قازاقستان فۋتبولدان ۇلتتىق قۇرامانىڭ باس باپكەرىن تاڭداۋ باستالدى

استانا. قازاقپارات - بۇگىن قازاقستان فۋتبول فەدەراتسياسى(ق ف ف) ءوزىنىڭ رەسمي سايتىندا قازاقستان قۇراماسىنىڭ باس باپكەرىن تاڭداۋعا مۇمكىندىك بەرەتىن داۋىس بەرۋدى باستايدى، دەپ حابارلادى فەدەراتسيانىڭ باسپا ءسوز قىزمەتى.

 15 -قاڭتارعا دەيىن سوزىلاتىن العاشقى كەزەڭدە سىزدەر قازاقستان قۇراماسىن كىم جاتتىقتىرۋ كەرەك دەگەن سۇراققا جاۋاپ بەرىپ، جەرگىلىكتى مامان، بولماسا شەت ەلدىك مامان پايداسىنا تاڭداۋ جاسايسىز. داۋىس بەرۋگە تەك ق ف ف سايتىندا تىركەۋدەن وتكەندەر عانا قاتىسا الادى.

سايتقا تىركەلۋ وڭاي ءارى ىڭعايلى، بىرنەشە مينۋت ۋاقىتىڭىزدى الادى.

داۋىس بەرۋ ناتيجەسى فەدەراتسيا تاراپىنان شەشىم قابىلداۋعا نەگىز بولۋ ءۇشىن، داۋىس بەرۋگە 50 مىڭنان كەم بولمايتىن ادام قاتىسۋى كەرەك.

ەگەر داۋىس بەرۋشىلەر سانى 50 مىڭنان كەم بولاتىن بولسا، فەدەراتسيا داۋىس بەرۋ ناتيجەلەرىن قازاقستان ۇلتتىق قۇراماسىنىڭ باس باپكەرىن ءوزى تاڭداۋعا بەرىلگەن كەلىسىم دەپ ەسەپتەيدى.

ال داۋىس بەرۋشىلەر سانى 50 مىڭنان اساتىن بولسا، ق ف ف داۋىس بەرۋدىڭ ەكىنشى كەزەڭىن باستايدى. ەكىنشى كەزەڭدە جانكۇيەرلەرگە ءبىرىنىشى كەزەڭدە كوپ داۋىس جيناعان سانات بويىنشا باپكەرلەر ءتىزىمى ۇسىنىلادى (قازاقستاندىق بولماسا شەت ەلدىك مامان). ق ف ف ۇسىناتىن باپكەرلەردىڭ بارلىعى دا قازاقستان ۇلتتىق قۇراماسىن جاتتىقتىرۋعا ءبىلىمى جەتەتىن، تاجىريبەسى مول بىلىكتى ماماندار.

ءبىز ۇسىنعان مامانداردىڭ بارلىعى دەرلىك الدىن الا، بىلىكتىلىك تەكسەرۋدەن وتەدى (بۇل جۇمىس باستالىپ كەتتى) جانە ق ف ف جانكۇيەرلەرى كىمدى تاڭداعانىنا قاراماستان ۇلتتىق قۇرامانىڭ بولاشاق باپكەرىنىڭ قىزمەتى ءۇشىن جاۋاپكەرشىلىكتەن باس تارتپايدى.