ماسكەۋدە وقيتىن قازاقستاندىق رەسەيلىكتەردىڭ وزىنە دەگەن قيىن قارىم- قاتىناسى تۋرالى باياندادى

استانا. قازاقپارات - ماسكەۋدەگى ونەر مەكتەبىندە وقيتىن قازاقستاندىق ءانۋار مۇسىرەپوۆ رەسەيدەگى ستۋدەنتتىك ءومىرى مەن قيىندىقتارى تۋرالى باياندادى.

بۇل تۋرالى esquire.kz كە سىلتەمە جاساپ NUR. KZ حابارلايدى.

«ماسكەۋدە جىلىنا 450 مىڭ رۋبلدىق وقۋ مەن ءۇشىن تەگىن بولدى. الايدا، جاتاقحانا مەن ستيپەنديا قاراستىرىلماعان. سوندىقتان باسپانا ىزدەپ ءبىراز سابىلدىم. اقىرى ءبىر بولمەدە 10 ادام تۇراتىن حوستەلدە تۇرۋدان باسقا امال قالمادى. حوستەلدە ازيات بولا تۇرىپ، زامانۋي ونەرمەن اينالىسۋ وڭاي ەمەس. تەلەديدار قاسىندا اڭگىمەلەسىپ قالعاندا، ۇلتتىق ماسەلەگە قاتىستى تالاي رەت ءسوز قايتارۋىما تۋرا كەلگەن. نەشە ءتۇرلىنى ەستۋگە ءماجبۇر بولاسىڭ، ولاردى سوزبە-ءسوز تىزبەكتەيتىن بولسام، ۇلتارالىق ارازدىق تۋدىرعانىم ءۇشىن تۇرمەدەن ءبىر-اق شىعاتىن ەدىم. ماسكەۋگە كەلگەنگە دەيىن ۇلتتىق ماسەلە مەنى مۇنشالىق الاڭداتتىرعان ەمەس»، - دەپ ءسوزىن باستادى ستۋدەنت.

جىگىت ماسكەۋدە كەلبەتىنە بولا ءبىراز قينالعانىن ەسىنە الدى.

«ماسكەۋدە ءبارى مەن ويلاعاننان قيىنىراق بولدى. ءتىپتى پاتەر ىزدەۋ كەزىندە دە شي شىقتى. بارلىق جالعا بەرۋشىلەر پاتەرىن تەك «سلاۆياندىق بەت-الپەتتەگى ادامدارعا» بەرەتىنىن العا تارتتى. ال مەن بۇل شارتتارىنا سايكەس كەلمەيتىن بولىپ شىقتىم. قالاي كيىنگەنىڭە قاراماستان، پوليتسەيلەردىڭ قاشان دا نازارىنا تۇسەتىنىڭە ۇيرەنۋگە تۋرا كەلەدى. وزىڭمەن بىرگە تىركەۋ مەن پاسپورتتى مىندەتتى تۇردە الىپ ءجۇرۋىڭ كەرەك»، - دەپ جالعاستىردى ول.

ال ونەرگە كەلگەندە جىگىت، كەرىسىنشە قازاقتارعا ۇلكەن سىيلاستىق بارىن سەزىنگەن.

«قازاقستاندىق سۋرەتشىلەرگە مۇندا ەرەكشە قىزىعۋشىلىقپەن جانە قۇرمەتپەن قارايدى. باستى قاتىسۋشىلار اراسىندا بىردەن ەكى قازاقستاندىق سۋرەتشى - الماگۇل مەڭلىبايەۆا مەن الەكساندر ۋگاي بولدى. ءبىر قىزىعى قازاقستاندىق ب ا ق بۇل جاڭالىققا ءمان بەرمەي، رەپەر سايلاۋبەكتىڭ شىعارماشىلىعىن كوبىرەك تالقىلادى»، - دەپ اعىنان جارىلدى ءانۋار.