رەسەيلىك ديزاينەرلەر ايەلدەرگە ورامال تارتىپ ءجۇرۋدى ۇيرەتپەك
بۇل برەندتىڭ نەگىزىن قالاۋشى الەكساندرا كالوشينانىڭ ايتۋىنشا، كورسەتىلىمنىڭ ەڭ باستى ماقساتى - كوپشىلىكتىڭ كوڭىل كۇي تولقىنىن باقىلاۋ بولعان. ۇلگى كورسەتۋشىلەر ادامنىڭ ويىنا كەلمەيتىن ورامال تارتۋ تاسىلدەرىن كورسەتىپ، كوپشىلىكتى تاڭ قالدىرىپتى.
«ءبىز نە ىستەسەك تە، كوڭىل كۇي اۋانىن باسشىلىققا الامىز. مىسالعا كوزىمىزدى باسىپ تۇرعان ورامال - الدەبىر عاجايىپتى، باقىتتى كۇتۋ. ال ۇلگى كورسەتۋشىنىڭ بەتىن تۇگەل جاپقان ورامال - ءبىزدىڭ تىلەگىمىزدىڭ قۇپياسى مول ەكەنىن بىلدىرەدى»، - دەپ تۇسىنىكتەمە بەردى ا. كالوشينا.
قازان ايىنىڭ اياعىندا بريتاندىق Burberry برەندى وزدەرىنىڭ ساتىپ الۋشىلارىنا ارناپ شارقاتتى (شارفتى) وراۋدى ۇيرەتەتىن بەينەساباقتاردىڭ توپتاماسىن شىعارعان ەدى. YouTube سايتىندا جاريالانعان بەينەروليكتەردە شارقاتتاردى وزدەرى وراپ كورسەتەدى، ونى باسقا كيىمدەرمەن ۇيلەستىرۋ تاسىلدەرىن باياندايدى. ەگەر قىزىعۋشىلارعا قوسىمشا تۇسىنىكتەمە قاجەت بولسا، ولار ونى بەينەباياننىڭ استىنداعى جازباشا نۇسقاۋلىقتان وقىپ-بىلە الادى.
ال رەسەيلىك Radical Chic كومپانياسى 2012-جىلى قۇرىلعان ەكەن. سودان بەرى جىبەك، ماقتا، كاشەمير، ءجۇن سياقتى ماتەريالداردان اۆتورلىق ۇلگىدەگى ورامالداردى شىعارۋعا ماماندانىپ كەلەدى. وزدەرىنىڭ جيناعىن پاريجدەگى Premiere Vision كورمەسىندە ۇسىنىپ، PROfashion AWARDS سىيلىعىنىڭ لاۋرەاتى اتانعان. كومپانيا بيىلعى تابىسى ءۇشىن كيىم ۇلگىسى يندۋسترياسى سالاسىندا ۇلتتىق سىيلىقتى يەمدەنگەن.
ورامال ءبىر كەزدەرى قازاق ايەلدەرىنىڭ دە كوركىن كىرگىزگەن ەدى. انالارىمىزدى اق جاۋلىقسىز ەلەستەتە المايتىن ەدىك. ءبىزدىڭ ەلىمىزدە دە وسىنداي ءداستۇردى جاڭعىرتۋشىلار شىعىپ جاتسا، «نۇر ۇستىنە نۇر بولار ەدى».
فوتو: @radicalchicfashion
