ءىلياس جانسۇگىر ۇلىنىڭ وتباسىمەن تۇسكەن سوڭعى سۋرەتى

 «كورەمىز ءبارىن داعى جولداعىنىڭ، بىرەر كۇن از دا بولسا ءوتتى مەيلى!..

فاتيما، ەركەلەتىپ ازاتىمدى،

ءسۇيىپ قوي، اعاسى ءۇشىن ءۇمىتايدى!"

ءىلياس جانسۇگىر ۇلى.

1934 -جىل.

قازاق جۇرتىنىڭ ساۋاتىن اشامىن، ساناسىن قۇلدىقتان ازات ەتەمىن دەپ ءجۇرىپ تار جول، تايعاق كەشكەن زيالىلارىمىزدىڭ ءبىرى ءىلياس جانسۇگىر ۇلىنىڭ مىنا جالعاندا تالاي قيىندىقتى باستان وتكەرىپ، ستالين جانە ونىڭ باسكەسەرلەرىنەن كورمەگەنى جوق.

ءار ءتۇرلى جينالىستاردا "جانسۇگىروۆتى تانىستىرىپ جاتۋدىڭ ءوزى ارتىق" دەپ ايتىپ جاتامىز. ال شىنىنا كەلگەندە ءبىز ءىلياستى ءالى دە بولسا تانىمايمىز. ول نەلىكتەن تەرگەۋگە ءتۇستى، نە ءۇشىن ايدالدى، قاي شىعارمالارى ءۇشىن اتىلدى، بىلمەيمىز. ءالى كۇنگە دەيىن مەكتەپ وقۋلىقتارىندا، ءتىپتى جوعارعى وقۋ ورىندارىنىڭ قابىرعاسىندا دا بۇعان قاتىستى جايتتار اشىق، انىق ايتىلماي كەلەدى. بۇل ءوز الدىنا ۇلكەن تراگەديا...

وسى رەتتە ءىلياس اتامىزدىڭ وتباسىمەن تۇسكەن سوڭعى سۋرەتىن جاريالاپ وتىرمىن. ءبىراق ءبىر نارسەنى ەسكەرىڭىزدەر، مەن جاڭالىق اشايىن دەپ وتىرعان جوقپىن. سۋرەتتى ويدا- جوقتا ورىس تىلىندەگى سايتتاردىڭ بىرىنەن كەزدەستىردىم. تەك وسى كوزگە تۇسكەن دۇنيەنى وزگەلەرمەن بولىسسەم، ولار دا وقىپ- بىلسە دەگەن وي. ولاي بولسا مەن ەستەلىكتەگى كىسىلەردى تانىستىرىپ وتەيىن.

ءىلياس جانسۇگىر ۇلى 1937 -جىلى 3- مامىر كۇنى وتباسىن جيناپ ارنايى سۋرەتكە تۇسەدى. ءيا، جوعارىدا ايتىپ وتكەنىمىزدەي، بۇل اقىننىڭ جاقىندارىمەن تۇسكەن سوڭعى سۋرەتى. سول جاقتا وتىرعان ايەل - فاتيما عابيت قىزى (اقىننىڭ جۇبايى) . ونىڭ قولىنداعى قىز - يلفا ءىلياس قىزى (ءىلفا دەپ الساق تا بولاتىن شىعار، سەبەبى بۇل ەسىم ءىلياس پەن فاتيما ەسىمدەرىنەن قۇرالعان) . ال ءىلياستىڭ قولىنداعى بالا - قىزى ءۇمىت. ءۇمىتتىڭ قاسىندا وتىرعان ەر بالا - ازات سۇلەيەۆ. فاتيما مەن ءىلياس جانسۇگىر ۇلىنىڭ ورتاسىندا تۇرعان جاس بالا - جانىبەك سۇلەيەۆ. جانىبەكتىڭ قاسىندا تاقيا كيگەن جىگىت - بولات تاشەنوۆ. شەتتە وتىرعان ايەل كۇپپىجامال. ونىڭ ارتىندا تۇرعان ءۇي قىزمەتشىسى.

ەندى بۇل كىسىلەرمەن قىسقاشا تانىسىپ ءوتۋ ماقساتىندا تومەندەگى كەستەگە نازار اۋدارايىق:

اتى- ءجونى:

قىسقاشا مالىمەت:

فاتيما عابيت قىزى

ءىلياس جانسۇگىر ۇلىنىڭ جۇبايى. 1903-1968 -جىلدار ارالىعىندا ءومىر سۇرگەن. قازاق ءتىلى مەن ادەبيەتى پانىنەن ساباق بەرگەن. ءبىراق بۇل ايەلدىڭ مىنا جالعاندا كورگەن ازاپتارى تۋرالى ايتۋ وتە اۋىر...

يلفا ءىلياس قىزى

1935 -جىلى تۋعان. ءمۇعالىم، نەمىس ءتىلىن جەتىك مەڭگەرگەن. قازىر الماتى قالاسىندا تۇرىپ جاتىر.

ءۇمىت ءىلياس قىزى

1933 -جىلى تۋعان. ماماندىعى دارىگەر.

ازات سۇلەيەۆ

 1930-1997 -جىلدارى اراسىندا ءومىر سۇرگەن. ازات اعىلشىن، نەمىس، فرانسۋز تىلدەرىن جەتىك مەڭگەرگەن. جانىبەك ەكەۋى زيالى ءبىلال سۇلەيەۆتىڭ ۇلدارى.

جانىبەك سۇلەيەۆ

1923-1943 -جىلدارى اراسىندا ءومىر سۇرگەن. ەكىنشى دۇنيەجۇزىلىك سوعىستا قازا تابادى.

بولات تاشەنوۆ

ءىلياس جانسۇگىر ۇلىنىڭ جيەنى، عالىم كىسى. دىنمۇحاممەد احمەت ۇلى قونايەۆپەن ماسكەۋدە بىرگە وقىعان. قيىن شاقتاردا ءىلياستىڭ وتباسىنا قارايلاسىپ وتىرعان.

كۇپپىجامال

فاتيمانىڭ اناسىنىڭ ءسىڭلىسى.

ءىلياس (قاسىندا بەيىمبەت مايلين دە بولعان) 1938 -جىلى 26 اقپان كۇنى اتىلىپ كەتەدى. ن ك ۆ د- نىڭ باسكەسەرلەرى ۇيلەردى قيراتىپ، مايىتتەردى سوندا قالدىرىپ كەتكەن. دەرەككە سەنسەك، الماتى وبلىسى، ىلە اۋدانى، جاڭالىق اۋلىنا جاقىن جەردە  4500 ادام ءولىم قۇشقان.

ەلىم دەپ وتكەن اسىل ەرلەرىمىزدىڭ جاتقان جەرى جايلى، توپىراعى تورقا بولسىن. بابالارىمىز كورگەن زوبالاڭدى بىزدەر، ءبىزدىڭ ۇرپاعىمىز كورمەسىن. اللادان وزگەگە الاش قۇل بولماسىن! 

bitanazamat.kz