ەركە ەسماحاننىڭ اعاسى قارىنداسى تۋرالى بار سىردى اقتارىپ سالدى
قازىر «اللو» انىمەن كوپتىڭ ىقىلاسىنا بولەنىپ جۇرگەن ەسترادا جۇلدىزىنىڭ تانىمالدىعىنا اناسىنىڭ دۇعاسى سەبەپ بولۋى مۇمكىن.
«مەنىڭ ەسىمدە، انام ەركەگە اياعى اۋىر بولعان كەزدە اقتوبە وبلىسىنىڭ ىرعىز اۋدانىندا تۇردىق. انامىز «قىزىمدى ءانشى قىلىپ وسىرەمىن» دەپ ءىشىن الاقانىمەن اينالدىرىپ، «ايشا ءبيبى» ءانىن ايتاتىن ەدى. دىندە انانىڭ بالاعا جاساعان باتاسى پايعامباردىڭ باتاسى سياقتى دەلىنەدى. مۇمكىن، اللا انامنىڭ قىزىنا دەگەن جۇكتى كەزىندەگى دۇعاسىن قابىل ەتكەن شىعار. قازىر ەركە ءوز كورەرمەندەرىنىڭ قوشەمەتىنە بولەنىپ جۇرگەن انشىلەردىڭ ءبىرى. «ايشا ءبيبى» ءانى دە ەركەنىڭ اۆتورلىعىندا تۇر. العاشقى بەينەباياندى دا «ايشا ءبيبى» انىنە جاسادى»، - دەيدى ءانشىنىڭ اعاسى باۋىرجان ەسماحان.
ەركەنىڭ ونەرگە جولدان قوسىلماعانىن ايتقان اعاسى وتباسىنىڭ كەنجەسى ەركە بولسا دا، ەڭبەكقور بولدى دەيدى.
«ەركە اۋىلدا تۇرعان كەزدە مۋزىكا مەكتەبىندە وقىدى. اقتوبەگە كەلگەندە مۋزىكالىق ۋچيليشەنى ءبىتىردى. ول ونەرگە جارتى جولدان قوسىلعان جوق. الماتىعا بارعان كەزدە دە كونسەرۆاتوريادا ءبىلىم الدى. ونەردىڭ بارلىق ساتىلارىنان ءوتىپ كەلەدى. كەيبىرەۋلەر قاراجات جيناپ الىپ، ورتا جولدان قوسىلىپ كەتەدى. مەن قارىنداسىمنىڭ اشىق- شاشىق شىعىپ، ونەر كورسەتپەيتىنىنە قۋانامىن. شوۋ بيزنەستىڭ ءوز جولى بار شىعار. مەن باسقالاردى سىنامايمىن، اركىمنىڭ بولەك باعىتى بار. ءبىراق مەنىڭ قارىنداسىم ءبىرىڭعاي قازاقى، حالىقتىڭ اندەردى ايتادى»، - دەيدى قارىنداسىنىڭ جەتىستىگىنە كوڭىلى تولعان اعاسى.
ەركە ءوزىنىڭ وتباسى تۋرالى Instagram پاراقشاسىنا ءجيى جازىپ تۇرادى. ول ءۇيىنىڭ كەنجەسى. وزىنەن ۇلكەن ەكى اپكەسى مەن ەكى اعاسى بار. اكەسى ءابدىراش قازاق ءتىلى قوعامىنىڭ ءتوراعاسى، كىشى اعاسى وبلىستىق ءدىن ىستەر باسقارماسىنىڭ باسشىسى.
«ەركە اتىنا زاتى ساي ەركە قىز. سونىڭ ىشىندە ماعان كوبىرەك ەركەلەيدى. جەكە ومىرىنە بايلانىستى دا سىرىن ايتادى. ءدىن جولىندا بۇل ارەكەتىم اسىرا سىلتەۋشىلىك بولماي ما، قاتە بولماي ما نەمەسە ساۋاپ جاساعىم كەلەدى، قانداي نارسەلەرگە بارعانىم دۇرىس دەپ اقىلداسىپ تۇرادى. انامنىڭ جۇكتى كەزىندەگى ارمانى مەن «ايشا ءبيبى» ءانىنىڭ بەينەبايان بولىپ شىققانعا دەيىنگى ءومىرىن قاراسام، انامنىڭ دۇعاسى مەن قارىنداسىمنىڭ جەتىستىگىندە بايلانىس بار. وتباسىمىزدا ەركەنىڭ ونەردەگى جەتىستىكتەرىنە قاتتى قۋاناتىن انام»، - دەيدى ەركە ەسماحاننىڭ اعاسى.
ەركەنىڭ اعاسى باۋىرجان ەسماحان دا «ادامداردىڭ اراسىندا جۇرگەن جاقسى ەكەن» دەپ اۆتوبۋستا جاساعان سەلفيىمەن قازنەتتىڭ جۇلدىزىنا اينالعان بولاتىن.
