يران ءالسىز بايىتىلعان ۋرانىن رەسەيگە جونەلتتى
«يراننىڭ ءالسىز بايىتىلعان ۋرانىن جويۋ تەگەراننىڭ وزىندە 300 كيلوگرامنان ارتىق ۋران ۇستاماۋ تۋرالى مىندەتتەمەسىن ورىنداۋداعى ماڭىزدى قادام سانالادى» دەدى كەرري.
ءالسىز بايىتىلعان ۋران ەلەكتر قۋاتىن وندىرۋگە ارنالعانىمەن، قوسىمشا بايىتا تۇسسە ونى يادرولىق قارۋ جاساۋعا پايدالانۋعا بولادى. ءالسىز بايىتىلعان ۋراندى جويۋ يراننىڭ الەمدىك دەرجاۆالارمەن جاساسقان كەلىسىمىندەگى باستى مىندەت سانالادى.
كەلىسىمدە بۇعان قوسا، يران ۋران بايىتۋدا قولدانىلاتىن سەنتريفۋگا سانىن كۇرت قىسقارتۋعا جانە پلۋتوني ءوندىرىسىن ازايتۋ ءۇشىن رەاكتورىن قايتا بەيىمدەۋگە مىندەتتەمەلەر العان.
يران بۇل مىندەتتەمەلەردى ورىنداسا، حالىقارالىق قاۋىمداستىق بۇل ەلگە سالىنعان سانكسيالاردىڭ تۇگەلگە جۋىعىن الىپ تاستايدى.
قازاقستان مەن رەسەي يراننان كەمەمەن كوپ مولشەردە تومەن بايىتىلعان ۋران جونەلتۋدە ۇلكەن رول اتقاردى، دەپ حابارلادى دۇيسەنبى كۇنى ا ق ش مەملەكەتتىك حاتشىسى دجون كەرري.
كەرري بۇعان دەيىن 11,3 توننا ۋران تيەلگەن كەمە يراننان رەسەيگە كەتكەنى جونىندە حابارلاعان بولاتىن، دەپ جازادى ر ي ا نوۆوستي.
«بۇل پروتسەستە كوپتەگەن ەلدەر ۇلكەن رول اتقاردى. رەسەي بىرلەسكەن ءىس- قيمىل جوسپارىنىڭ مۇشەسى جانە تاسىمالداۋ مەن يادرولىق ماتەريالداردىڭ قاۋىپسىزدىگىن قامتاماسىز ەتۋ ىسىندە تاجىريبەسى مول ەل رەتىندە يراننان ۋران جونەلتۋدە ماڭىزدى رول اتقاردى»، - دەدى كەرري.
ول سونداي- اق تابيعي ۋراندى جونەلتۋدە قازاقستاننىڭ دا ايتارلىقتاي ۇلەسى بار ەكەندىگىن اتاپ ءوتتى.
«مەن بۇگىن قازاقستاننىڭ سىرتقى ىستەر ءمينسترى ەرلان ىدىرىسوۆپەن سويلەستىم جانە ۋران جەتكىزىلىمىنە كۇش سالعانى ءۇشىن العىس ءبىلدىردىم. بۇل رەتتە ازەربايجان ەلىنىڭ دە ۇلەسى بار»، - دەدى كەرري.
