كەلەر جىلى قازاقستاندا باعاسى ءتيىمدى باسپانالار كوبەيەدى
سولنسيەۆتار وتباسى ءار كەلگەن قوناققا ريزا. كۇلىمدەپ قارسى الىپ، توردەن ورىن بەرەتىن اۋلەتتىڭ قوناقجايلىلىقتارىن بايقاماۋ مۇمكىن ەمەس. بىرنەشە جىلدار بويى پاتەر جالداپ كەلگەن جانۇيا جاقىندا عانا «تۇرعىن ءۇي قۇرىلىس جيناق بانكى» ارقىلى باسپانا الىپ، ارماندارىنا قول جەتكىزگەن. ەكى بالاسى بار وتباسىنىڭ جيناعان قارجىلارى پاتەر الۋعا جەتپەگەن سوڭ، بانكتەن دەپوزيت اشادى.
«دەپوزيتتە جينالعان اقشامىز از بولدى. پاتەر الامىز دەپ ۇمىتتەنبەگەن ەدىك. كۇتپەگەن جەردەن تەلەفونعا حابارلاما كەلدى. «تۇرعىن ءۇي جيناق قۇرىلىس بانكىندەگى» باعدارلاماعا قاتىسا الاسىزدار دەگەن. بارىپ، كەڭەسىپ كورىپ، قاتىسىپ كورەيىك دەدىك. 150 پاتەرگە 179 بولىپ تىركەلدىك. اقىرى جولىمىز بولىپ، وسى پاتەر بۇيىردى. 2014 -جىلى قولىمىزداعى اقشا بار، دەپوزيتتەگى بار بارلىعىن قوسىپ، تولەپ بىتىردىك. قازىر بانك الدىندا قارىزىمىز جوق. ءوزىمىز قوجايىنبىز» - دەيدى ۆياچەسلاۆ سولنتسەۆ، الماتى قالاسىنىڭ تۇرعىنى.
«تۇرعىن ءۇي قۇرىلىس جيناق بانكىنىڭ» وڭىرلەردى دامىتۋدىڭ 2020 -جىلعا دەيىنگى مەملەكەتتىك باعدارلاماسى اياسىندا «تۇرعىنداردىڭ بارلىق كاتەگورياسىنا ارنالعان باسپانا» مەن «جاس وتباسىلارعا ارنالعان باسپانا» باعىتتارىن جۇزەگە اسىرىپ كەلەدى. بيىلعى جىلدىڭ وزىندە حالىققا قولجەتىمدى باسپانا ۇسىنۋ باعدارلاماسىندا 40 ميلليارد تەڭگە رەكوردتى قارجى بولىنگەن. ونىڭ 20 ميلليارد تەڭگەسى بيۋدجەتتەن بەرىلگەن بولسا، قالعان ەلۋ پايىزى ۇلتتىق قوردان. ايماقتاردى دامىتۋ باعدارلاماسىنىڭ نەگىزىندە 2020 -جىلعا دەيىن جالپى اۋماعى ءۇش ميلليون شارشى مەترگە جۋىق پاتەرلەر قولدانىسقا بەرىلمەك.
باعدارلامانى جۇزەگە اسىرۋداعى ەكى باعىت بويىنشا 2012 -جىلدان بەرى 17636 قازاقستاندىق وتباسى باسپانالى بولعان. قولدانىسقا بەرىلگەن پاتەرلەردىڭ جالپى اۋماعى - 1 ميلليون شارشى مەتردى قۇرايدى. ال بيىلعى جىلى اتالعان باعىتتار نەگىزىندە جەرگىلىكتى اتقارۋشى ورگاندارمەن اۋماعى 650 مىڭ شارشى مەتر بولاتىن 10500 پاتەر سالۋ بويىنشا كەلىسىمگە قول قويىلعان. ولاردىڭ ىشىندە 2015 -جىلى 415 مىڭ شارشى مەترى قولدانىسقا بەرىلىپ ۇلگەرىلدى. قالعان بولىگى كەلەسى جىلدىڭ باسىندا سالىنىپ بىتپەك.
بۇدان بولەك قاراپايىم حالىققا نەگىزدەلگەن جاڭا، قولايلى باسپانالاردىڭ باعاسى دا قولجەتىمدى. قازىردىڭ وزىندە كەلىسىم بويىنشا بەلگىلەنگەن پاتەر قۇنى تەڭگەمەن بەكىتىلگەن. باعا دا وڭىرلەرگە بايلانىستى. ءبىر شارشى مەترىنە 90000 - 142500 تەڭگە ارالىعىندا.
«تۇرعىن ءۇي قۇرىلىس جيناق بانكىنىڭ» «قولجەتىمدى باسپانا - 2020» مەملەكەتتىك باعدارلاماسى ارقاسىندا باسپانالى بولعىنى كەلگەن 400 گە جۋىق وتباسى ءدال وسى ۇيلەردەن پاتەر الىپ، ارماندارىنا جەتكەن. 2013 -جىلى العاش قولدانىسقا بەرىلە باستاعان ۇيلەردە بۇگىندە 100 پايىز تۇرعىندار تۇرىپ جاتىر.
بانكتىڭ وزگە دە ميلليونداعان سالىمشىلارى كەلەر جىلدان باسپانالى بولۋعا ءۇمىتتى.
