الەۋمەتتىك جەلىنىڭ پايدالى، پايداسىز تۇستارى
بۇل قىزمەت قىزىعۋشىلىقتارى سايكەس كەلەتىن توپتاردىڭ بىرىگۋىنە مۇمكىندىك بەرەدى. بۇرىنعى سىنىپتاستارىن تاۋىپ الادى، جاڭا ادامدارمەن دوستاسادى، سولارمەن پىكىر الماسا وتىرىپ كوپ ۋاقىتىن وسى جەلىدە وتكىزەدى.
الەۋمەتتىك جەلىنىڭ پايدالى جانە زالالدى تۇستارى بار. پايدالى تۇستارىنا كەلسەك، ول قاشىقتاعى باسقا قالاداعى، الىس ەلدەگى ادامدارمەن، تانىستارىڭىزبەن جەدەل تىلدەسۋگە وڭتايلى قۇرال. ءوزارا پىكىر عانا الماسىپ قويماي، ومىرىندەگى جاڭالىقتارىمەن، سۋرەتتەرىمەن بولىسەدى. ينتەرنەتتەگى قىزىقتى جاڭالىق، سايتتار، كىتاپتار، كينولاردىڭ سىلتەمەلەرىن ۇسىنادى.
الەۋمەتتىك جەلى ارقىلى تانىسىپ، وتاۋ قۇرىپ جاتقاندار از ەمەس، وسى قۇرالدى پايدالانىپ جۇمىس ىزدەۋ، تابۋ دا جەڭىلدەدى...
ەندى زالالدى دەگەن تۇستارىنا توقتالا كەتسەك. كەي ادامداردار ۆيرتۋالدى ومىردەگى تانىستىققا بەرىلىپ كەتكەندىگى سونشالىقتى، وتباسى مۇشەلەرىمەن، ارىپتەستەرىمەن، دوستارىمەن از تىلدەسىپ، ولاردى ءتىپتى بايقاماي قالۋى مۇمكىن. وسىعان قاتىستى جاعدايدى مىنا ءازىل ءدوپ بەرەدى. «بۇگىن جارىق ءوشىپ قالدى، وتباسىمىزبەن بىرگە وتىرىپ اڭگىمەلەستىك، تۋىستارىم جاقسى كىسىلەر ەكەن»، دەپتى بىرەۋ...
كەيبىر جاستاردىڭ كوپ ۋاقىتى جەلىدە وتكەن سوڭ، جۇمىسى، وقۋى كەيىنگە قالىپ اقساي باستايدى. وسىدان باس تارتىپ، ۋاقىتىن ۇنەمدەي الۋ، تاۋەلدىلىكتەن ارىلۋ جەلى پايدالانۋشىسىنا وڭايعا سوقپايدى. بۇل دا ادامنىڭ ءوزىن ءوزىن ۇستاۋىنا، جەكە تاربيەسىنە، تارتىبىنە بايلانىستى.
جەلىنى پايدالانۋشىلار دا بىركەلكى ەمەس. ولاردىڭ اراسىندا نەگاتيۆ تاراتۋشى، ومىردەن تۇڭىلگەندەر از كەزدەسپەيدى. سوندىقتان الەۋمەتتىك جەلىنى ولشەمدى پايدالانىپ، وسى قۇرال ۇسىناتىن پايدالى جاقتارىن ءوز قاجەتىمىزگە جاراتۋعا بەيىم بولۋ كەرەك دەيدى، تاجىريبەلى پايدالانۋشىلار.
دوستاردىڭ بولىسكەن پايدالى كەڭەستەر، جازبالار، سىلتەمەلەرىن ەگەر ءوزىڭىز ۋاقىت جۇمساپ ىزدەسەڭىز قانشاما كۇننىڭ سارپ بولاتىنىن ەسەپتەپ شىعۋ قيىن ەمەس. ايتالىق، دوسىڭىز سىلتەمەسىن بولىسكەن قىزىقتى كىتاپتىڭ، كينونىڭ دۇنيەدە بار- جوقتىعىنان بەيحابار بولعاندىعىڭىزدى ەسكە الساڭىز دا جەتكىلىكتى. بۇل - الەۋمەتتىك جەلىنىڭ جاقسى تۇستارىنىڭ ءبىرى. ونىڭ ءبىلىمدى- بىلىكتى جەتىلدىرۋگە، وقۋعا باعىتتاۋ - ءبىزدىڭ مىندەتىمىز.
الەۋمەتتىك جەلى - كوممۋنيكاتسيا قۇرالى. الايدا بىزگە نەگە ەتەنە جاقىن بولىپ شىقتى؟ نەسىمەن باۋراپ الدى؟ سويتسەك ونىڭ استارىندا دا تەرەڭ پسيحولوگيالىق رەڭك بار بولىپ شىقتى.
مىسالى، وسى ماسەلەنى زەرتتەۋشى رەسەيلىك عالىم الەكساندر پروحوروۆتىڭ زەرتتەۋىنە قاراساق، ءتۇرلى الەۋمەتتىك جەلىنى قولدانۋدى امەريكالىق پسيحولوگ ماسلوۋدىڭ سۇرانىس پيراميداسى ارقىلى قاراستىرۋعا بولادى. ولاردىڭ قاتارىندا، ادامنىڭ پىكىر ايتۋى، ءوزىن تانىتۋى، وزگەلەرگە سىيلاتا ءبىلۋى، وزىنە سەنىمدى بولۋى، دوستاردىڭ بولۋى، تۋىستىق قاتىناس، سىيلاستىق، قاۋىپسىزدىك تاعىسىن تاعى دەپ جالعاستىرا بەرۋگە بولادى. ياعني، الەۋمەتتىك جەلى تەك قاتىناس قۇرالى عانا ەمەس، ادامنىڭ وزىندىك كەلبەتىن قالىپتاستىرۋ، ءوزىن وزگەلەرگە تانىتۋ جانە جۇرتپەن بىلەتىنىن ءبولىسۋ الاڭى. سونىسىمەن دە قۇندى. ەندەشە ونى جاقسى تۇستارىن قاجەتىنە جاراتۋ اركىمنىڭ ءوز ەركىندەگى دۇنيە ەكەندىگىن كورەمىز.
بەك قاراشا
