ءالفيا مەن ەرمەك اجىراسپاس بۇرىن جاقسىلاپ ويلانىپ الۋعا كەڭەس بەرەدى
الماتىلىق ءالفيا يسلاموۆا مەن ەرمەك ارىنعازيەۆ - اجىراسقان جۇپتاردىڭ ءبىرى. ءبىراق ءدام-تۇزى جاراسپاي اجىراسىپ كەتكەن مىڭداعان- ون مىڭداعان وتباسىلاردان ايىرماشىلىعى - ەكەۋى قايتا تابىسقان.
تەمىربەك جۇرگەنوۆ اتىنداعى قازاق ۇلتتىق ونەر اكادەمياسىنىڭ تۇلەگى ءالفيا يسلاموۆا بولاشاق جارى ەرمەك ارىنعازيەۆپەن 15 جىل بۇرىن الماتىدا جەرگىلىكتى تەاترلاردا جۇمىس ىستەپ جۇرگەن كەزدە تانىسقان. ەكەۋى ءبىر اپتادان كەيىن وتباسىن قۇرۋدى ۇيعارعان. ءالفيانىڭ ايتۋىنشا، شاڭىراق قۇرىپ، ءۇي بولۋ جايلى وي ەكەۋىنە ءبىر مەزەتتە كەلگەن. ءبىراق كەيىن ەرلى- زايىپتىلار اجىراسىپ كەتكەن.
قازىر 45 جاستاعى بۇرىنعى اكتريسا اجىراسۋعا تۇرتكى بولعان سەبەپتى ەسكە الادى. ايتۋىنشا، كۇيەۋى جۇمىسسىز قالعان سوڭ ول جاقسى جۇمىس تاۋىپ، وزگە قالاعا كەتكەن، ءسويتىپ ەكەۋىنىڭ اراسىنا سىزات تۇسكەن.
- اجىراسىپ كەتەمىز دەپ ەكەۋمىز دە ويلاعان جوقپىز. جامبىل تەاترى باسشىلىعى مەنى قازاقستاندى گاسترولدەرمەن ارالايتىن جۇمىسقا شاقىردى. مەن الگى ۇسىنىسقا كۇيەۋىممەن دە اقىلداسپاي بىردەن كەلىستىم، - دەيدى ءالفيا يسلاموۆا ازاتتىققا.
ءۇش بالاسىن الىپ، تاراز قالاسىنا كەلگەن ءالفيا اكە- شەشەسىنىڭ ۇيىندە تۇرعان. ول جاقتا مانسابى ورلەپ، باستى رولدەر مەن گاسترولدەردەن باسى اينالىپ قالعان.
- شىنىمدى ايتسام، ەكەۋمىز بىرگە تۇرعاندا اقشادان قاتتى تارىقتىق. الماتىدان ىڭعايلى جۇمىس تاپپادىم، اقىرى بارىنە كوز جۇمىپ، الدى- ارتىما قاراماستان كەتۋگە تۋرا كەلدى، - دەيدى ءالفيا يسلاموۆا ازاتتىققا.
ءالفيا «ءوزىمدى عانا ويلاپ، وزىمشىلدىككە سالىندىم» دەپ سانايدى. ءبىراق ول كۇيەۋى قاشان جۇمىس ىستەپ، اقشا تابادى دەپ كۇتىپ وتىرا الماعانىن ايتادى. اكە-شەشەسىنىڭ اجىراسۋىنان كوبىنەسە بالالارى قينالعان. «اكەمىز قاشان كەلەدى؟» دەپ سۇراي بەرگەن بالالارىنا ءالفيا «اكەلەرىڭ ۇزاق ءىسساپارعا كەتكەن، كوپ ۇزاماي كەلەدى دەپ جۇباتاتىنمىن» دەيدى.
ءالفيانىڭ تۇرمىس- تىرشىلىگى:
ەكى جىلدان كەيىن رولدەرگە شاقىرۋ تىيىلا باستاعان، ول الماتىعا قايتا ورالعان. ءبىراق بىردە ەرىنىڭ تەلەفونىنا كەزدەيسوق كوزى تۇسكەن ءالفيا كۇيەۋىنىڭ وزگە ايەلمەن كوڭىل جاراستىرعانىن بايقاعان.
- جاسى مەنىمەن شامالاس ءبىر ايەلمەن تۇسكەن فوتوسۋرەتتەر تەلەفونىندا كوپ ەكەن. «كىم؟» دەپ سۇراپ ەدىم، كۇيەۋىم «زاڭدى ايەلىم تاستاپ كەتكەن كەزدە وسى ايەلمەن ەكى جىل بىرگە تۇردىم» دەپ جاۋاپ بەردى. الگى جاڭالىقتى ەستىگەندە مۇلدە تىنىشىم كەتتى، - دەيدى ءالفيا يسلاموۆا ازاتتىققا.
كۇيەۋى الگى ايەلمەن قارىم- قاتىناسىن ۇزگىسى كەلمەيتىنىن ايتقان. ال ءالفيا ءوزىن ەرمەكتىڭ اپكەسى رەتىندە تانىستىرىپ، كۇندەس كەلىنشەكپەن كەزدەسىپ، سويلەسكەن. اقىرى الگى ايەل مەن ەرمەك ءبىر- بىرىنە قاتتى ۇيرەنىپ قالعانىن بايقاپ، كۇيەۋىمەن اجىراسۋعا بەل بايلاعان. جالعىز وزىنە ءۇي ۇستاپ، بالالاردى اسىراۋ قيىن بولعان. ءبىراق كوبىنەسە كۇيەۋىنىڭ وپاسىزدىعى ويىنان شىقپاي، مازاسى كەتكەن.
اقىرى 2012 -جىلدىڭ كۇزىندە ەرلى- زايىپتىلار رەسمي تۇردە اجىراسىپ كەتكەن. ءبىراق ءدال سول تۇستا ەرمەك الگى ايەلمەن دە قاتىناسىن ءۇزىپ، ەكى ورتادا قالعان. ءالفيا «مەنىڭ كەسىرىمنەن ەرمەك ابدەن سەندەلىپ، جۇدەپ-جاداپ كەتتى، شاشى اعارىپ، تەپسە تەمىر ۇزەتىن جىگىتتەن كارى شالعا اينالدى» دەپ ەسكە الادى.
اقىرى ءالفيا تۋىس، دوستارىنىڭ اقىلىمەن شاڭىراعىن قالپىنا كەلتىرۋگە بەل بۋعان. ول «ەكەۋمىزدىڭ اجىراسقانىمىز بالالارىما، اسىرەسە قىزىما قاتتى باتتى، ولاردىڭ قينالعانىن كورگىم كەلمەدى» دەيدى. قازىر ەرمەك پەن ءالفيا قايتا تابىسىپ، بالالارىن بىرگە تاربيەلەپ وتىر، ەكەۋى تەاتر قويىلىمدارىن ساحنالاۋمەن اينالىسادى. ءالفيا ۇيىندە تاپسىرىسپەن كيىم تىگىپ، قوسىمشا جۇمىس ىستەيدى. ول «تاماعىمىزعا جەتەدى» دەيدى.
جىگىتتەرگە ايتارىم، كەلىنشەكتەرىڭدى ايالاڭدار، ەشقايدا، ءتىپتى ەكى كۇنگە دە جىبەرمەڭدەر.
ازاتتىققا ايەلى ەكەۋىنىڭ اراسى قالاي سۋىعانىن ايتىپ بەرگەن ەرمەك ارىنعازيەۆ «ايەلىم باسقا قالاعا كەتەمىن دەگەندە مەن قارسى بولدىم، شاڭىراعىمدى ءاۋ باستان شايقالتپاۋىم كەرەك ەدى» دەيدى.
- ءبىراق ايەلىم مەن بالا- شاعامدى قاتتى ساعىناتىنمىن. جالعىزسىراپ قاتتى قينالدىم. جىگىتتەرگە ايتارىم، كەلىنشەكتەرىڭدى ايالاڭدار، ەشقايدا، ءتىپتى ەكى كۇنگە دە جىبەرمەڭدەر، - دەيدى ەرمەك ارىنعازيەۆ.
قازىر ەرلى-زايىپتىلار ءبىر-ءبىرىن كوبىرەك قادىرلەيتىن بولعان، شاڭىراقتا بىرتىندەپ بەرەكە ورناي باستاعان، ءبىراق كەيدە وتكەن ءىس ءبىلىنىپ قالادى. ءالفيا مەن ەرمەك ەرلى-زايىپتى جاندارعا قيىندىقتى بىرگە ەڭسەرۋگە، اجىراسپاس بۇرىن جاقسىلاپ ويلانىپ الۋعا كەڭەس بەرەدى.
«ازاتتىق»
