اياز اتا مەن اقشاقار جاڭا جىل كەشتەرىندە - فوتورەپورتاج

استانا. قازاقپارات - جاڭا جىل قارساڭىندا قازاقستاننىڭ تۇكپىر- تۇكپىرىندە بالالارعا ارنالعان شىرشاتويلار وتكىزۋ ءداستۇرى بيىل دا ەرەكشە جاعدايدا جالعاستى.

مەرەكەلىك شارالار بالالار ءۇشىن ۇمىتىلماس ساتكە اينالىپ، ءار ءبۇلدىرشىن تاتتىلەر مەن سىيلىقتارعا يە بولدى.

بالالار ەسىندە ۇزاق ۋاقىت ساقتالاتىن وسىنداي جاڭا جىلدىق مەرەكەلىك شارالار استاناداعى مەكەمەلەردە دە جالعاسقان بولاتىن. ماسەلەن، ەلوردادا وتكەن پرەزيدەنت شىرشاسى «جىبەك جولىنداعى جاڭا جىلدىق ەرتەگى» اتتى كوڭىلدى دۋمانمەن اسەرلى ءوتتى. مەرەكەنى اسىعا كۇتكەن بالاقايلاردى الدىمەن مەملەكەت باسشىسى نۇرسۇلتان نازاربايەۆ بەينەجولداۋ ارقىلى قۇتتىقتادى.

«ءبىز سەندەردىڭ سپورتپەن شىنىققان، ساپالى ءبىلىم العان، رۋحاني تولىسقان ازامات بولعاندارىڭدى قالايمىز. بۇل - ءاربىر اتا- انانىڭ عانا ەمەس، سۇيىكتى وتانىمىزدىڭ، كۇللى قازاق ەلىنىڭ قالاۋى. قازاقستان بۇگىندە الەمگە بەيبىت ءارى جاسامپاز ەل رەتىندە تانىلدى. مەملەكەتىمىزدىڭ الەم الدىنداعى بەدەلىن ارتتىرۋعا وزدەرىڭ دە ەسەيگەندە ۇلەس قوساسىڭدار دەپ سەنەمىن. ويتكەنى، سەندەر - رۋحى بيىك، تاۋەلسىز ەلدىڭ زەرەك تە زەردەلى ۇرپاعىسىڭدار! مەن بارىڭە مىقتى دەنساۋلىق، جارقىن بولاشاق تىلەيمىن. جاڭا جىلدارىڭ قۇتتى بولسىن، اينالايىندار!» - دەدى نۇرسۇلتان نازاربايەۆ.

جاڭا جىلدىق كونسەرتتىك باعدارلاما كەشىندە ەرتەگى كەيىپكەرلەرى تەاترلاندىرىلعان قويىلىم قويىپ، ءتۇرلى كونكۋرستارمەن بالالاردى قىزىققا بولەدى. بالالار وقۋشىلار سارايىنداعى پلانەتاريي مەن ينتەراكتيۆتى ساياباقتى ارالاپ، قىدىردى. ءار بالا مەملەكەت باسشىسىنىڭ اتىنان مەرەكەلىك سىيلىق الدى.

ەلباسى شىرشاسىنىڭ كەشىنە الماتىلىق وزات وقۋشىلار دا ءتانتى بولدى. وندا قالانىڭ جالپى ءبىلىم بەرەتىن مەكتەپتەرىندە وقيتىن 200 وقۋ وزاتى قاتىستى. بالالارعا ارنالعان باعدارلامانى ەرتەگى كەيىپكەرلەرى عانا ەمەس، قازاقستاندىق ارتىستەر دە جانداندىردى. وقۋشىلاردىڭ بارلىعى قر پرەزيدەنتىنەن الدى، وندا: سپورتتىق كيىمدەر، كىتاپتار، پلانشەتتەر جانە وقۋعا قاجەتتى قۇرالدار بار.

ال قاراعاندىدا پرەزيدەنتتىك شىرشا تويىنا قاتىسۋشىلارعا دا پلانشەتتەر مەن سەرتيفيكاتتار تابىس ەتىلدى. اسىعا كۇتكەن مەرەكەلىك شاراعا وڭىردەگى بالالار ۇيلەرىنىڭ تاربيەلەنۋشىلەرى، از قامتىلعان وتباسىلاردىڭ بالالارى، وقۋ ۇلگەرىمى جاقسى جەتكىنشەكتەر مەن ءتۇرلى كونكۋرستار مەن بايقاۋلار جەڭىمپازدارى قاتىستى. 180 نەن استام بالالار جاسىل شىرشانى اينالا ءان سالىپ، اياز اتامەن، اقشاقارمەن بىرگە كوڭىل كوتەردى.

ال شىمكەنتتەگى پرەزيدەنتتىك شىرشاتويدا بالالارعا نوۋتبۋكتەر مەن كىتاپتار سىيعا بەرىلدى. جاڭا جىلدىق شوۋ- باعدارلاماعا وبلىستىڭ بارلىق وڭىرىنەن كەلگەن 200 گە تارتا ءبۇلدىرشىن قاتىستى. ءوڭىردىڭ شىعارماشىلىق ۇجىمى تاماشا تەاترلاندىرىلعان قويىلىم ۇسىنىپ، وندا اعىمداعى جىلى ەل بولىپ اتقارىلعان مەرەيتويلىق شارالار دا كورىنىسكە ارقاۋ بولدى. ماسەلەن، تەاترلاندىرىلعان قويىلىم بارىسىندا قازاق حاندىعىنىڭ 550 جىلدىعى، ۇلى جەڭىستىڭ 70 جىلدىعى، اتا زاڭ مەن قازاقستان حالقى اسسامبلەياسىنىڭ 20 جىلدىعى سەكىلدى شارالار تۋرالى بالالارعا ۇعىنىقتى قويىلىمدار قويىلدى.

شىعىس قازاقستان وبلىسىنداعى پرەزيدەنتتىك شىرشاعا 300 بالا قاتىستى. وندا جەتىم، اتا-انا قامقورلىعىنسىز قالعان بۇلدىرشىندەر، از قامتىلعان جانە كوپ بالالى وتباسىنىڭ بالالارى، سونداي- اق، تالانتتى وقۋشىلار مەن وقۋدا، سپورتتا، شىعارماشىلىق جانە قوعامدىق ومىردە ەرەكشە كوزگە تۇسكەن بالاقايلار باس قوستى.

پەتروپاۆلداعى پرەزيدەنت شىرشاسىندا تاۋەلسىزدىك حانشايىمى اقوردا بەينەلەنگەن ءتاج كيدى. وبلىستىڭ بارلىق وڭىرلەرىنەن كەلگەن 9 جانە 13 جاستاعى بالالار قالاداعى سپورت سارايىندا وتكەن مەرەكەلىك شارانىڭ كۋاگەرىنە اينالدى. ەرتەگىلەر ەلىندەگى كەيىپكەرلەرگە ۇقساپ كيىنگەن ولاردىڭ ءارقايسىسىنا مەملەكەت باسشىسى اتىنان نوۋتبەك پەن تاتتىلەر سىيلاندى

جامبىل وبلىسىنداعى 200 بالاقاي دا پرەزيدەنت شىرشاسىنىڭ قىزىعىنا بولەندى. وبلىس اكىمى كارىم كوكىرەكبايەۆ ەلباسى اتىنان بالالارعا وقۋدا تابىس تىلەپ، مەملەكەت باسشىسىنىڭ سىيلىعىن، نوۋتبۋك پەن ويىنشىقتاردى، تاتتىلەردى تاپسىردى.

شىرشا تويىنىڭ تاريحىنا كەلسەك، ەڭ العاش جاڭا جىل مەرەكەسىن اتاپ ءوتۋ مەسوپوتاميدا بولىپتى. تاريحشى عالىمداردىڭ پىكىرىنشە، العاشقى جاڭا جىل ءبىزدىڭ ەرامىزعا دەيىنگى ءۇشىنشى مىڭجىلدىقتا تويلانعان. ال يۋلي سەزار ەنگىزگەن جاڭا كۇنتىزبە (يۋليان كۇنتىزبەسى) بويىنشا جاڭا جىلدىڭ العاشقى كۇنى رەتىندە ءبىرىنشى قاڭتار بەلگىلەنگەن بولاتىن.

                               

اۆتور: قانات مامەتقازى ۇلى