استانانىڭ «بارىسى» ماسكەۋدىڭ اتىشۋلى كومانداسىن تىزە بۇكتىردى - فوتو
Vesti.kz سايتىنان الىنعان مالىمەتكە قاراعاندا، اندرەي نازاروۆتىڭ شاكىرتتەرى ويىن تىزگىنىن بىردەن قولعا الدى. ەكىنشى مينۋت باستالىسىمەن-اق رومان ساۆچەنكو قوناقتاردىڭ قاقپاشىسى ۆيكتور فاستى قاپى قالدىردى. جەتى مينۋتتان كەيىن رومان ستارچەنكو ءبىر ويىنشىنىڭ ارتىقتىعىن پايدالانىپ، قاقپاشىمەن جەكەدارا شىعىپ، بۇرىشتى ءدال كوزدەدى.
ەكىنشى كەزەڭ باسى «بارىس» پەن ت س ك ا- نىڭ شابۋىلشىلارى كونستانتين پۋشكاريەۆ پەن يان مۋرشاكتىڭ توبەلەسىمەن ەستە قالدى. ءسويتىپ ەكەۋى دە دورەكىلىگى ءۇشىن ءتورت مينۋتقا ايدىننان قۋىلدى. ەكىنشى كەزەڭ سوڭىنا تامان «بارىستىڭ» ويىنشىسى مارتەن سەن-پەر ەسەپتى 3:0 گە جەتكىزدى. الايدا ت س ك ا ويىنشىلارى سەرگەي اندرونوۆ پەن يان مۋرشاك نەبارى ءبىر جارىم مينۋت ىشىندە «بارىستىڭ» قاقپاسىنا ەكى گول سالىپ ۇلگەردى.
ءۇشىنشى كەزەڭنىڭ باسىندا «بارىستان» مايك لاندين تاعى ءبىر ويىنشىنىڭ ارتىقتىعىن ءساتتى پايدالانىپ، ەسەپتى 4:2 گە جەتكىزدى. ت س ك ا سوڭعى مينۋتتا ستەفان دا كوستانىڭ مەرگەندىگى ارقاسىندا ەسەپتى قىسقارتقانىمەن، ودان ارىگە شاماسى جەتپەدى.
ەڭ باستىسى، «بارىس» چەرەپوۆەتستىڭ «سيەۆەرستال» كومانداسىمەن وتكەن ويىنداعى قاتەلىكتەرىن قايتالاماي، ق ح ل- دىڭ ەڭ مىقتى كلۋبتارىنىڭ بىرىنەن تايسالماي، جەڭىسكە دەگەن جىگەرى مەن قايسارلىقتارىن كورسەتە ءبىلدى. استانالىقتاردىڭ باس باپكەرى اندرەي نازاروۆ ءوز كومانداسىنىڭ بارلىق كەزدەسۋلەردە ءدال وسىلاي ويناسا، پلەي-وفف كەزەڭىنە شىعۋ ماسەلەسىنىڭ شەشىلەتىنىن اتاپ كورسەتتى.
وسى ماڭىزدى جەڭىستەن كەيىن «بارىس» 46 ويىننان كەيىن 64 ۇپاي جيناپ، شىعىس كونفەرەنتسياسىندا جەتىنشى ورىنعا كوتەرىلدى. ايتسە دە سەگىزىنشى جانە توعىزىنشى ورىنداعى «اۆتوموبيليست» (ەكاتەرينبۋرگ) پەن «نەفتەحيميك» (نيجنەكامسك) كوماندالارىنىڭ دا 64 تەن ۇپايلارى بار ءارى وتكىزگەن ويىندارى كەم (سايكەسىنشە 44 جانە 43 ويىن). بۇل پلەي-وفف باسەكەسىنە قاتىسۋعا مۇمكىندىك بەرەتىن العاشقى سەگىزدىككە ەنۋ ءۇشىن شايقاستىڭ الدا ەكەندىگىن كورسەتەدى. «بارىس» كەلەسى كەزدەسۋىن استانادا 3- قاڭتار كۇنى «يۋگرا» (حانتى-مانسيسك) كومانداسىمەن وتكىزەدى.
ايتا كەتەيىك، «بارىستىڭ» تۇراقتى چەمپيونات بارىسىندا ەندى 14 ويىنى قالسا، سونىڭ تەڭ جارتىسىن ءوز ايدىنىندا، قالعانىن باسقا قالالاردا وتكىزەدى. وسى كەزدەسۋلەرىندە ءساتتى ويناپ، ۇپايدى كوبىرەك جيناسا، باستى قارسىلاستارى «اۆتوموبيليست» پەن «نەفتەحيميكتەن» وزۋعا مۇمكىندىگى مول. بۇل رەتتە «بارىس» پەن «نەفتەحيميكتىڭ» اراسىندا استانادا وتەتىن ماتچ ءبىراز ماسەلەنىڭ باسىن اشىپ بەرمەك.
