مەندەلەيەۆ كەستەسىنە جاڭا ءتورت ەلەمەنت ەنگىزىلدى

استانا. قازاقپارات - مەندەلەيەۆ كەستەسى رەتىندە بەلگىلى حيميالىق ەلەمەنتتەردىڭ پەريودتىق جۇيەسىنە جاڭا ءتورت ەلەمەنت ەنگىزىلدى.

بۇل ءتورت ەلەمەنتتىڭ ءبارى بۇدان بىرنەشە جىل بۇرىن اشىلعان بولاتىن، الايدا ساراپتاماشىلارعا مالىمەتتەردى قايتا تەكسەرۋگە ۋاقىت قاجەت بولدى. ەندى كەستەنىڭ جەتىنشى قاتارى تۇگەل تولتىرىلدى، دەپ حابارلادى BBC.

113، 115، 117 جانە 118- نومىرلەردى يەلەنگەن جاڭا ەلەمەنتتەردىڭ ازىرگە تۇراقتى اتاۋى جوق. عالىمدار ولاردى كەيىنىرەك ويلاپ تاپپاق. ءتورت ەلەمەنتتىڭ ءبارى دە اسا اۋىر ەلەمەنتتەرگە جاتادى.

115، 117 جانە 118- ەلەمەنتتەردى العاشقى اشۋشىلار بولىپ رەسەيلىك جانە امەريكاندىق عالىمداردان قۇرىلعان حالىقارالىق زەرتتەۋ توبى تانىلدى.

بۇل توپ 113- ەلەمەنتتى دە العاشقى اشۋشى قۇقىعىن يەلەنۋگە ۇمىتكەر بولدى، الايدا قورىتىندىسىندا ساراپشىلار بۇل اشىلىمدى جاپونيا عالىمدارىنا بەكىتتى.

سوڭعى رەت حيميالىق ەلەمەنتتەردىڭ پەريودتىق جۇيەسىىنە وزگەرىستەر 2011-جىلى ەنگىزىلگەن بولاتىن. سول كەزدە وعان 114- جانە 116- ەلەمەنتتەر قوسىلدى.