جۇرتتى جالىقتىرعان جەتى جاڭالىق
دوللار باعامى - تەڭگەگە كوتەرىلدى نەمەسە جاڭا انتيرەكورد ورنادى
2015-جىلدىڭ باستى «جىرى» دوللار بولدى دەسەك قاتەلەسپەيمىز. تامىز ايىنىڭ باسىنان باستالعان تەڭگەنىڭ قۇلدىراۋى تۇراقتالىپ قالمادى. ناتيجەسىندە تەڭگە ەركىن اينالىمعا جىبەرىلدى. دوللار باعامى كۇندە اۋا-رايى سەكىلدى قۇبىلۋمەن بولدى. ءتىپتى تاڭەرتەڭ تۇرا سالا، بولماسا داستارحان باسىندا «دوللار قانشا بولىپتى؟» دەپ سۇرايتىن حالگە جەتتىك.
اقىر سوڭىندا ودان دا جالىققاندايمىز. بۇرىن- سوڭدى «KASE» دەگەن ءسوزدى بىلمەيتىن بولساق، قازىر جاتتاپ الدىق.
الماتىدا جەر سىلكىندى
ءتىلسىز كەلگەن جاۋدان ساقتاسىن. 2015-جىلى الماتىدا جەر ءدۇمپۋى ءجيى سەزىلدى. اقپاراتتار دا كوپ بولدى. قازىر «الماتىدا جەر سىلكىندى» دەگەن جاڭالىق ايتىلسا جۇرت ءمان بەرىپ قارامايدى دا. بۇل دا بيىلعى جىلدىڭ جالىقتىرعان جاڭالىقتارىنىڭ ءبىرى بولسا كەرەك-ءتى (جالىقتىرىپ جولاماسىن دەيىك).
ينتەرنەتتى «جاردى» نەمەسە حيت بولدى
ءدال وسىنداي تاقىرىپپەن جاريالاناتىن اقپاراتتار بيىل قاپتاپ كەتتى. اسىرەسە «ينتەرنەتتى جاردى» دەگەن ءسوز تىركەسىن ءجيى كوزىڭىز شالىپ، وقىعان بولارسىز. بۇل ورىستىڭ «ۆزورۆالا ينتەرنەت» دەگەن تىركەسىنىڭ قازاقشا تۋرا اۋدارماسى. باسىندا قۇلاققا تۇرپىدەي ءتيىپ، «بۇل نە ەكەن دەپ» جۇرتتى تاڭداندىرعانمەن، قازىر جۇرتتى جالىقتىرىپ ۇلگەردى. سەبەبى عالامتوردا ءدال سونداي بەينەبايانداردىڭ سان ميلليونداعان ءتۇرى بار. وسىنى دا جاڭالىق دەپ جازعانسىڭدار ما دەپ وكپەلەيتىندەر دە بار.
ۇرىپ-سوعىپ كەتتى
بۇرىندارى قىلمىس جايلى اقپارات وقىساق، بولماسا تەلەديداردان قاراي قالساق جاعامىزدى ۇستايتىن ەدىك. ال قازىر عالامتوردىڭ كەڭ تارالۋىمەن ءبارى دە وزگەرىپ سالا بەردى. سەبەبى، عالامتور جەلىلەرىنەن قىلمىستىڭ سان ءتۇرىن بايانداعان بەينەبايانداردى كەزدەستىرۋگە بولادى. اقپاراتتىق سايتتار دا كۇنىنە ءبىر ەمەس، بىرنەشەۋىن جاريالاپ جاتادى. جاعىمسىز جاڭالىقتار دا ادام پسيحولوگياسىنا اسەر ەتەتىنى انىق. الايدا قازىر بۇعان جۇرتتىڭ ەتى ۇيرەنىپ كەتكەن سەكىلدى.
سايلاۋبەكتىڭ جاڭا حيتتارى
سايلاۋبەك تۋرالى جازىلعان جاڭالىقتار باسىندا تاڭسىق بولعانمەن، كەيىننەن جۇرتتىڭ زىعىردانىن قايناتتى. قازاقستاندىق م س-ءدىڭ ونەرى ۇناتقاندار دا جوق ەمەس. دەسە دە سايلاۋبەكتىڭ اندەرى قوعامعا جاعىمدى اسەر ەتتى دەپ ايتا المايمىز.
جول-كولىك اپاتتارى
بۇگىندە ەڭ كوپ جازىلاتىن جاڭالىقتاردىڭ ءبىرى - جول-كولىك اپاتتارى. مۇنداي توسىن وقيعالار وقىرمانداردى عانا ەمەس، تىلشىلەردى دە جالىقتىرعانى انىق.
شوك جاڭالىق ەمەس، جوق جاڭالىق
بۇگىندە الەۋمەتتىك جەلىدەگى پاراقشالار تىركەلۋشىلەر سانىن ارتتىرۋ ءۇشىن سان ءتۇرلى ايلا-تاسىلدەردى قولدانۋدا. الداپ تا جاتىر، ارباپ تا جاتىر، وسەكتەپ، عايباتتاپ تا، ءتىپتى بىرەۋلەردىڭ نامىسىنا دا ءتيىپ جاتىر. تىركەلۋشى سانىن ارتتىرۋ ءۇشىن - كوزى ءتىرى ادامدى «ءولدى» دەپ حابارلاۋدان دا تايىنار ەمەس. كەي «شوك جاڭالىق» دەپ شوشىتا جازعان جاڭالىقتاردى كورىپ، ەرىكسىز تاڭداناسىڭ. ۇيقاستىرا جازسا، ءبىر ءسارى. ۇيقاسپايتىن دۇنيەمەن الداۋدىڭ قاجەتى قانشا؟ ەڭ سوراقىسى - سوڭعى كەزدە ەلىمىزدىڭ تانىلىپ جۇرگەن تۇلعالارىن دا «جارنامالارىنا» اينالدىرا باستادى (ەرتەڭ ءسىز دە تانىمال بولىپ شىعا كەلسەڭىز، سونداي جارناماعا اينالىپ كەتپەسىڭىزگە كىم كەپىل؟). ءيا، توپتى جارنامالاۋ ءۇشىن، تىركەلۋشىلەر سانىن ارتتىرۋ ءۇشىن ەڭبەك ەتۋ كەرەك. ءبىراق، سول ەڭبەكتىڭ دە ادال بولعانى دۇرىس ەمەس پە؟ بۇل ادىسكە قازىر جۇرت سەنبەيدى. وقي-وقي جالىقتى دا.
2016-جىل جاعىمدى جاڭالىقتارعا تولى بولسىن. ەلىمىز امان، جۇرتىمىز تىنىش، باۋىرىمىز ءبۇتىن بولسىن!
massaget.kz
