استانا اۋەجايى ورتالىق ازياداعى العاشقى «جاسىل اۋەجاي» بولماق
بۇل تۋرالى "Airport Management Group" كومپانياسىنىڭ باسپا ءسوز قىزمەتى حابارلادى.
«Global Pro» كومپانياسىنىڭ ينۆەستيتسيا سالۋ تۋرالى نيەتى سىرتقى ىستەر ءمينيسترىنىڭ ءبىرىنشى ورىنباسارى، «استانا ەكسپو-2017» كوميسسارى ءراپىل جوشىبايەۆتىڭ 2015 -جىلى قىركۇيەك ايىندا ارگەنتينا مەملەكەتىنە ءىسساپارى كەزىندە بەلگىلى بولدى. ينۆەستيتسيانىڭ جالپى قۇنى 10 ميلليون دوللاردى قۇرايدى.
جوبانىڭ نەگىزگى ماقساتى - اۋەجايدىڭ قالدىقتارىن وڭدەيتىن كەشەندى زاۋىت سالۋ. زاۋىت ءقاۋىپتى قالدىقتاردى ترانسشەكارالىق تاسىمالداۋدى بارىنشا ازايتۋعا مۇمكىندىك بەرەدى. سونىمەن قاتار، الەۋمەتتىك اسەر بەرەتىن جاڭا ەكولوگيالىق ورنىقتى، ەكونوميكاسى تابىستى بيزنەس بىرلىگىن قالىپتاستىرۋعا جانە اۋەجايدا زووتەحنيكالىق- فيتوسانيتاريالىق توسقاۋىل ورناتۋعا جاعداي تۋعىزادى.
اۋەجاي تەرمينالىنداعى بارلىق قالدىقتاردىڭ قايتا وڭدەلۋى ناتيجەسىندە ەكو اۋەجايى قالىپتاسىپ، 1 مەگاۆايتكە تەڭ ەلەكتر قۋاتىن الۋعا مۇمكىنشىلىك پايدا بولادى. جوبا جۇزەگە اسقان جاعدايدا، قالدىقتاردى ءوندىرۋ ارقىلى ەلەكتر قۋاتىن شىعارۋ تەحنولوگياسىنىڭ مودەلى قالىپتاسادى.
«Airport Management Group» كومپانياسىنىڭ باسقارما باسشىسى كلود باداننىڭ ايتۋىنشا، اتالمىش زاۋىت قۇرىلىسى استانا اۋەجايىنا جاڭا تەحنولوگيالار مەن «جاسىل اۋەجاي» يدەياسىن ىسكە اسىراتىن قازاقستاندا، سونداي- اق ورتالىق ازيادا تەڭدەسى جوق بىرەگەي جوباعا اينالۋى مۇمكىن.
ارگەنتينا «Global Pro» كومپانياسىنىڭ وكىلدەرى ءوز كەزەگىندە، 2017 -جىلى 10 -ماۋسىم 10 -قىركۇيەكتە استانا قالاسىندا وتەتىن «ەكسپو-2017» كورمەسىنە «جاسىل تەحنولوگيا» بويىنشا وزدەرىنىڭ سوڭعى جوبالارىن كورسەتەتىندىگىن مالىمدەدى.
