۇنداي كومپانيا اشۋعا نە يتەرمەلەدى دەگەن سۇراققا ول جاس جۇبايداردىڭ باسىنان وتكەن وقيعاسىن مىسالعا كەلتىرىپ جاۋاپ بەردى. 1990-جىلداردىڭ باسىندا جاڭا قوسىلعان ەرلى- زايىپتى پاتەر الىپ، ءۇيدىڭ كىرە بەرىسىندە جوندەۋ جۇمىستارىن جۇرگىزەدى، ەكى جىل بويى وعان گاز تارتىپ، جەلدەتكىش وتكىزۋ، ءتىپتى، قيامەت قايىمعا اينالادى. «ءدال سول كەزدە وتاندىق قۇرىلىس يندۋسترياسىن دامىتۋدىڭ شەكسىز مۇمكىندىكتەرىن اڭعاردىم» ، - دەيدى ۋ.
ءبىر جىل وتكەن سوڭ ءىسىن جاڭا باستاعان ديەۆەلوپەر چۋنكين قالاسىندا كوندومينيۋم قۇرىلىسىنا جاريالانعان مەملەكەتتىك تەندەردى ۇتىپ الادى. نىساننىڭ ءساتتى شىققانى سونشالىق، 1999 -جىلى كوندومينيۋمداعى بارلىق پاتەر قۇرىلىس اياقتالعانعا دەيىن ساتىلىپ كەتەدى. «مەنىڭ ۇلكەن ماقتانىشىم، ءالى كۇنگە دەيىن سول جۇمىسىمدى كەز كەلگەن ادامعا كورسەتۋدەن ۇيالمايمىن» ، - دەيدى ۋ ياتسزيۋن تۇڭعىش جوباسى جايلى.
2000 -جىل. كومپانيا قىزمەت كورسەتۋ اياسىن كەڭەيتىپ، ۆيللا، قالا سىرتىنداعى ۇيلەر، ءتىپتى، جاساندى تۇبەكتەر سالۋ جۇمىسىنا قىزۋ ارالاسىپ كەتەدى. وسىلايشا، Longfor Properties قىتايدىڭ ءىرى قۇرىلىس نارىعىندا الدىڭعى قاتاردان كورىنە باستايدى. 2003 -جىلى ۋ ياتسزۋننىڭ كومپانياسى ۇزدىك ديەۆەلوپەرلەر تىزىمىنە ەنىپ، تاعى ەكى جىلدان كەيىن قىتايدىڭ ەڭ تابىستى قۇرىلىس كومپانيالارىنىڭ كوشىن باستايدى. بۇگىندە Longfor چۋنكيننىڭ ەڭ ءىرى قۇرىلىس كومپانياسى.
2009 -جىلى ۋ Longfor- دى گونكونگ بيرجاسىنا شىعارىپ، ونىڭ تابىسى 4 ميلليارد دوللارعا باعالانادى. ءبىر جىلدان سوڭ كومپانيا اكسياسىنىڭ قۇنى تورتتەن ءبىر ەسەگە ارتادى.
2010-2012 -جىلدار. ۋ ياتسزۋن Forbes جۋرنالىنىڭ نۇسقاسى بويىنشا الەمنىڭ ەڭ داۋلەتتى ايەلدەرىنىڭ ءتىزىمىن باسقارادى. 2012 -جىلدىڭ ناۋرىزىندا بايلىعى 5,5 ميلليارد دوللارعا جەتكەن ول الەمنىڭ ەڭ باي ادامدارىنىڭ ىشىندە 178- ورىنعا جايعاسادى.
بايلىققا جەتۋ قۇپياسى
«$100-200 ميلليون جەتكىلىكتى، ودان كوپ بولسا - اياققا تۇساۋ» ، - دەگەندى ايتۋدان جالىقپايدى ۋ ياتسزۋن.
الەمدەگى ەڭ تابىستى ايەلدىڭ ەسىمى قىتاي تىلىنەن اۋدارعاندا «ازيانىڭ ازۋلى ارمياسى» دەگەندى بىلدىرەدى. اتى زاتىنا ساي بيزنەسۆۋمەن تاۋلىگىنە 18 ساعاتىن كاسىبىنە ارناپ، ۇنەمدەگەندى، تاۋەكەلگە بارعاندى، جۇمىسكەرلەرىن باعالاپ، تاۋلىگىنە 24 ساعات بايلانىستا بولعاندى قالايدى. سوعان قاراماستان، ول وزىنە دە، قول استىنداعى قىزمەتكەرلەرىنە دە وتە قاتال. Longfor- دا مىنانداي ەرەجە بار: ۇشاقتا وتىرىپ، بايلانىستان تىسپىن دەپ ەكى رەت ەسكەرتپەسەڭ، جۇمىتان كەتە بەرۋىڭە بولادى. كەلبەتى مەن «تابەتىنە» قاراپ ۋ ياتسزۋندى باي دەپ ايتۋ قيىن - اقشانى اقىلمەن جۇمساعاندى ۇناتادى. ءىرى ديەۆەلوپەرلىك كومپانيانىڭ باسشىسى، بۇرىنعىسىنشا، ەسكى 15 مەترلىك كەڭسەدە وتىرادى، كۇنى بۇگىنگە دەيىن حاتشىسى جوق، ال كوپ ميلليوندىق كەزدەسۋلەردى قاراپايىم ءدامحانالاردا وتكىزىپ، تۇسكى اس ءۇشىن ءبىر جارىم دوللار عانا جۇمسايدى. ەسەسىنە، كاسىپكەر ۇزدىك جۇمىسشىلارىنىڭ جالاقىسىن كوتەرىپ، جاعدايىن جاقسارتۋدا ايانىپ قالمايدى. ول از دەسەڭىز، ءىرى تاپسىرىسقا قول جەتكىزگەندە نەمەسە نىساندى تاپسىرعاننان كەيىن ۇزدىك جۇمىسشىلارىن كومپانيا ەسەبىنەن الەمنىڭ ەڭ ۇزدىك كۋرورتتارىنا ەكى جۇماعا دەمالىسقا جىبەرۋدى داستۇرگە اينالدىرعان. اقشانى ادامعا سالعاندا، جۇمىس جاقسى ناتيجە بەرەدى دەپ ەسەپتەيدى ىسكەر ايەل. «ادامزاتقا، قوعامعا، ءوز اكسيونەرلەرى مەن قىزمەتكەرلەرىنە ەش پايداسىن تيگىزبەي، الەمنىڭ ەڭ داۋلەتتى ادامدارىنىڭ تىزىمىندە وسكەنىنەن ارتىق جيىركەنىشتى جەتىستىك جوق. ويتەتىن بولسا، قىرىپ اقشا تابۋىڭ ماڭىزى قانشا؟ » ، - دەيدى ول.
ۋ ياتسزيۋن جۋرناليستەردىڭ الدىنا سيرەك شىعادى. جەكە ءومىرى دە قوعام تالقىلاۋىنان تىس. ونىڭ بارلىق نازارى ساپالى جۇمىس پەن بيزنەسىن ودان ءارى وركەندەتۋگە باعىتتالعان. جۇمىس بارىسىندا « ءۇش جوق» پرينتسيپىن ۇستانادى: تەلەۆيزياعا - جوق، سۇحباتقا - جوق، قولتاڭبا بەرۋگە - جوق.
Limon.KG سايتىنان اۋدارىلىپ سالىندى
baq.kz
