قازاق عالىمىنىڭ تىڭ جاڭالىعى امەريكادا قولداۋ تاپتى
ا ق ش- تا وتكەن حالىقارالىق فورۋمعا كومىرسۋتەكتىڭ جانۋ پروبلەمالارى بويىنشا ينستيتۋت ديرەكتورى زۇلحاير مانسۇروۆ اعىلشىن تىلىندە بايانداما ازىرلەگەن. تاقىرىبى «اۋىر شيكى كومىرسۋتەكتىڭ وڭدەلۋ جولدارى» دەپ اتالادى. ياعني، وتاندىق عالىمدار كومىرسۋتەكتى وڭدەۋ كەزىندە قورشاعان ورتاعا ونىڭ زالالىن تيگىزبەۋ ءۇشىن ارنايى ءادىس ويلاپ تاپقاندارىن ايتادى. بۇل جاڭالىققا سىرتتاي قىزىعۋعا بولاتىن وزىندىك سەبەبى بار. ويتكەنى ترانسۇلتتىق كومپانيالاردىڭ بارلىعى بىردەي بۇل سالاداعى جەتىستىكتەرىمەن بولىسە بەرمەيدى. قازاق عالىمدارىنا ءۇمىت ارتقان امەريكالىق ارىپتەستەرى جەتەكشى جوعارى وقۋ ورىندارىمەن بايلانىس ورناتۋعا دا مۇددەلى بولىپ وتىر.
زۇلحاير مانسۇروۆ، ق ر كومىرسۋتەكتىڭ جانۋ پروبلەمالارى ينستيتۋتىنىڭ ديرەكتورى: - اتلانتا قالاسىندا مۇناي- حيميا بويىنشا سيمپوزيۋم ءوتتى. وندا مۇناي ءوندىرۋ، وڭدەۋ بويىنشا جەتەكشى ەلدەردىڭ وكىلدەرى بولدى. بۇل ءبىز ءۇشىن وتە ماڭىزدى. سەبەبى ەلباسى وسى سالا بويىنشا PhD باعدارلاماسىن ەنگىزۋگە قولداۋ بىلدىرگەن بولاتىن. باعدارلاما نەگىزىندە پروفەسسوردىڭ ءدارىسىن تىڭداۋعا مۇمكىندىك تۋادى. ءبىر جاعىنان اعىلشىن تىلىندە جاتىق سويلەيسىڭ، تەرەڭ تۇسىنەسىڭ، ەكىنشىسى، اعىلشىن تىلىندە ماقالا جازىپ، ونى گازەت، جۋرنالدارعا شىعارۋىڭا بولادى. باسپادا جارىق كورگەن ماقالا مامانداردىڭ اراسىندا دايەكسوزگە اينالارى حاق.
