16:55, 01 - قاڭتار 2016 | GMT +5
بۇگىن «يسلام مەملەكەتى» رەسەيگە جاساعان العاشقى شابۋىلىن جاريا ەتتى
استانا. قازاقپارات - «يسلام مەملەكەتى» (ي م) ەكسترەميستىك توبى رەسەيدىڭ داعىستان ولكەسىندەگى دەربەنت قالاسىنا جاسالعان شابۋىلدىڭ جاۋاپكەرشىلىگىن موينىنا الدى دەپ جازادى ازاتتىق.
ول قالادا سارسەنبى كۇنى تۇندە نارىن-كالا قامالىندا جۇرگەن ادامدارعا وق اتىلعان ەدى. راديكال ۇيىم شابۋىل رەسەيلىك ساربازدارعا جاسالعانىن، ولاردىڭ ءبىرى وققا ۇشقانىن ايتادى.
رەسمي اقپاراتقا قاراعاندا، دەربەنتتەگى وقيعادان ءبىر ادام مەرت بولىپ، 11 ادام جارالانعان. ت ا س س دەرەگىنشە، ورمان جاقتان اۆتوماتتى قارۋمەن اتقىلاعان ادامدار تۋريستەردى كوزدەگەن. داعىستاننىڭ تەررورعا قارسى ۇلتتىق شتابى سۋلەيمان ستالسكي اۋدانىندا ارنايى وپەراتسيا رەجيمى جاريالانعانىن حابارلادى.
رەسەيدىڭ سيرياداعى اسكەري وپەراتسياسىنا نارازى بولعان «يسلام مەملەكەتى» ەكسترەميستىك توبى مىسىردا اپاتقا ۇشىراپ، 224 ادامى قازا تاپقان رەسەيلىك ۇشاقتىڭ جاۋاپكەرشىلىگىن دە موينىنا العان.
