شىمكەنتتە مۇگەدەكتەر ارباسىنا تاڭىلعان ءبۇلدىرشىن اياز اتادان اياعىنا جان ءبىتىرۋىن سۇرادى

استانا. قازاقپارات - شىمكەنتتە اياق- قولىنىڭ قوزعالىسى بۇزىلىپ، قول ارباعا تاڭىلعان ءبۇلدىرشىن اياز اتاعا ارمانىن ايتىپ، حات جازدى.

الايدا نازەركە ايمۇراتوۆانىڭ ارمانى مۇلدەم باسقا. ول وزگەلەر سەكىلدى اياز اتادان تاتتىلەر مەن ويىنشىق تىلەمەيدى دەپ حابارلادى «ت ۆ ك» ارناسى.

«مەن دە تەزىرەك قايتا اياققا تۇرعىم كەلەدى. قۇربىلارىممەن مەكتەپكە بارىپ، وقىعىم كەلەدى. قازىر مەندە ارالاساتىن سىنىپتاستارىم جوق. اياز اتا ماعان سىيلىق قاجەت ەمەس، تەك دەنساۋلىق كەرەك. ءسىز ماعان كومەكتەسىڭىزشى. مەنىڭ قايتا اياققا تۇرۋىما كومەكتەسەتىن جاقسى دارىگەرلەر تاۋىپ بەرىڭىزشى»، - دەپ جازعان بالاقاي ءوز حاتىندا.

كەزىندە شاپقىلاپ اسىر سالىپ جۇرگەن نازەركە ءبىر ءتۇننىڭ ىشىندە سال بولىپ قالادى. اناسى پەرزەنتىنە ەم ىزدەپ، تالاي ەمشى مەن ەمحانانىڭ تابالدىرىعىن توزدىرعان. ءبىراق، قىزىنىڭ دەرتىنە شيپا دارىماي وتىر.

دارىگەرلەر نازەركەگە وتە سيرەك كەزدەسەتىن «نەرو- ينفەكسيالىق» دياگنوز قويعان. دەسە دە، اتا-اناسى دياگنوزدىڭ دۇرىس قويىلعانىنا كۇمانمەن قارايدى. سەبەبى، قابىلداعان ەمدەرى ەش ناتيجە بەرمەگەن.

نازەركەنىڭ اتا-اناسى شىمكەنتتىڭ شەتىندەگى شۇبارسۋ اۋىلىندا تۇرادى. كەلىنشەك قىزىنىڭ ەمىنە قولايلى بولۋ ءۇشىن قالادان پاتەر جالداپ تۇرۋعا ءماجبۇر. قازىرگى ۋاقىتتا بۇل وتباسى قولداۋدىڭ قانداي تۇرىنە بولسا دا ءزارۋ.

دەرەككوز: NUR. KZ