باتىس قازاقستاندىقتار قادىر اقىننىڭ تۋعان كۇنىن اتاپ وتۋدە - فوتو
ورتالىق زالىندا «سۇلۋ ءسوزدىڭ سايگۇلىگى» اتتى قادىر وقۋلارى ۇيىمداستىرىلىپ، وندا سىرىم اۋدانى مەن ورال قالاسىنان كەلگەن وقۋشىلار اقىن ولەڭدەرىن وقىدى. بۇل رەتتە، اسىرەسە، سىرىمدىق جەتكىنشەكتەر قادىر جىرلارىن مانەرىنە كەلتىرە، اسەرلى جەتكىزە ءبىلدى. ەسەسىنە كەيبىر قالالىق شاكىرتتەر ءمۇدىرىپ قالىپ، دايىندىقسىز كەلگەندىكتەرىن كورسەتىپ الدى.
بۇدان كەيىن اقىن مۋزەيىندە قادىردىڭ زامانداستارى ءوز ەستەلىكتەرىن ايتتى. اقىن، قازاقستان جازۋشىلار وداعى بقو بولىمشەسىنىڭ ءتورايىمى اقۇشتاپ باقتىگەرەيەۆانىڭ اتاپ وتكەنىندەي، قادىرداي قازاقتىڭ بىرەگەي اقىنى ارامىزدان كەتكەنىمەن، وعان دەگەن ىقىلاس ەشقاشان سۋىماق ەمەس. قايتا اقىنعا دەگەن ەل قۇرمەتى ەسەلەنە ءتۇسىپ، ەسىمىن ماڭگى ەستە قالدىرۋ باعىتىنداعى شارالار جالعاسۋدا. بۇگىنگى شارالار - سونىڭ ءبىر ايعاعى.
«قازىنالى قادىر الەمى» اتتى مەرەكەلىك كونسەرت بارىسىندا اقىننىڭ شىعارماشىلىعىن بەلسەندى ناسيحاتتاۋشىلار قادىر مىرزا ءالى اتىنداعى مەدالمەن ماراپاتتالدى. «قادىر وقۋلارى» بايقاۋىنىڭ جەڭىمپاز- جۇلدەگەرلەرىنە العىسحاتتار تاپسىرىلىپ، اقىننىڭ ءومىر جولىنا ارنالعان «ولەڭنىڭ تۋىن جىقپاعان» اتتى دەرەكتى فيلمنىڭ تۇساۋى كەسىلدى.
قادىر مىرزا ءالىنىڭ 80 جىلدىعىنا ارنالعان رەسپۋبليكالىق جىر ءمۇشايراسىنا قاتىسقان جاس اقىنداردىڭ ولەڭ جيناعى دا تانىستىرىلىپ، اقىن سوزدەرىنە جازىلعان اندەر ورىندالدى.
مۋزەيدە سونداي- اق قادىرعا بەرىلگەن قولتاڭبالاردان جاسالعان «اقىنعا اق پەيىلمەن...» اتتى كىتاپتار جانە اقىن تۇتىنعان زاتتار كورمەسى قويىلىپ، شارا «مۋزەي تۇنىنە» ۇلاستى.
اۆتور: ەلجان ەرالى
