بەس جىل بويى جۇلدەسىز قالماعان «استانا ارلاندارىنىڭ» الداعى ايقاستارى قالاي بولماق؟
ءتۇرلى جوبالار ىسكە اسىرىلىپ، بوكسشىلاردى ءار قىرىنان تانىپ جاتىرمىز. سول جوبالاردىڭ ءبىرى وسىدان بەس جىل بۇرىن باستاۋ العان AIBA نىڭ ۇيىمداستىرۋىمەن ءوتىپ كەلە جاتقان بۇكىلالەمدىك بوكس سەرياسى (WSB) جوباسى.
بۇل جوباعا قازاقستان العاشقى جىلدان باستاپ، «استانا ارلاندارى» دەگەن اتاۋمەن جاڭا قۇراما جاساقتاپ، جىل سايىن قاتىسىپ كەلەدى. جاي قاتىسىپ قانا جۇرگەن جوق. قازاق بوكسشىلارىنىڭ شەبەرلىگىن بۇكىل الەمگە پاش ەتىپ، بەس جىل بويى تەك ۇزدىكتەر قاتارىنان كورىنىپ كەلەدى.
ايتالىق، «استانا ارلاندارى» بەس جىلدىڭ ىشىندە ءۇش رەت فينالدا ونەر كورسەتتى. ەكى دۇركىن WSB جوباسىنىڭ چەمپيونى اتاندى. مۇنداي اتاققا بەس جىلدىڭ ىشىندە ءبىزدىڭ «ارلانداردان» باسقا بىردە-ءبىر كوماندا قول جەتكىزە العان جوق. وسىدان-اق، قازاق بوكسىنىڭ الەۋەتى قانشالىق مىقتى ەكەنىن اڭعارۋ قيىن ەمەس.
ەندى «ارلاندارىمىزدىڭ» وسى بەس جىلداعى قول جەتكىزگەن جەتىستىكتەرىنە قىسقاشا توقتالىپ وتەيىك. العاشقى جىلى ءبىزدىڭ جىگىتتەر قارسىلاستارىنىڭ بارلىعىن قوعاداي جاپىرىپ كەلىپ، تەك فينالدا جەڭىسكە سىنىق سۇيەم جەتپەي ءسۇرىندى. وسىلايشا ءبىرىنشى جىلى كۇمىس جۇلدەنى قاناعات تۇتتى. ال ەكىنشى ماۋسىمدا دا توپتىق كەزەڭدەردە قارسىلاس شاق كەلتىرمەي، تەك جارتىلاي فينالدىق سايىسقا جەتكەندە قارسىلاستارىنا ەسە جىبەرىپ الدى. ءۇشىنشى ماۋسىمدا، ياعني 2013 -جىلى جەرلەستەرىمىزدىڭ كوپتەن كۇتكەن ارمانى ورىندالىپ، بۇكىلالەمدىك بوكس سەرياسىنىڭ باس جۇلدەسىن قانجىعاسىنا بايلادى. ءتورتىنشى ماۋسىمدا جەڭىس تۇعىرىنىڭ ەڭ بيىك ساتىسىنان كورىنبەسە دە ۇزدىك ۇشتىككە ىلىنە الدى. ال وتكەن جىلعى بەسىنشى ماۋسىمدا 2013 -جىلعى جەتىستىگىن قايتالاپ، بۇكىلالەمدىك بوكس سەرياسىنىڭ تاريحىنداعى تۇڭعىش 2 دۇركىن چەمپيون اتاندى.
مىنە، ءبىزدىڭ مىقتى جىگىتتەرىمىز وسىلاي قازاق ەلىن جەڭىستى جولدارىمەن الەمگە پاش ەتىپ كەلەدى. ەندى، 6 -ماۋسىم تۇندىگىن تۇرۋگە جاقىن. جاڭا ماۋسىمنىڭ العاشقى جەكپە- جەكتەرى قاڭتار ايىندا قاراعاندى وبلىسىنان باستاۋ الماق.
قازىر «استانا ارلاندارى» اقبۇلاقتا جاڭادان اشىلعان جاتتىعۋ زالىندا دايىندىق جۇمىستارىن جۇرگىزىپ جاتىر.
جاقىندا AIBA ۇيىمداستىراتىن WSB جوباسى 2016 -جىلعى ماۋسىمىنىڭ جەرەبەسى تارتىلىپ، قاي كوماندا قانداي توپتا ونەر كورسەتەتىنى دە بەلگىلى بولدى. بيىل قازاقستاندىق «استانا ارلاندارى» D توبىندا ونەر كورسەتەدى.
ءبىزدىڭ توپتا ازەربايجاندىق «باكۋ وتتارى»، وزبەكستان قۇراماسى جانە پۋەرتو-ريكو بوكسشىلارى بار. بىردەن ايتا كەتەيىك، وزبەكستان قۇراماسى بۇل جوباعا بيىل ءبىرىنشى رەت قاتىسقالى وتىر. سونداي- اق، وسى جوباداعى ەڭ مىقتى كوماندا قازاقستاندىق «استانا ارلاندارىمەن» ءبىر توپتا جۇدىرىقتاسپاق. WSB اياسىندا ءبىرىنشى رەت باقتارىن سىناعالى وتىرعان كورشىلەرىمىز قانداي كوماندا جاساقتاعانىن الداعى ۋاقىتتا شارشى الاڭ كورسەتەتىن بولادى. قالعان قارسىلاستارىمىزدىڭ بارلىعى ءبىزدىڭ جىگىتتەرىمىزگە اسا تاڭسىق ەمەس.
«ارلاندار» العاشقى كەزدەسۋىن 23 -قاڭتاردا ءوز الاڭىندا «باكۋ وتتارىمەن» وتكىزەدى. 6 -اقپاندا پۋەرتو ريكوعا بارادى. ال 20 -اقپاندا تاشكەنتكە بيىلعى ماۋسىمنىڭ جاڭا مۇشەلەرى وزبەك بوكسشىلارىمەن جۇدىرىقتاسادى. 4 -ناۋرىزدا باكۋدە جەرگىلىكتى بوكسشىلارمەن رينگكە شىعادى. ال 19 -ناۋرىزدا پۋەرتو ريكو بوكسشىلارىن ءوز شارشى الاڭىندا قابىلدايدى. توپتاعى سوڭعى ماتچتى قازاقستاندا 2 -ساۋىردە وزبەكستان بوكسشىلارىنا قارسى وتەدى.
ەندى بۇكىلالەمدىك بوكس سەرياسىندا ەل نامىسىن قورعايتىن «استانا ارلاندارى» كاسىبي بوكس كلۋبىنىڭ بوكسشىلار قۇرامى مەن كلۋبتىڭ باپكەرلىك قۇرامىنداعى وزگەرىستەرگە كەلەيىك.
جاڭا قۇرام بويىنشا ەندى 49 كەلى سالماقتا «استانا ارلاندارى» اتىنان تەمىرتاس ءجۇسىپوۆ، ماردان بەرىكبايەۆ جانە جومارت ەرجانعا ءۇمىت ارتاتىن بولامىز. 52 كەلىدە ولجاس ساتتىبايەۆ، ازات ماحمەتوۆ، ميراس جاقىپوۆتار ەل نامىسى ءۇشىن بارىن سالاتىن بولادى.
مەيىربولات تويتوۆ، نۇرسۇلتان كوشەعۇلوۆ جانە نۇربول قالجانوۆ 56 كەلى سالماقتا استانالىق كلۋبتىڭ ابىرويىن اسىرماق. 60 كەلىدە زاكير سافيۋللين، ەرجان مۋسافيروۆ، بەكداۋلەت يبراگيموۆ، 64 كەلىدە سامات باشەنوۆ، اسحات ءۋاليحانوۆ، سابىرجان بەكبەرگەنوۆتارعا سەنىم ارتاتىن بولامىز.
اسلان شىمبەرگەنوۆ، قاناعات مارالوۆ، بەكزات حالمەتوۆ 69 كەلى سالماق بويىنشا، مەيىرىم نۇرسۇلتانوۆ، رۋستام سۆايەۆ جانە ەرىك ءالجانوۆ 75 كەلى سالماق بويىنشا ەل نامىسىن قورعايتىن بولادى. نۇرداۋلەت جارمانوۆ، ءالي احمەدوۆ، ارمان رىسبەك 81 كەلىدە، مۇجامەتجان ەركىن، راحمان ءالجانوۆ 91 كەلى بويىنشا ونەر كورسەتپەك. ال اسا اۋىر توقسان ءبىر كەلىدەن جوعارى سالماقتا قامشىبەك قونقابايەۆ، نۇرجان بەكزاتوۆ، نۇرسۇلتان امانجولوۆ سەكىلدى بىلعارى قولعاپ شەبەرلەرىنە ءۇمىت ارتاتىن بولامىز.
ال، بيىلعى جاڭا ماۋسىمدا نۇرلان اقۇرپەكوۆ اتالمىش بوكس كلۋبىنىڭ باس باپكەرى بولىپ ىسكە كىرىسپەك. مىرزاعالي ايتجانوۆ، الەكساندر سترەلنيكوۆ، نۇرعالي سافيۋللين، بەيبىت ەسجانوۆ، نۇركەن انداسوۆ، ەرمەك ەرتايەۆ، بولات ءجۇمادىلوۆ جاتتىقتىرۋشى قۇرامدا جوعارىداعى بوكسشىلاردىڭ شەبەرلىگىن شىڭداۋعا كىرىسەدى.
«استانا ارلاندارىنىڭ» بيىلعى نەگىزگى ماقساتى - ءۇشىنشى مارتە WSB سەرياسىندا چەمپيون اتانۋ. جەرلەستەرىمىزدىڭ بيىكتەردەن كورىنۋىنە تىلەكتەسپىز.
كۇنسۇلتان وتارباي
