قارنىن حالىق تويدىراتىن قازاقستاندىق ارتىستەر داعدارىستىڭ ەش اسەر ەتپەيتىنىن ايتتى
دوللاردىڭ باعامى كۇرت ءوسىپ، توي-تومالاق، وتىرىستار ازايدى. بۇل جاعداي ونەر يەلەرىنىڭ شىعارماشىلىعىنا دا ىقپال ەتپەي قويمادى، دەپ جازادى stan.kz.
جاس ءانشى ءالي وقاپوۆ داعدارىسقا حالىقتىڭ دا، شوۋ-بيزنەس وكىلدەرىنىڭ دە كوڭىل-كۇيى ءتۇسىپ، جۇمىسى توقتاپ، ىدىراپ كەتۋگە بولمايتىنىن ءسوز ەتەدى.
«كورگەنبىز، باسىمىزدان وتكەن نارسە. ەكىنشىدەن، جاقىن دوسىم الىشەر كاريموۆ «حالىق ءۇشىن قىزمەت ەتسەڭ، حالىق سەنىڭ قارنىڭدى تويدىرادى» دەگەن ادەمى ءسوز ايتتى. مەندە وسى جىل بولسىن، كەلەسى جىل بولسىن ءبارى جاقسى بولادى دەپ ويلايمىن، ۇمىتتەنەمىن»، - دەدى جاس ءارتىس.
«مۇزارت» توبىنىڭ ءانشىسى مەيرامبەك بەسپايەۆ حالىقتىڭ جاعدايىنا الاڭداپ وتىرعانىن جاسىرمايدى. ءبىراق، مەيرامبەك توي-جيىنعا كوپ بارمايتىن بولعاندىقتان، وزىنە داعدارىستىڭ بىلىنبەيتىنىن ايتادى. قازاقتىڭ تويدان ەش باس تارتپايتىنىن بىلەتىن ءانشى حالىقتىڭ قىزىعى تاۋسىلماۋىن تىلەدى.
ال ساكەن مايعازيەۆ قاسيەتتى قۇراندا جازىلىپ قويعان، اللا تاعالا بەرگەن ريزىقتان ارتىق نە كەم ەشكىم جەي المايتىنىن ايتادى. ءانشىنىڭ پىكىرىنشە، قيىندىقتى دوللارعا، داعدارىسقا بۇرۋدىڭ قاجەتى جوق.
«بۇرىنعىعا قاراعاندا ءبىر جىلدىڭ ەكىنشى جارتىسىنان باستاپ جۇمىسىمىز سايابىرسي باستادى. جالعىز ءبىزدىڭ ەمەس، ونەردەن بولەك، ساۋدادا دا سولاي دەپ ويلايمىن. ءبىزدىڭ جىلاۋىمىزعا، قول قۋسىرىپ وتىرۋىمىزعا نەگىز جوق. شىعارماشىلىعىمىز، ءوزىمىزدىڭ ستۋديامىز بار. بەيبىتشىلىكتىڭ ارقاسىندا از-كەم جەتىستىكتەرگە جەتتىك. سوعان شۇكىرشىلىك قىلامىز»، - دەيدى مايعازيەۆ.
توپتىڭ تاعى ءبىر ءسوليسى كەنجەبەك ءجانابىلوۆ ونەر ادامىنىڭ ساياساتقا ەش قاتىسى بولماعاندىقتان، دوللاردىڭ كوتەرىلگەنى نەمەسە تۇسكەنى قاتتى اسەر ەتپەيتىنىن ايتادى.
«ءبىز قانشا تابىس تاپساق، سوعان شۇكىرلىك ەتەمىز. ەڭ باستىسى ەلىمىز امان، جۇرتىمىز تىنىش بولسىنشى. باسقا مەملەكەتتەرگە قاراعاندا، اللاعا شۇكىر ءبىزدىڭ ەلىمىزدىڭ كيىمى ءبۇتىن، تاماعى توق دەپ ويلايمىن»، - دەيدى كەنجەبەك.
«ارينە، وسى جىلى قارجىمىز ازايدى، ءبىراق بۇل ماڭىزدى ەمەس. اقشا جوق دەپ ءبىز ونەردى تاستاپ كەتپەيمىز عوي. ونەر ادامى بولىپ تۋىلعان سوڭ، ونەردى سوڭىنا دەيىن دارىپتەۋىمىز كەرەك»، - دەپ ويىن تۇيىندەدى ءانشى.
ايگۇل يمانبايەۆا مەملەكەتتە بولىپ جاتقان نارسە ارتىستەرگە دە اسەر ەتەتىنىن مەڭزەدى. ءبىراق اكتريسا ماسەلەنىڭ ءبارىن جىكتەپ وتىرۋدى ءجون سانامادى.
