ەندى بانكتەر تەڭگە باعامىنداعى ايىرماشىلىقتان پايدا تاپپايدى

استانا. قازاقپارات - قازاقستاندىق بانكتەر تەڭگە باعامىنداعى ايىرماشىلىقتان پايدا تاپپايتىن بولدى.

كەشە ماجىلىستە وتكەن ۇكىمەت ساعاتىندا ۇلتتىق ەكونوميكا ءمينيسترى ەربولات دوسايەۆ دەپۋتاتتاردىڭ ساۋالىنا وسىلاي دەپ جاۋاپ بەردى. ال حالىق قالاۋلىلارى بولسا ۇلتتىق ۆاليۋتانىڭ تۇراقسىزدىعىنا الاڭداۋشىلىق ءبىلدىرىپ وتىر.

دەگەنمەن شەنەۋنىك قازىر نارىقتاعى جاعداي بارىنشا اشىق ەكەندىگىن جەتكىزدى. ءتىپتى، قارجى نارىعىن تۇراقتاندىرۋ ءۇشىن مينيسترلىك ۇلتتىق بانكپەن بىرلەسكەن ءىس- شارالار قابىلداماق. «ۇكىمەتتىڭ داعدارىسقا قارسى جوسپارىندا بۇل ماسەلەگە ايرىقشا ءمان بەرىلدى»، - دەدى ەربولات دوسايەۆ.

ەربولات دوسايەۆ، ق ر ۇلتتىق ەكونوميكا ءمينيسترى:

- قازىر ەكىنشى دەڭگەيلى بانكتەر تەڭگە باعامىنداعى ايىرماشىلىقتان قوسىمشا تابىس تابۋ مۇمكىندىگىن جوعالتىپ الدى. مەن اشىعىن ايتىپ وتىرمىن. سەبەبى، مۇنداي پايدا قازىر ولارعا ءتيىمسىز. ءارى ولار مۇنى جاقسى بىلەدى.

www.24.kz