استرولوگ پۋتيننىڭ قاي جىلى تاقتان تاياتىنىن ايتىپ بەردى

استانا. قازاقپارات - ۋكراينانىڭ ودەسسا قالاسىندا تۇراتىن ۆلاد روسس - جەكە ادامداردىڭ جۇلدىز-جورامالىن قۇراستىرۋمەن عانا ەمەس، ساياسي وقيعالاردى دا بولجاۋمەن تانىلعان استرولوگ.

ول ازاتتىققا جاڭا جىلعا ارنالعان بولجامدارىمەن قاتار رەسەي پرەزيدەنتىنىڭ بيلىگىنە قاتىستى دا ءوز بولجامىمەن ءبولىستى.

«ونى ۇلىقتاۋ ءراسىمى ەشقانداي پروبلەماسىز ءوتتى. جالعىز بىلەتىنىم، زاراتۋشترا زامانىنداعى كۇنتىزبە بويىنشا تۇيە جىلى قايتا اينالىپ سوعاتىن ءار 32 جىل سايىن [رەسەيدە] بيلىكتەگى ادام ورنىنان كەتىرىلەدى.

1921-جىلى، ياعني تۇيە جىلىندا لەنيندى بيلىكتەن ءىس جۇزىندە تايدىرىپ، گوركيگە جىبەردى، ول شامامەن كوكتەمدە - ناۋرىز ايىنان الجاسا باستاعان. وعان 32 جىلدى قوسساق، 1953 جىل شىعادى.

تاعى دا ناۋرىز ايىندا ستالين قايتىس بولدى، مۇمكىن ءوز اجالىنان ەمەس شىعار. ءدىني سەميناردا وقىپ جۇرگەندە «اجالىڭ كىسى قولىنان بولادى» دەگەن بولجامنان كەيىن ول كولەڭكەسىنەن قورقاتىن بولعان.

ەلدىڭ ساياساتى سول ساتتەن باستاپ كۇرت وزگەردى. 1953-جىلعا 32 جىلدى قوسساق، 1985-جىل شىعادى. بۇل جىلى دا ەل ساياساتى كۇرت وزگەرىسكە ۇشىراپ، ناۋرىز ايىندا بيلىككە گورباچيەۆ كەلدى.

وعان 32 جىلدى قوسساق، رەسەي ساياساتى تىعىرىققا تىرەلەتىن 2017-جىل - زاراتۋشترا كۇنتىزبەسى بويىنشا تاعى تۇيە جىلى»، - دەيدى استرولوگ.

سونىمەن بىرگە ۆلاد روسس 2017-جىل پۋتين ءۇشىن ەڭ قاۋىپتى جىل ەكەنىن دە ەسكەرتىپ قويدى.

«ال ناۋرىزدا پۋتيننىڭ بيلىكتە قالۋ-قالماسى بەلگىلى بولادى. ول بيلىككە 1999-جىلى 9- تامىزدا - كۇن تۇتىلعاندا كەلگەندىكتەن، ونىڭ ەكىنشى سيكلى بار. ال 11- تامىزدا كۇن سۇمدىق تۇتىلىپ، بۇكىل ەۋروپاعا كورىنگەن. ول شىنىمەن دە رەسەي تاعدىرىنا ىقپال ەتەتىن كارماسى مىقتى بيلەۋشى. ونىڭ تاعدىرى 18.5 جىلدا شەشىلۋى ءتيىس. ەگەر 1999-جىلدان باستاپ ساناساق، كۇن تۇتىلۋ سيكلى تاعى قايتالاناتىن 2017-جىل شىعادى ەكەن.

ياعني، كۇنتىزبەلىك سيكلدىڭ ەكى كورسەتكىشى بويىنشا، 2017-جىل پۋتين ءۇشىن ەڭ قاۋىپتى جىل ەكەنىن كورەمىز. ارينە، ول ساراي توڭكەرىسىنەن دە قورقۋى ءتيىس، ءتىپتى ومىرىنە قاستاندىق جاسالۋى مۇمكىن. ادەتتە مۇنداي جاعداي اسىرەسە ناۋرىزدا بولادى. نەگە ەكەنى بەلگىسىز، ءبىراق چەرنەنكو دا، ستالين دە ناۋرىزدا قايتىس بولدى، لەنيندى گوركي كەنتىنە ناۋرىزدا جىبەردى.

وسىنداي قىزىق ءۇردىستى بايقاۋعا بولادى. سوندىقتان 2017-جىل رەسەيگە ۇلكەن بەتبۇرىس اكەلەتىن جىل بولماق. ءبىراق، 2016-جىلى پۋتين ءۇشىن تاماشا جىل بولادى. جۇرت كۇتكەندەي ءارى پۋتين ۋادە ەتكەندەي، زامان جاقسارمايدى، كەرىسىنشە، ءبارىنىڭ قيۋى كەتىپ، دوللار باعامى 100 رۋبلگە جەتەدى، مۇناي ارزانداپ، 25 دوللارعا دەيىن قۇلدىرايدى، زەينەتاقى مەن جالاقىنى يندەكستەۋ توقتايدى»، - دەپ ءسوزىن تۇيىندەدى روسس.

«ازاتتىق»