بۇگىن - ءابىلحان قاستەيەۆتىڭ تۋعان كۇنى
الماتى وبلىسىنىڭ جاركەنت اۋدانىندا تۋعان. الماتى قالاسىندا جانە ماسكەۋ قالاسىندا كوركەمسۋرەت ستۋدياسىندا وقىدى. 1954-1956-جىلدارى قازاق ك س ر سۋرەتشىلەر وداعى باسقارماسىنىڭ ءتوراعاسى قىزمەتىن اتقاردى. ونىڭ العاشقى كورمەگە قويىلعان تۋىندىلارى - «تىگىن ۇستىندە»، «مەكتەپكە»، «اۆتوپورترەت»، «كوگىلدىر كويلەكتى قىز»، «قارىنداسىمنىڭ پورترەتى». سۋرەتشىنىڭ «ع. مۇراتبايەۆ»، «ا. قۇنانبايەۆ»، «ج. جابايەۆ»، «ا. يمانوۆ»، «ك. ازىربايەۆ» سياقتى پورترەتتىك تۋىندىلارى جوعارى تانىم-تالعامنىڭ ۇلگىسى.
تاريحي تاقىرىپتاعى «تۇركسىب»، «امانگەلدى ساربازدارى»، «كولحوز تويى»، «قالىڭدىق»، ت. ب. كوركەم تۋىندىلارىنان قاستەيەۆ قالامىنا ءتان قاسيەت - ەپيكالىق اۋقىمدىلىق، ۇلتتىق بوياۋدىڭ ايقىندىعى كورىنەدى. سۋرەتشى حالقىمىزدىڭ تۇرمىس- تىرشىلىگىن ءدال بەينەلەپ، ۇلتتىق دۇنيەتانىم اياسىندا تىڭ كومپوزيتسيالىق شەشىم تابا ءبىلدى.
ونىڭ «كيىز ءۇيدىڭ ىشكى كورىنىسى»، «قىز جىبەك»، «قىز ۇزاتۋ»، «قوس قۇربى»، «كەلىن ءتۇسىرۋ» تاعى باسقا شىعارمالارى ۇلتتىق قازىنامىزعا اينالدى. سۋرەتكەر قاستەيەۆ قازاق حالقىنىڭ سالت-ءداستۇرىنىڭ وزىعى مەن توزىعىن اجىراتىپ، كەرتارتپا كەمشىلىكتەردى اشىنا بەينەلەدى.
مىسالى، «كەدەي مەن باي قۇدىق باسىندا»، «قۇرعاقشىلىق كەزىندە مولدانىڭ جىلۋ جيناۋى»، «قىز الىپ قاشۋ» شىعارمالارى وسىنىڭ دالەلى. ونىڭ ۇلتىنا، تۋعان جەرگە، وتانىنا سۇيىسپەنشىلىگى شىعارمالارىندا شىنايى كورىنىس تاپتى. قىلقالام شەبەرى سۋرەت ورنەكتەرىنىڭ سىرلى بوياۋىن، ۇتىمدى قولدانىپ، بەينەلەۋ ونەرىندە مادەنيەت تاريحىنىڭ، رەسپۋبليكالىق قوعامدىق ءومىردىڭ جىلناماسىن جاسادى.
اباي مەن قاستەيەۆ اراسىنداعى نازىك بايلانىس دۇنيەنى ەستەتيكالىق-كوركەمدىك تۇرعىدان تانۋدىڭ، ونەر وزەكتەستىگىنىڭ، رۋحاني ساباقتاستىقتىڭ كورىنىسى. اباي تۇلعاسى قاستەيەۆتىڭ سۇيىكتى كەيىپكەرى بولدى. ول ابايدىڭ كەلبەتىن ءار قىرىنان سومدادى. سۋرەتشىنىڭ قىلقالامىنان تۋىنداعان «اباي كيىز ءۇي الدىندا»، «جاس اباي»، «اباي جاز جايلاۋدا» جانە «بۇركىتشى»، «قىس»، «جاز»، «كوكتەم» اتتى شىعارمالارى وسىعان دالەل. شىمكەنت قالاسىنداعى ونەر ۋچيليشەسى، قازاقستان رەسپۋبليكاسى مەملەكەتتىك ونەر مۇراجايى قاستەيەۆتىڭ اتىمەن اتالادى. «قازان توڭكەرىسى»، 2 مارتە «ەڭبەك قىزىل تۋ»، «قۇرمەت بەلگىسى» وردەندەرىمەن ماراپاتتالعان.
