ق ر اۋىر اتلەتيكا فەدەراتسياسى دوپينگ داۋىنا بايلانىستى ءوز تەرگەۋىن جۇرگىزەتىن بولادى

الماتى. قازاقپارات- ق ر اۋىر اتلەتيكا فەدەراتسياسى دوپينگ- باقىلاۋ بويىنشا جاسۇلان قىدىربايەۆ، ەرمەك ءومىرتاي جانە الماس وتەشوۆتەن الىنعان «ا» سىناماسىنان تىيىم سالىنعان پرەپاراتتىڭ تابىلۋىنا بايلانىستى ق ر مادەنيەت جانە سپورت مينيسترلىگىمەن بىرلەسىپ، تەرگەۋ جۇمىستارىن باستادى.

بۇل تۋرالى بۇگىن اتالمىش فەدەراتسيانىڭ باسپا ءسوز قىزمەتىنەن حابارلادى.

دوپينگ-سىناما سپورتشىلاردان تاياۋدا ا ق ش- تىڭ حيۋستون قالاسىندا وتكەن الەم چەمپيوناتىنان كەيىن ىلە-شالا الىنعان بولاتىن. ولار وسى بىرىنشىلىكتە جۇلدەلى ورىندارعا قول جەتكىزگەن ەدى.

ەندى تەرگەۋدىڭ بارلىق ماتەريالدارى جانە بىرلەسكەن كوميسسيانىڭ قورىتىندىسى حالىقارالىق اۋىر اتلەتيكا فەدەراتسياسىنا جىبەرىلەدى جانە وسى ۇيىمنىڭ تارتىپتىك كوميسسياسىنىڭ كەزەكتەن تىس وتىرىسىندا قارالاتىن بولادى. وسى جيىندا قازاقستاندىق اتلەتتەرگە نەمەسە ولاردىڭ سپورت- مەديتسينالىق ورتاسىنا قوسىمشا تارتىپتىك جازا قولدانۋ نەمەسە ونى جۇمسارتۋ نەمەسە ءتىپتى جازانى الىپ تاستاۋ تۋرالى شەشىم قابىلدانۋى مۇمكىن.

«دوپينگپەن كۇرەس - ءبىزدىڭ فەدەراتسيا جۇمىسىنىڭ باسىمدى باعىتتارىنىڭ ءبىرى. ءبىز جىل سايىن ءار ءتۇرلى جاستاعى زىلتەمىرشىلەر مەن ولاردىڭ سپورتتىق ورتاسىنا ارناپ، كوپتەگەن وقىتۋ سەمينارلارىن جۇرگىزەمىز. بيىل زىلتەمىرشىلەر اراسىندا 6 سەمينار جانە 186 جەكە اڭگىمە جۇرگىزىلدى.

ءبىز دوپينگكە قارسى قازاقستاندىق زەرتحانامەن بىرلەسىپ، اتلەتتەرىمىزدى ءجيى تەكسەرىپ تۇرامىز. مىسالى، بيىل - 2015 -جىلى دوپينگ- باقىلاۋ بويىنشا 418 زىلتەمىرشىدەن سىناما الىنعان بولاتىن. ولاردىڭ التاۋى - وڭ ناتيجە بەردى.

ءبىز دوپينگتىڭ ابىروي دا جەڭىس تە اپەرمەيتىندىگىن سپورتشىلارعا ءجيى ايتامىز. سوندىقتان، تاجىريبەلى سپورتشىلارىمىز - الماس وتەشوۆ، جاسۇلان قىدىربايەۆ جانە ەرمەك ءومىرتايدىڭ جارىستارعا ۋاقىتشا قاتىسۋ قۇقىعىنان ايرىلۋى جانە ولاردىڭ تىيىم سالىنعان پرەپاراتتاردى قابىلداۋلارىنا بايلانىستى كۇدىكتى دەپ تانىلعاندارىنا ءبىز قاتتى كۇيىنىپ وتىرمىز.

مونرەال زەرتحاناسى بۇگىندە الەمدەگى ەڭ ۇزدىك زەرتحانا ەكەنى بەلگىلى. سوندىقتان، ونىڭ شەشىمىنە نارازىلىق ءبىلدىرۋ بۇگىنگى تاڭدا مۇمكىن بولماي وتىر. دەگەنمەن، ءبىز اتلەتتەرىمىزدىڭ ادال ەكەندىكتەرىنە ءشۇبا كەلتىرمەيمىز جانە ولاردى قورعاۋعا بارىنشا كۇش سالامىز.

سپورتشىلارىمىزعا قاتىستى دوپينگ- سىنامانىڭ وڭ ناتيجە بەرگەندىگى ءبىز ءۇشىن بارىپ تۇرعان سوراقى دەرەك، بۇل جەردە بىرەۋدىڭ كورىنەر- كوزگە قاتەلىك جىبەرگەنى كورىنىپ- اق تۇر. بۇعان ءبىزدىڭ جىگىتتەردىڭ ەشقانداي قاتىسى جوقتىعىنا سەنىمدىمىز. ءبىز جاعدايدى انىقتاۋ ءۇشىن قولدان كەلگەننىڭ بارلىعىن جاسايمىز جانە ءبىزدىڭ اتلەتتەردىڭ تاماعىنا نەمەسە دارۋمەندەرىنە تىيىم سالىنعان پرەپاراتتىڭ سالىنۋىنا سەبەپشى بولعان تۇلعالاردى اشكەرەلەۋگە بارىنشا كۇش سالامىز. ەگەر كىنالى ازامات اتلەتتەردىڭ ءوز اينالاسىنان تابىلار بولسا. وندا حالىقارالىق اۋىر اتلەتيكا فەدەراتسياسىمەن بىرلەسە وتىرىپ، مۇنداي ادامدى سپورتتان مۇلدەم الاستاتۋ جانە سپورت جارىستارىنا قاتىسۋ قۇقىعىنىن ايىرۋ تۋرالى شەشىم قابىلدايمىز»، - دەدى وسىعان وراي ق ر اۋىر اتلەتيكا فەدەراتسياسىنىڭ باس حاتشىسى ومار مۇستافين.

اۆتور: جاپپاربەرگەن ايبوتا