رەسەيدە شەنەۋنىكتەردىڭ ايەلدەرى مەن بالالارىنا بيزنەسپەن اينالىسۋعا تىيىم سالۋدى ۇسىنۋدا

استانا. قازاقپارات - ر ف مەملەكەتتىك دۋماسىنىڭ كونستيتۋتسيالىق كوميتەتى ءتوراعاسىنىڭ ورىنباسارى ۆاديم سولوۆيەۆ جوعارى لاۋازىمدى شەنەۋنىكتەردىڭ، مينيسترلەردىڭ، گۋبەرناتورلار جانە ايماقتىق پارلامەنت باسشىلارىنىڭ ايەلدەرى مەن بالالارىنا بيزنەسپەن اينالىسۋلارىنا تىيىم سالاتىن زاڭ جوباسىن ازىرلەۋدە، دەپ حابارلادى www.centralasian.org.

ر ي ا نوۆوستي اگەنتتىگىنە بەرگەن سۇحاتىندا سولوۆيەۆ: «ءبىز باس پروكۋروردىڭ بالالارىنىڭ بيزنەسىنە بايلانىستى جايتتاردى ساراپتادىق جانە وعان دەيىنگى ءبىرقاتار گۋبەرناتورلاردىڭ ايەلدەرى مەن بالالارىنىڭ بيزنەسپەن بەلسەندى شۇعىلدانعانىنان تۋعان وقيعالاردى ەلەكتەن وتكىزدىك. ءبىز مەملەكەتتىك قىزمەت تۋرالى زاڭعا ەكى تۇزەتۋ ەنگىزۋ قاجەت دەگەن قورىتىندىعا كەلدىك»، - دەدى.

سولوۆيەۆتىڭ سوزىنشە، ءبىرىنشى تۇزەتۋ پرەزيدەنتتىڭ ءوزى نەمەسە ونىڭ ۇسىنىسى بويىنشا وزگە بيلىك ورگاندارى تاعايىندايتىن جوعارى لاۋازىمدى تۇلعالاردىڭ ايەلدەرى مەن بالالارىنا بيزنەسپەن شۇعىلدانۋلارىنا تىيىم سالۋدى كوزدەيدى. سونىمەن بىرگە جالعان اجىراسۋ جولىمەن بۇل تالاپتاردى بۇزباق بولعاندارعا شامامەن ءبىر ميلليون رۋبل ايىپپۇل تولەتىپ جانە جۇمىستان بوساتۋ قاراستىرىلعان.