الماتى وبلىسىندا اڭ تەرىسىن وڭدەۋ بويىنشا جاسىرىن سەح انىقتالدى
قازىر زاڭسىز كاسىپپەن اينالىستى دەگەن كۇدىكپەن جاركەنت قالاسىنىڭ ەكى تۇرعىنى جاۋاپكەرشىلىككە تارتىلۋدا. ولار جازدىڭ باسىندا باعالى اڭ تەرىلەرىن دايىنداپ جانە وڭدەپ، ءارى قاراي قىتايدا ساتۋ ءىسىن ۇيىمداستىرعان.
تەكسەرۋ كەزىندە پوليتسەيلەر سەح سالىق ورگاندارىندا تىركەلمەي زاڭسىز جۇمىس ىستەگەنىن انىقتادى.
كۇدىكتىلەر 48 جاستاعى ەر ادام مەن 25 جاستاعى قىز. زاڭسىز قىزمەت اعىمداعى جىلدىڭ قىركۇيەگىندە ۇستالعانداردىڭ بىرىنە قاتىستى الاياقتىق بويىنشا قوزعالعان قىلمىستىق ءىستى تەرگەۋ كەزىندە انىقتالدى. بەلگىلى بولعانداي، ەر ادام تالدىقورعان تۇرعىنىنان 5500 دانا ونداتر (سولتۇستىك امەريكادا بولاتىن تەرىسى باعالى اڭ - رەد.) تەرىسىن ارباۋ ارقىلى تارتىپ الدى دەگەن كۇدىك بار. جاپا شەككەنگە كەلتىرىلگەن ماتەريالدىق زالال 5 ميلليون تەڭگەدەن استام سوماعا باعالاندى.
زاڭسىز كاسىپكەرلىك ءىسى بويىنشا تەرگەۋدى پانفيلوۆ ا ءى ءى ب قىزمەتكەرلەرى جۇرگىزىپ جاتىر. ۇستالعاندار تەرگەۋ مەرزىمىندە ەشقايدا كەتپەۋ تۋرالى قولحاتپەن بوساتىلدى.
