تۇرعىن ءۇي قۇرىلىس جيناق بانكى وپەراتسيالارىن ۋاقىتشا توقتاتاتىنىن حابارلادى

استانا. قازاقپارات - تۇرعىن ءۇي قۇرىلىس جيناق بانكى كليەنتتەرىنە قىزمەت كورسەتۋدىڭ جاڭا دەڭگەيىنە شىققانىن حابارلادى.

«كليەنتتەرگە قىزمەت كورسەتۋ ساپاسىن ارتتىرۋ ماقساتىندا بانكتە زاماناۋي Colvir Banking System جۇيەسى ەنگىزىلەدى. بانك وپەراتسيالارى ەندى جىلدام جۇزەگە اسىرىلاتىن بولادى، ال الداعى ۋاقىتتا Colvir جاڭا قىزمەتتەردى ەنگىزۋگە جول اشادى»، - دەلىنگەن بانكتىڭ باسپا ءسوز قىزمەتىنىڭ حابارلاماسىندا.

قازاقستانداعى قارجى ترانزاكتسياسىنىڭ %70 Colvir ۇلەسىندە. Colvir ەلدىڭ كوپتەگەن ءىرى بانكتەرى مەن قارجى مەكەمەلەرىندە ورناتىلدى. سونىمەن بىرگە ول ق ر ۇلتتىق بانكتىڭ رەزەرۆتىك جۇيەسى.

جاڭا بانك جۇيەسىن ەنگىزۋ جۇمىستارى 2015 -جىلدىڭ 31 -جەلتوقسانىنان 2016 -جىلدىڭ 9 قاڭتارىنا دەيىن جۇرگىزىلەدى. وسىعان بايلانىستى، بۇل مەرزىمدە بانك كەلەسى وپەراتسيالاردى جۇزەگە اسىرمايدى:

- كاسسالار، تولەم تەرمينالدارى ارقىلى جۇرگىزىلەتىن كىرىس وپەراتسيالارى؛

 - تۇرعىن ءۇي قۇرىلىسجيناقتارى تۋرالى شارتتار جاساۋ؛

- نەسيە وتىنىشتەرىن قابىلداۋ؛

- قارىز بەرۋ؛

- پوستدەپوزيتتىك وپەراتسيالار؛

- پوستنەسيەلىك وپەراتسيالار.

11 -قاڭتاردان پوستدەپوزيتتىك جانە پوستنەسيەلىك وپەراتسيالاردان باسقالارى قايتا ىسكە قوسىلادى. ال پوستدەپوزيتتىك جانە پوستنەسيەلىك وپەراتسيالار 2016 -جىلدىڭ 1 -اقپانىنان جۇزەگە اسىرىلا باستايدى.

تۇرعىن ءۇي قۇرىلىس جيناقتارى تۋرالى شارتتاردىڭ تالاپتارىن وزگەرتۋ بويىنشا وپەراتسيالار سالىمشىلاردىڭ جيناق شوتىنا 2015 -جىلعى مەملەكەتتىك سىياقى تولەنبەي تۇرىپ جاسالمايدى.