تۇركيا رەسەيدىڭ ۇستىنەن د س ۇ- عا شاعىم بەرمەك

استانا. قازاقپارات - تۇركيا وزىنە قارسى ەكونوميكالىق سانكسيالار ەنگىزگەن رەسەيدىڭ ۇستىنەن دۇنيەجۇزىلىك ساۋدا ۇيىمىنا (د س ۇ) شاعىم تۇسىرمەك.

 بۇل تۋرالى Daily Sabah باسىلىمىنا تۇركيا ەكونوميكا ءمينيسترى مۇستافا ەليتاس ايتقان.

ونىڭ سوزىنشە، قازىر انكارا د س ۇ ەرەجەلەرىن ماسكەۋدىڭ بۇزعانىنا دالەلدەر جيناستىرىپ جاتىر. ولار رەسەي سانكسيالارىنان زارداپ شەككەن تۇرىك كومپانيالارىنىڭ قۇقىقتارىن سوتتا قورعاۋ ءۇشىن پايدالانىلماق.

تۇركيا ەكونوميكا ءمينيسترى ساۋدا- ساتتىق «مورالدىق نەگىزدەرگە» سۇيەنۋى ءتيىس ەكەنىن ايتتى. ورىس ۇكىمەتىنە سەنگەن تۇرىك كاسىپكەرلەرى ول ەلگە اقشا سالعانىن ايتقان ەليتاس رەسەيمەن قارىم- قاتىناستى كەيدە بۇلت پەن جاڭبىرلى، كەيدە كۇن اشىق قۇبىلمالى اۋا رايىمەن سالىستىرعان. رەسەيدىڭ بۇلتتى كۇنگى ءىس- ارەكەتتەرى حالىقارالىق ساۋدا ەرەجەلەرىنە ساي ەمەس دەپ مالىمدەگەن تۇرىك ءمينيسترى.

رەسەيدىڭ تۇركياعا سالعان ەكونوميكالىق سانكسيالارى قاڭتاردىڭ 1-ىنەن باستاپ كۇشىنە ەنگەن. وعان سايكەس، رەسەي تۇركيادان جەمىس- جيدەك، كوكونىس، قۇس ەتىن اكەلۋگە تىيىم سالعان. سونىمەن قاتار تۇرىك كومپانيالارىنىڭ رەسەيدە قۇرىلىس، تۋريزم ءتارىزدى جەكەلەگەن جۇمىستار مەن قىزمەت تۇرلەرىمەن اينالىسۋىنا تىيىم سالىنعان.

رەسەي مەن تۇركيانىڭ قارىم- قاتىناسى بىلتىر 24 - قاراشادا تۇركيالىق اسكەري- اۋە كۇشتەرى سيريامەن شەكارادا رەسەيدىڭ س ۋ-24 بومبالاۋشى ۇشاعىن اتىپ تۇسىرگەن سوڭ ناشارلاعان. انكارا ۇشاق ەلدىڭ اۋە كەڭىستىگىن بۇزدى دەيدى. ماسكەۋ ونى جوققا شىعارادى.

«ازاتتىق»