جاڭا جىلدى قازاقستاندىق جۇلدىزدار قالاي قارسى الادى؟ - فوتو
دۇكەن سورەلەرىندە قىزۋ ساۋدا ءجۇرىپ جاتىر. ءار ۇيدە جاڭا جىلدىق كەشكى اسقا دايىندىق باستالىپ كەتتى. ال قازاقستاندىق جۇلدىزدار جاڭا جىلدى قالاي تويلاماق؟
بيبىگۇل تولەگەنوۆا: سىيلىققا كەلگەن كامپيتتى كەلەر جىلدىڭ سوڭىنا دەيىن جەپ تاۋىسا الماسپىز.
ك س ر و جانە قاز س س ر حالىق ءارتىسى، كۇمىس كومەي ءانشى بيبىگۇل تولەگەنوۆا تاڭنان بەرى اسىعىس دايىندىق ۇستىندە ەكەندىگىن ايتتى.
«ءۇيىمنىڭ ءىشى استاڭ- كەستەڭ بولىپ جاتىر. قىزىم مىندا، نەمەرەم اندا كەتتى شاپقىلاپ. قايسىسىنان باستاسام، نە ىستەسەم دەپ مەن ويلانىپ وتىرمىن. شاقىرعان جەر كوپ. قىزىم اۋىرىپ قالعاندىقتان وتباسىمىزبەن ۇيدەن شىعا المادىق. بارۋعا مۇمكىنشىلىك جوق. جالپى، جاڭا جىل وتباسىمەن قارسى الاتىن مەيرام عوي. قازىرگى دامىعان زاماندا جاقىندارىممەن تەلەفون، ينتەرنەت ارقىلى سويلەسىپ، قۇتتىقتاپ جاتىرمىز. ارا قاشىقتىق تا اسا ءبىلىنىپ جاتقان جوق»، - دەدى ءانشى.
جاڭا جىل قارساڭىندا ءتۇرلى تىڭدارماندارى مەن ەل ازاماتتارىنان بيبىگۇل اپايعا 15 قۇتتىقتاۋ سەبەتى جەتكەن. ءانشى سەبەتتەگى كامپيتتەردى جىلدىڭ سوڭىنا دەيىن جەتەتىن بولدى دەپ كۇلۋدە.
ارۋجان جازىلبەكوۆا: جاڭا جىلدى پرەزيدەنتپەن بىرگە قارسى الامىن.
اكتريسا ارۋجان جازىلبەكوۆا دا جاڭا جىلدى ءوز ۇيىندە جولداسىمەن بىرگە قارسى الاتىنىن جەتكىزدى.
«داستارحان جايىپ، تەلەارنانى قوسىپ، پرەزيدەنتپەن بىرگە قارسى الامىن. مەن ءۇشىن 2015 -جىل وتە ماڭىزدى جەتىستىكتەرگە تولى بولدى. مەن ويناعان 4 فيلم دە جارىق كوردى. كەلەر جىلى دا اقان ساتايەۆتىڭ «دوروگا ك ماتەري» ءفيلمىنىڭ تۇساۋكەسەرىن كۇتىپ وتىرمىز» ، - دەدى ول.
اكتريسا مەيرام قارساڭىندا العان ەڭ بىرەگەي سىيلىق رەتىندە كۇيەۋى بەرگەن سومكەنى اتادى. «مەنىڭ جولداسىم ماعان ۇنەمى سومكە سىيلايدى. ول مەن ءۇشىن ەڭ باعالى سىيلىق»، - دەدى ارۋجان.
التىنبەك قورازبايەۆ: نەمەرەلەرىمنىڭ شات- شادىمان كۇلكىسىن كورۋ ءبىر باقىت.
قازاقستاننىڭ حالىق ءارتىسى التىنبەك قورازبايەۆ نەمەرەلەرىنىڭ شات- شادىمان كۇلكىسىن كورۋدىڭ ءوزى ءبىر باقىت دەيدى.
«بيىل نارىق قىسپاققا العانمەن، جاقسى جىل بولدى. ەلىمىز، بالالارىمىز نەمەرەلەرىمىزدىڭ ءبارىنىڭ قاباعى اشىق، ەزۋلەرىنەن كۇلكى ايىرىلماي كەلەدى. 1992 -جىلدارى وسى بالالارىمىزعا سىيلىق سىيلاي الماعان كەزدەر بولعان. بازاردا، دۇكەندە تۇك جوق. ال قازىر شوكولادتىڭ دا ءتۇر-ءتۇرى، بۇيىمداردىڭ دا ءتۇر-ءتۇرى بار. ونى كورىپ جاتقان نەمەرەلەرىمىز دە باقىتتى. كەلەشەگىمىز ايقىن بولاتىنى ءسوزسىز. ەلباسى امان بولسىن. كەلەشەكتە ۇلكەن باي مەملەكەت بولاتىنىمىزعا كامىل سەنەمىن. بالا- شاعام ورتاسىندا بولامىن بۇگىن»، - دەدى ا. قورازبايەۆ.
اسحات تارعىنوۆ: جاڭا جىلدا ۇيلەنۋىم كەرەك.
بيىلعى تويلاردىڭ باستى رەپەرتۋارىنا اينالعان «چيپ-چيپ» اۆتورى اسحات تارعىنوۆ بيىل جاڭا جىلىن تۇڭعىش رەت الماتىدا جاڭا ۇيىندە قارسى الماقشى.
جىلدا جامباسى جەر يىسكەمەگەن ءسۇر بويداق بيىل جاڭا ۇيىنە دوستارىن شاقىرماقشى.
«مەن ءۇشىن اسا ءساتتى جىل بولدى. قۋانىشتى جاعداي كوپ بولدى. 2015 -جىلى كوكتەمدە باسپانالى بولدىم. بيىل الماتىدا ءبىرىنشى رەت قارسى الايىن دەپ وتىرمىن. بىلتىر باسقا قالادا بولعانمىن. بيىل ۇيدە بولۋعا نيەتتەنىپ وتىرمىن»، - دەدى ول.
ءانشى كەلەر مەشىن جىلىنا ارتار ءۇمىتى كوپتىگىن جاسىرمادى. ءتىپتى جىلدىڭ باسىندا وتباسىن قۇرۋ ماسەلەسىن قاراستىرماقشى.
ازىرگە ەلدەن العان سىيلىعىنىڭ الدى ەزۋى قيسىق ويىنشىق مايمىل بوپ تۇر.
ءبىراق ءانشى تىڭدارماندارىنىڭ ىستىق لەبىزىنەن اسقان باعالى سىيلىق جوق دەيدى.
«تىڭدارماندارىمنان لەبىزدەر، حاتتار جەلتوقساننىڭ 20-سىنان باستاپ كەلىپ جاتىر. مەن ولارعا ريزامىن»، - دەدى ول.
ايجان نۇرماعامبەتوۆا: مەنىڭ جىلىم تۋدى
ق ر ەڭبەك سىڭىرگەن ءارتىسى ايجان نۇرماعامبەتوۆا مايمىل جىلى بولعان سوڭ ۇيىنە كوپ بانان، اناناس ساتىپ العانىن ايتتى.
بۇگىن ءانشى دە ومىرىندە ءبىرىنشى رەت جاڭا جىلدى وتباسىمەن قارسى الماقشى.
«مەن كەڭەس وداعىنىڭ وكىلى بولعاندىقتان، جاڭا جىل مەن ءۇشىن ەرەكشە مەيرام. داعدارىستىڭ بەلگىسى كورىنىس بەرگەن بولۋى كەرەك. بيىل مەن ەڭ العاش رەت ۇيدە قالىپ وتىرمىن. بۇل دا مەن ءۇشىن وتە جاقسى بولىپ وتىر. ءوزىم دە قوناققا بارامىن. ماعان دا كەلەم دەۋشىلەر كوپ. جاڭا جىلدىق داستارحانعا مەشىن جىلى بولعاسىن بانان مەن اناناس كوپ ساتىپ الدىم. مەن ءوزىم مەشىن جىلىندا تۋىلعانمىن»، - دەدى ا. نۇرماعامبەتوۆا.
ەرلان كوكەيەۆ: ەسكى جىلدى ەكى ايلىق ۇلىممەن شىعارىپ سالامىن.
جاقىندا بالالى بولعان ءانشى ەرلان كوكەيەۆ بيىل مەيرامدى ءبۇلدىرشىنىنىڭ قاسىندا وتكىزبەكشى. ونىڭ ۇلىنا جاقىندا ەكى اي تولدى.
«بالامنىڭ العاشقى جاڭا جىلىن مەنىڭ مەيرامحانامدا اتاپ وتەمىز. دوستارىمدى شاقىرامىن. ءان ايتىپ، كوڭىلدى وتىرامىز»، - دەدى ول.
ەرلان كوكەيەۆ بيىل وتباسى مەن قىزمەتكەرلەرىنە عانا ەمەس بالالار ءۇيىنىڭ تاربيەلەنۋشىلەرىنە دە سىيلىقتار جاساعانىن ايتتى.
اۆتور: گۇلميرا عوسمان-ءالي
