اقىن ءارى قوعام قايراتكەرى جار تاڭداۋدا «ۇلكەندەرمەن اقىلداسۋعا» كەڭەس بەردى
مۇحامەدجان تازابەكوۆ ۇلكەندەردىڭ جاستاردىڭ جار تاڭداۋىنا ارالاسۋىن باستى تالاپ سانايدى. ويتكەنى تاجىريبەسى مول جاندار ومىردەن تۇيگەنىمەن ءبولىسىپ، كەڭەس بەرۋى قاجەت، دەپ جازادى «نامىس» پورتالى.
قازىر اتا- انانىڭ ارالاسۋى «بالالارىمىز بىرەر جىلدان بەرى جۇرەدى ەكەن. توي ماسەلەسىن نە ىستەيمىز؟» دەگەن جەردەن باستالادى. ەرتە باستان قۇدالاساتىن جاندى ىزدەۋ - ەسكىلىكتىڭ جۇرناعى سەكىلدى كورەمىز»، - دەيدى قايراتكەر.
اقىننىڭ ويىنشا، ۇلكەندەر جاعى قىز بالانىڭ قىلىعى كورىنىپ بويجەتە، ۇل بالا ەرجەتە باستاعان كەزدەن-اق جار تاڭداۋ ماسەلەسىن ويلانۋى كەرەك. بۇل - سۇيمەگەن ادامىنا سۇيرەتىپ بەرىپ جىبەرۋ ەمەس. كوڭىلى ءسۇيىپ كەتەتىندەي ازاماتىن تاڭداپ بەرۋ، تەكتى، سانالى، جان دۇنيەسى مەن مال دۇنيەسى سايكەس ادامداردىڭ اراسىنان قاراستىرۋ.
«كەڭەستىك ادەبيەتتى پاراقتاساق، ماجبۇرلىكپەن شالعا ۇزاتىلعان قىزداردىڭ تاعدىرى كوپ ايتىلادى. مۇنداي وقيعا كەزدەسكەن شىعار، ءبىراق كەڭەستىك يدەولوگيا ماشيناسى كورسەتكەندەي كوپ ەمەس ەدى. مالعا ساتىلىپ، جىلاپ كەتكەن قىزداردىڭ تاعدىرىن وقي بەرگەن سوڭ، پەرزەنتىمىزدى ءوزىمىز تاڭداپ ۇيلەندىرۋ داستۇرىنەن دە اجىراپ قالدىق»، - دەيدى تازابەكوۆ.
قوعامدا قازىر بالا- شاعاسىنىڭ كويلەگى كوك، تاماعى توق ەكەنىنە ءماز، ءبىراق رۋحاني اش ەكەنىن ۋايىمدامايتىن اتا- انا بار. بالاسى باسپانالى بولعانىنا قۋانادى، ءبىراق قۇدايدىڭ پاناسىندا ما؟ ۇلىنىڭ مال تاۋىپ جۇرگەنىنە ريزا، ءبىراق دوس تاۋىپ ءجۇر مە؟ دەگەن سۇراقتار مازالامايدى.
تازابەكوۆ قازىر تاريح تارازىسىندا «قازاق باي مەملەكەت بولا ما؟» دەگەن ەمەس، «قازاق ۇلت بولىپ قالا ما؟» دەگەن ماسەلە تۇرعانىن العا تارتادى. ول ۇلت بولىپ قالۋىمىز ءۇشىن ەرتەڭگى ءىزىمىز، جالعاسىمىز، مەملەكەتىمىزدىڭ قوجايىنى بولاتىن ۇرپاقتى بەسىكتەن تاربيەلەۋىمىز كەرەكتىگىن باسا ايتادى.
تانىمال تۇلعا اڭگىمە بارىسىندا ماسەلەنىڭ ءمانىن وزىمىزدەن ىزدەپ، تەرەڭنەن بويلاۋعا شاقىرادى.
«داستارقان باسىندا باس ءمۇجىپ، باتا بەرەتىن قاريا كوپ. ءبىراق اجىراسقالى جاتقان ەكى جاسقا اقىل ايتىپ توقتاتارلىق اقساقال كەم. توي باستاپ، بەتاشار ءسوز سويلەيتىن ۇلكەن كوپ. ءبىراق ەلدى باستاپ، ايتقانىن تىڭداتاتىن ۇلگىلى از. سەريال كورۋ ءۇشىن تەلەديدار پۋلتىن ۇستاعان اپا كوپ. ءبىراق تاربيە كىلتىن ۇستاپ وتىرعان اجە از»، - دەيدى تازابەكوۆ.
ال جاستىق شاعىن وكىنبەستەي وتكىزگەن جان - قارتايعان سايىن تۇلعالانا بەرەدى ەكەن.
جاس كەزىندە جۇيەلى ءبىلىم الىپ، ءدۇيىم ەل قامىنداعى ازاماتتارمەن ۇزەڭگىلەس بولعان، كوپتى كورگەن، ونى لايىقتى قورىتقان ادام جاسى ۇلعايعاندا اينالاسىنداعىلار ايىرىلعىسى كەلمەيتىن اياۋلى ادام بولادى. سوندىقتان دا تازابەكوۆ جاستارمەن كەزدەسكەن سايىن جاستىق كەزەڭدى وكىنبەستەي وتكىزۋ تۋرالى كوپ ناسيحات سوزدەر ايتىپ وتىرادى ەكەن.
