دۋبايدا بەسجۇلدىزدى قوناق ءۇي ورتەنىپ جاتىر

ءابۋ-دابي. قازاقپارات - دۋباي قالاسىندا Address Hotel Downtown قوناق ءۇيى وتقا وراندى.

اتالمىش قوناق ءۇي ەڭ بيىك ايگىلى عيمارات «بۋردج حاليفانىڭ» قاسىندا ورنالاسقان. ول جەردە ءتۇن ورتاسىندا مەرەكەلىك وتشاشۋ بولادى دەپ جوسپارلانعان. وتشاشۋدى الەمنىڭ ميلليونداعان حالقى تاماشالايدى. 63 قاباتتى Address Hotel Downtown قوناق ۇيىندەگى ءورت 20- قاباتىنان باستالعان. ءتىلسىز جاۋمەن امىرلىكتىڭ ازاماتتىق قورعانىس كۇشتەرىنىڭ تىكۇشاقتارى مەن ءورت ءسوندىرۋ قىزمەتى الىسىپ جاتىر.

دۋبايداعى ازاماتتىق قورعانىس دەپارتامەنتىنىڭ باسشىسى گەنەرال-مايور زارداپ شەككەندەر جوق دەپ حابارلادى. قالا مۋنيتسيپاليتەتى توتەنشە وقيعاعا قاراماستان، «بۋردج حاليفادا» جاڭا جىلدىق سالتانات بولاتىنىن مالىمدەدى. ۇيىمداستىرۋشىلاردىڭ ايتۋىنشا، وتشاشۋ 1،6 توننا پيروتەحنيكا مەن 400 مىڭ LED- جارىقتاندىرعىشتان تۇرادى.