الەم اپتا ىشىندە: الەم جۇرتشىلىعى جاڭا جىلدى قارسى الدى
سيدنەيدەن باستاپ نيۋ-يورككە دەيىنگى ارالىقتى مەكەندەگەن بارشا الەم جۇرتشىلىعى بۇل مەرەكەنى جاپپاي تويلاپ، مەرەكەلىك كوڭىل- كۇيدى كوككە شاشىلعان كوزدىڭ جاۋىن الار فەيەرۆەرك شوۋى كوتەرە ءتۇستى.
دەگەنمەن، لاڭكەستىك قاۋىپتەن قاۋىپتەنگەن ەۋروپا جۇرتشىلىعى مەرەكەلىك ءىس- شارالار وتەتىن كەزەڭدە قاۋىپسىزدىك شارالارىن بارىنشا كۇشەيتە ءتۇستى. ءتىپتى، كەيبىر قالالار جاڭا جىلدىق وتشاشۋدان دا باس تارتتى.
سونىمەن، ادامزات بالاسى تاعى ءبىر جاڭا جىلدى تورگە وزدىردى. مەرەكە ەڭ الدىمەن اۆستراليادا باستالىپ، وتشاشۋ شوۋىن كورمەك بولعان ميلليوننان استام ادام سيدنەيدەگى ايلاققا جينالدى. ولار تۇنگى اسپان اياسىندا وتشاشۋدان التىن ءارى كۇمىس ءتۇستى سان الۋان بەينەنى تاماشالادى. 12 مينۋتقا سوزىلعان وتشاشۋ بارىسىندا 7 تونناعا جۋىق پيروتەحنيكا شىعىندالدى.
ءسال كەيىنىرەك جاپونيا استاناسى توكيو قالاسىنىڭ مىڭداعان تۇرعىنى زويوي عيباداتحاناسىندا جاڭا جىلدى قارسى الدى. تۋرا تۇنگى ساعات 12:00 دە وسىناۋ بۋددالاردىڭ قاسيەتتى عيباداتحاناسىنا قوڭىراۋ 108 مارتە سوعىلدى. سونىمەن قاتار كۇنشىعىس ەلورداسىنىڭ تۇرعىندارى «Tokyo Tower» تەليەۆيزيالىق مۇنارا ماڭىنا دا جينالىپ، ءدال تۇنگى 00:00 دە اسپانعا بىرنەشە مىڭ اق اۋە شارلارىن ۇشىردى.
ال دۋبايدا الەمدەگى ەڭ ءزاۋلىم «بۋردج حاليفا» (829 مەتر) عيماراتى جانىندا الەمدەگى ەڭ ۇلكەن وتشاشۋ بولدى. ايتا كەتەرلىگى، وكىنىشكە وراي دۋبايدا Address Hotel Downtown ءقوناقۇيى وتقا ورانىپ، جەرگىلىكتى بيلىكتى ءبىراز ابىگەرگە سالعان بولاتىن. ويتكەنى، اتالعان قوناق ءۇي «بۋردج حاليفانىڭ» قاسىندا ورنالاسقان بولاتىن. 63 قاباتتى Address Hotel Downtown قوناقۇيىندەگى ءورت 20-شى قاباتىنان باستالعان. ءتىلسىز جاۋمەن امىرلىكتىڭ ازاماتتىق قورعانىس كۇشتەرىنىڭ تىكۇشاقتارى مەن ءورت ءسوندىرۋ قىزمەتى كۇرەستى. ابىروي بولعاندا ورتتەن زارداپ شەككەندەر جوق. قالا مۋنيتسيپاليتەتى توتەنشە وقيعاعا قاراماستان، «بۋردج حاليفادا» جاڭا جىلدىق سالتاناتتى وتكىزدى. جارتى ساعاتقا سوزىلعان وتشاشۋ كەزىندە 1,6 توننا پيروتەحنيكا مەن 400 مىڭ LED جارىقتاندىرعىش قولدانىلدى. ونى 2 ميلليوننان استام ادام تاماشالادى.
ايتپاقشى، مەرەكە ءتۇنى جاڭا جىلدى Downtown اۋدانىندا قارسى العىسى كەلەتىن دۋباي قالاسىنىڭ تۇرعىندارى مەن قوناقتارىن پوليتسەيلەر «بويداقتار» جانە وتباسىلى دەپ ەكىگە ءبولدى. بەلگىلى ءبىر كۇندەرى تەك جانۇيالىلار عانا قاتىنايتىن «بۇكىلالەمدىك اۋىل» جارمەڭكەسى ۋاقىتىندا بويداقتاردىڭ كەلۋىنە شەكتەۋ باياعىدان بار بولسا دا، بۇل شارا دۋبايدا العاش رەت قابىلدانعان ەدى.
ال ەۋروپادا 2016 -جىلدىڭ تابالدىرىقتان اتتاۋى لوندونداعى بيگ- بەن ساعاتىنىڭ قوڭىراۋ سوعۋىمەن باستالىپ، «London Eye» توڭىرەكتى شولۋ دوڭگەلەگى تۇسىنداعى وتشاشۋعا ۇلاستى.
ترافالگار الاڭىنا نورۆەگيادان جەتكىزىلگەن ۇلكەن شىرشا ورناتىلدى. ونىڭ بيلىكتىگى 25 مەتردى قۇرايدى.
پاريجدە دە ەل بيلىگىنىڭ ءتۇرلى لاڭكەستىك ارەكەتتەردەن قاۋىپتەنۋىنە قاراماستان جاڭا جىلدى قارسى الۋ شاراسى ءوز دەڭگەيىندە وتكىزىلدى. ءبىراق، جاڭاجىلدىق وتشاشۋ بولعان جوق.
بريۋسسەلدەگى جاڭا جىلدى قارسى الۋ شارالارى دا پيروتەحنيكالىق شوۋسىز ءوتتى. بۇل ەلدىڭ بيلىگى دە لاڭكەستىك ارەكەتتەردىڭ ورىن الۋىنان قاۋىپتەنگەن بولاتىن. ال بەرليندە قالانىڭ ءجۇز مىڭداعان تۇرعىنى مەن الەمنىڭ تۇكپىر- تۇكپىرىنەن كەلگەن تۋريستەر براندەنبۋرگ قاقپاسى ماڭىنا جينالىپ، كوككە شاشىلعان ءتۇرلى- ءتۇستى وتشاشۋدىڭ كۋاسى بولدى.
برازيليانىڭ ريو-دە جانەيروۆ قالاسىندا شامامەن 2 ميلليون ادام مەشىن جىلىن اتاقتى كوپاكابان جاعاجايىندا قارسى الدى. تەڭىزدە تۇرعان كەمەدەن 16 مينۋتقا سوزىلعان وتشاشۋ جاسالدى. جالپى، وعان 24 توننا پيروتەحنيكانىڭ كەتكەندىگى بەلگىلى.
قاۋىپسىزدىك شارالارىنىڭ قاتاڭداتىلۋىنا قاراماستان نيۋ-يوركتە دە ميلليونعا جۋىق ادام جاڭا جىلدى قارسى الۋ ءۇشىن تايمس- سكۆەرگە جينالدى. بۇدان بولەك 100 ميلليوننان استام ادام وسى الاڭدا ورىن الىپ جاتقان مەرەكەلىك شارالاردى تەلەديداردان تاماشالادى. جالپى، جاڭاجىلدىق شارالاردى تەلەديداردان تاماشالاعان كورەرمەندەردىڭ سانى جەر شارىندا ميلليارد ادامعا جەتتى.
اۆتور: مارلان جيەمباي
