ماڭعىستاۋلىق دارىگەرلەر بۇرىن-سوڭدى بولماعان ەرەكشە ءارى اۋىر وتا جاسادى

استانا. قازاقپارات - ماماندار وڭەشىنىڭ جارتىسى جوق بولىپ تۋىلعان ءسابيدىڭ اۋىزقۋىسى مەن قارىن اراسىنداعى وڭەشىن تىلىكسىز جالعاپ، امان الىپ قالدى.

بۇل تۋرالى 31- ارنا حابارلادى.

جەرگىلىكتى دارىگەرلەردىڭ شەبەرلىگىنە پروفەسسورلاردىڭ ءوزى تاڭ قالىپ وتىر. ويتكەنى، وڭەشى بىتەلىپ تۋعان بالالاردىڭ 90 پايىزى اۋىر وپەراتسيانى كوتەرە الماي، شەتىنەپ كەتەدى ەكەن.

تۇرار ەسىمدى ءسابيدىڭ ومىرگە كەلگەنىنە بۇگىن تۋرا 21 كۇن بولدى. تىنىسى تارىلىپ، ءسۇت ىشە المايتىن. وڭەشى اسقازانىنا جەتپەي بىتەلىپ تۋعان. اسا اۋىر جاعدايداعى بالالارعا ەشقاشان وتا جاساپ كورمەگەن دارىگەرلەر بۇعان دەيىن ناۋقاستاردى الماتى، استاناداعى ورتالىقتارعا جىبەرەتىن. بۇل جولى بەل بۋىپ، ءوز كۇشتەرىمەن العاش رەت قيىن وتانى جاساپ شىققان.

«وپەراتسيا ءوز الدىنا قيىن بولدى. وڭەش ءبىر-بىرىنە جالعانىپ، وتا ءساتتى ءوتتى. ءوزى دەمالادى، ءوزى تاماق ىشەدى»، -  دەيدى م و بالالار اۋرۋحاناسىنىڭ حيرۋرگى قۇرمان قايرانوۆ.

وتاعا دەيىن تۇراردىڭ سالماعى ءۇش كەلى بولعان. قازىر 500 گرام قوسىپتى. اناسى پەرزەنتىنىڭ اۋىر وتادان امان قالعانىنا ءالى سەنە الار ەمەس. العاشىندا جەرگىلىكتى دارىگەرلەردىڭ قادامىنا كۇدىكپەن قاراعانىن جاسىرمايدى.

«نەشە ءتۇرلى وي كەلدى. بالامدى امان الىپ قالا ما ەكەن دەپ قورىقتىم ءبىراز»، -  دەيدى وتا جاسالعان تۇراردىڭ اناسى ۇلمەكەن ابىلايەۆا.

جىل سايىن ماڭعىستاۋدا 20 عا جۋىق بالا تۋا بىتكەن ءتۇرلى اقاۋمەن ومىرگە كەلەدى. سونىڭ كەسىرىنەن بالالاردىڭ 90 پايىزى ءولىپ كەتەدى دەيدى. سوندىقتان دەنساۋلىق ساقتاۋ باسقارماسى بالالار اۋرۋحاناسى جانىنان وسى دەرتكە شالدىققان نارەستەلەرگە اۋىر وتا جاسايتىن ارنايى نەونتالدى حيرۋرگيا ءبولىمىن اشقان. سونىڭ ناتيجەسىنەن ءبىر جىل ىشىندە ءولىم-ءجىتىم 25 پايىزعا تومەندەگەن.