جاڭا جىلدى تويلامايتىن ەل

استانا. قازاقپارات - جاڭا جىلدى ەلدەردىڭ ءبارى بىردەي تويلاي بەرمەيدى.

ماسەلەن يزرايلدە جىلدىڭ باسى ادەتتەگىدەي جۇمىس كۇندەرى.

31 -جەلتوقسان مەن 1 -قاڭتاردى مەرەكەلىك كۇندەر ەتۋ ءۇشىن يزرايلدىقتار ارنايى فلەشموب تا ۇيىمداستىرعان بولاتىن. دەگەنمەن كۇنتىزبەلىك جىلدىڭ باستالۋىن مەرەكە دەپ تۇتاتىن 2 ميلليون يزرايلدىقتار جاڭاجىلدىق تۇننەن كەيىن جۇمىسقا شىعۋعا ءماجبۇر.

ەمانۋەل ارون ءۇشىن 1 -قاڭتار كۇنى جۇمىسقا شىعۋ مۇڭعا اينالعان. سەبەبى جاڭا جىلدى مەرەكە دەپ ەسەپتەمەيتىن يزرايلدە ول داستارحان جايىپ، وتباسىمەن جىلدى قارسى الادى. بۇل مەن ءۇشىن باستى وقيعا، ايتۋلى كۇندەردىڭ ءبىرى دەيدى ول.

ەمانۋەل ارون، گ. تەل-اۆيۆ تۇرعىنى:

- ادەتتە مەن جاڭا جىلدى وتباسىممەن بىرگە قارسى الىپ، تويلايمىن. ءوزىم جاڭاجىلدىق مەرەكەنى قاتتى ۇناتامىن. يزرايل دەموكراتيالىق ەل بولعاندىقتان، 1 -قاڭتاردى دەمالىس كۇنى ەتىپ جاريالاعانى دۇرىس بولار ەدى. جاڭا جىلدى قارسى الىپ، تويلاعاننان كەيىنگى كۇنى جۇمىسقا شىعۋ وتە اۋىر.

يزرايلدە جاڭا جىلدى نەگىزىنەن ت م د ەلدەرىنەن كەلگەندەر تويلايدى. ولار كوپ جىلدار بويى 31 -جەلتوقسان مەن 1 -قاڭتاردى دەمالىس ەتۋ ءۇشىن كۇرەسىپ كەلەدى، ءبىراق ناتيجەسىز. ەسكى جىلدىڭ سوڭعى كۇنى مەن جاڭا جىلدىڭ العاشقى كۇنى يزرايلدە كۇندەلىكتى تىرشىلىكپەن وتەدى. بالالار مەكتەپكە بارسا، ولاردىڭ اتا-اناسى جۇمىستارىنا كەتەدى.

ەۆگەني گاسين، تاريحشى:

- يزرايلدىقتاردىڭ باسىم كوپشىلىگى جاڭا جىلدىڭ ءمانىن تۇسىنبەيدى. ولارعا كەڭەس ۇكىمەتىندە تويلانىپ كەلگەن جاڭاجىلدىق مەرەكەنىڭ دىنگە ەش قاتىسى جوقتىعىن ءتۇسىندىرۋ قيىن. كەڭەس ۇكىمەتى كەزىندە جاڭا جىل ءدىني نانىمدارعا قاراماستان، بارشا حالىق تويلاعان دىنگە دە، ساياساتقا دا قاتىسى جوق جالعىز مەرەكە بولعان. سونى باسقا حالىقتار ەندى عانا تۇسىنە باستاعان سەكىلدى. كەيدە جىلدىڭ باستالۋىن اۋليە سيلۆەسترمەن دە بايلانىستىراتىندار از ەمەس. دەگەنمەن جاڭا جىلدىڭ اۋليە كلاۋسقا دا قاتىسى جوق ەكەنىن جانە اياز اتانىڭ ەشبىر دىنگە قاتىسى جوق ەكەنىن تۇسىنگەن سەكىلدى.

بيىلعى جاڭاجالدىق كۇرەسكە كنەسسەت دەپۋتاتى كسەنيا سۆەتلوۆا دا قوسىلدى. Facebook-تاعى پاراقشاسىندا ول «مەن جاڭا جىلدى قارسى الامىن» دەگەن ايدارمەن فلەشموب ۇيىمداستىردى. مىڭداعان ادام جاڭاجىلدىق سۋرەتتەرىن جولداپ، شارانى قولدادى.

كسەنيا سۆەتلوۆا، يزرايلدىڭ كنەسسەت دەپۋتاتى:

- ۇيىمداستىرعان فلەشموب ءتۇرلى دەڭگەيدە قولداۋ تاپقانى مەنى قاتتى قۋانتتى. Facebook-تاعى پاراقشاما كىرگەن ادامدار جاڭا جىلدى تويلاۋ ۇستىندە تۇسكەن فوتولارىن ماعان جىبەردى. كوپتەگەن ادام ءوز ىقىلاسىن ءبىلدىردى. كنەسسەتەگىلەر دە فوتوعا ءتۇسىپ، بۇل مەرەكەدەن حابارسىز بولسا دا، ك س ر و ەۆرەيلەرى ونى قالاي تويلاعانىن ەستىپ، قۋانا قوسىلاتىندارىن ايتتى.

بۇكىل جاھان مەرەكەنى دۇركىرەتىپ تويلاۋعا دايىندالىپ، ساۋدا جاساپ جۇرسە، يزرايل دۇكەندەرى تىم-تىرىس. جانتالاس پەن قاربالاس سەزىلمەيدى. ال ساۋدا ورىندارىندا ءتىرى شىرشا ەمەس، كيپاريس پەن جاساندى شىرشا عانا ساتىلادى.

الەكساندر كومەنكو، ساتۋشى:

- سوڭعى جىلدارى شىرشاعا سۇرانىس وسكەن. سەبەبى جەرگىلىكتى يزرايلدىقتار دا بىرتە-بىرتە جاڭا جىلدى تويلاي باستادى. ءتىپتى ءتىرى شىرشالار دا ساتىلاتىن بولدى. دەگەنمەن ەلىمىزدە اعاشتاردى، شىرشالاردى كەسۋگە قاتاڭ تىيىم سالىنعان.

جالپى ەۆرەيلەردىڭ سالت-ءداستۇرى بويىنشا جاڭا جىل نەمەسە روش حا-شانا كۇزدە كەلەدى. ءبىراق ونى دا بار ءسان-سالتاناتپەن تويلايتىن حالىق كورىنبەيدى. سوندىقتان جەرگىلىكتى راۆۆيندەر مەرەكەگە وراي قالا كوشەلەرىن بەزەندىرۋگە رۇقسات بەرمەيدى. الايدا جاڭا جىلدى قارسى الام دەۋشىلەرگە ەشكىم تىيىم سالماسى انىق. سوندىقتان 2 ميلليونداي يزرايلدىقتار 31 -جەلتوقسان كۇنى ساعات 12 دە ىزگى تىلەكتەرىن ءبىلدىرىپ، ءبىر- ءبىرىن قۇتتىقتايدى.

www.24.kz