ەلوردا اۋەجايىندا اسكەري قىزمەتشىلەر توسىن سىي جاسادى - فوتو
ق ر قورعانىس مينيسترلىگى باسپا ءسوز قىزمەتىنىڭ حابارلاۋىنشا، اسكەري قىزمەتشىلەردىڭ ورىنداۋىنداعى بۇكىل الەمگە تانىمال جاڭا جىلدىق ءداستۇرلى Jingle Bells ءانى اۋەجايدا بولعان ادامداردى تاڭ قالدىرىپ، ەشكىمدى بەي- جاي قالدىرمادى.
«ءبىز اسكەري مۋزىكانتتار ءبىر جاققا ادەتتەگى رەيسپەن ۇشىپ بارا جاتىر دەپ ويلاپ، ولارعا نازار اۋدارمادىق. الايدا، سىمباتتى، جيناقى اسكەريلەردىڭ ورىنداۋىندا العاشقى اككوردتىڭ ءۇنى شىعا باستاعان كەزدە كوڭىلىمىز ءاپ- ساتتە كوتەرىلە باستادى. مەرەكەلىك جاڭا جىلدىق ەمەس، بۇرقاسىن جەلدى، بوراندى اۋا رايىنا قاراماستان، ناعىز سيقىرلى سەزىم پايدا بولدى. ماعان جانە نەمەرەمە قورعانىس مينيسترلىگىنىڭ بۇل توسىن سىيى وتە ۇنادى. ۇيرەنشىكتى جاعداي ەمەس، الايدا، تانىس اۋەزدى اۋەندەردى ەستىگەن كەزدە قۇلاق قۇرىشىڭ قانىپ، كوڭىلگە قۋانىش ۇيالايدى»، - دەپ استانا قالاسىنىڭ تۇرعىنى گالينا وماروۆا العان اسەرىمەن ءبولىستى.
جاڭا جىلدىق اننەن باسقا، اسكەري وركەستردىڭ مۋزىكانتتارى «مى، درۋزيا، پەرەلەتنىە پتيتسى» اتتى تانىمال اۋەندى ورىندادى. بۇل انگە تىڭداۋشىلار دۋ قول شاپالاقتاپ، قوشەمەتتەرىن كورسەتتى. اسىرەسە، ۇشىپ كەلگەن رەيستەردىڭ ۇشقىشتارى ءبىر مارقايىپ قالدى. اسكەري وركەستر مۋزىكانتتارىنىڭ ايتۋىنشا، قازاقستاندىق ارميا اسكەري قىزمەتشىلەرىنىڭ مۇنداي قۇتتىقتاۋلارى داستۇرگە اينالدى.
«جاڭا 2016 -جىل قارساڭىندا ءبىز ق ر قورعانىس مينيسترلىگى مەن ق ر قارۋلى كۇشتەرىنىڭ اسكەري قىزمەتشىلەرى اتىنان بارشا قازاقستاندىقتاردى تابالدىرىقتى اتتاعالى وتىرعان مەشىن جىلىمەن قۇتتىقتاپ، سىزدەرگە مىقتى دەنساۋلىق، باقىت، باق- بەرەكە جانە ەلىمىزگە تىنىشتىق تىلەيمىز»، - دەدى ق ر ق ك اسكەري- وركەسترلىك قىزمەتىنىڭ باستىعى مايور تيمۋر جارتىبايەۆ.
