ورالدا ۇلتتىق ۇلان جاۋىنگەرلەرى كىسى توناۋشىنى قولعا ءتۇسىردى

ورال. قازاقپارات - قۇرامىندا ەفرەيتور داۋرەن جاقانباي، قاتارداعى جاۋىنگەرلەر نۇربولات تولەۋبەك، بيجان تولەگەنوۆ بار اسكەري توپ ورال قالاسى كوشەسىندە قىراعىلىق تانىتىپ، كىسى توناۋشىنى قولعا ءتۇسىردى.

ق ر ۇلتتىق ۇلانى «باتىس» وڭىرلىك قولباسشىلىعىنىڭ باسپا ءسوز قىزمەتىنەن تۇسكەن مالىمەتكە قاراعاندا، اتالمىش توپ 1 -قاڭتار كۇنى ساعات 20.40 شاماسىندا «سۇڭقار» اۋدانىنداعى وبلىستىق قان ورتالىعى جانىندا قاتتى ۇرسىسىپ، توبەلەسكە كىرىسكەن 25-30 جاستاعى ەر مەن ايەلدى كورەدى. بۇلار قوعامدىق ءتارتىپتى بۇزۋشىلارعا ەسكەرتۋ جاساعان كەزدە جەڭىل دارەجەدەگى ماس كۇيىندە جۇرگەن الگىلەر اسكەري قىزمەتكەرلەردى بالاعاتتايدى. وسى مەزگىلدە ەر ادام اۋزىنان ۇستارانى شىعارىپ، ءوز موينىن كەسىپ جىبەرەدى. سول ساتتە ۇلتتىق ۇلان جاۋىنگەرلەرى قويان-قولتىق ۇرىس تاسىلدەرىن قولدانىپ، ءتارتىپ بۇزۋشىنى ۇستاپ، جەدەل جاردەم شاقىرادى. العاشقى مەديتسينالىق جاردەم كورسەتىلگەننەن كەيىن ەر ادام قالالىق ىشكى ىستەر باسقارماسى قىزمەتكەرلەرىنىڭ قاراۋىنا بەرىلدى.

كەيىن انىقتالعانىنداي، ۇستالعان ادام بۇرىن سوتتالعان 1986 -جىلعى ساياسات حاۋتين بولىپ شىقتى. 2015 -جىلعى قاراشادا تۇرمەدەن بوساتىلعانىمەن، كىسى توناعانى ءۇشىن ىزدەۋدە ءجۇر ەكەن. قازىرگى كەزدە ونى قوعامدىق ورىندا ماس كۇيىندە جۇرگەنى جانە كىسى توناۋعا قاتىستى كۇدىكتى رەتىندە قىلمىستىق ىسكە تارتۋ ءۇشىن ماتەريال جيناقتالۋدا.

باتىل ءىس-ارەكەتى جانە قىراعىلىعى ءۇشىن ەفرەيتور د. جاقانباي، قاتارداعى جاۋىنگەرلەر ن. تولەۋبەك، ب. تولەگەنوۆ ىنتالاندىرۋعا ۇسىنىلدى.

اۆتور: ەلجان ەرالى