جاڭا جىلدا قاي ەلدە قانداي دۇنيە سىيلاۋعا بولمايدى؟

استانا. قازاقپارات - سىيلىق اتاۋلىعا ءار حالىق كوزقاراسى ءارتۇرلى ەكەنى بەلگىلى. قانداي دا ءبىر شەتەلدە ءجۇرىپ ول ەلدىڭ سالت- ساناسىنا جات سىيلىق تاڭداپ قاتەلىككە بوي الدىرۋىڭىز مۇمكىن. بۇگىن ءبىز سىيلىقتىڭ ءارتۇرلى حالىققا قاتىستى ەرەكشەلىكتەرىن ءسوز ەتپەكپىز.

 ەۋروپا

 ەۋروپا ەلدەرىندە ءبىرقاتار سىيلىقتى سىيلاۋعا «تىيىم سالىنعان» . ماسەلەن، فرانسيادا تۇرمىسقا شىقپاعان ارۋعا پارفيۋم سىيلاۋعا بولمايدى، مۇنداي سىيلىقتى تەك جولداسى عانا سىيلاي الادى. گەرمانيادا كانسەليار ونىمدەرىن، اسىرەسە، كۇندەلىك ءتارىزدى ماڭىزدى نارسەلەردى سىيلاۋعا بولمايدى، مۇنداي سىيلىقتاردى نەمىس حالقى مۇقيات بولماۋ، ۇقىپسىزدىق بەلگىسى رەتىندە تانيدى. ەۋروپادا فەمينيستىك قوزعالىس وكىلدەرى ءۇشىن اس ءۇي جابدىقتارى مەن تەحنيكالارىن سىيلاۋ «اسا جاقسى» ەمەس.

 سول ءتارىزدى گۇل سىيلاۋعا كەلگەندە دە سىنشى بولۋعا تۋرا كەلەدى. ماسەلەن، فرانسۋز مادامدارىنا حريزانتەما مەن قالامپىر گۇلدەرىن سىيلاۋعا بولمايدى، ال قىزىل راۋشاندى سىيلاۋ شەكتەن شىققان قۇمارلىقتى بىلدىرەدى.

ا ق ش

 ا ق ش- تا كەيىنگى كەزدە مىناداي ءۇردىس ورىن العان: تارتۋ ەتىلگەن سىيلىقتى چەگىمەن بەرەتىن بولعان، ەگەر سىيلىق «قاھارمانىنا» ۇناماسا، ول اۋىستىرىپ نەمەسە وتكىزىپ تاستاي الادى.  قىزىعى سول، جاڭا جىل مەيرامىنان كەيىن دۇكەندەردىڭ الدىندا سىيلىقتى اۋىستىرۋ ءۇشىن ۇزىن- سونار كەزەك بولادى ەكەن. سوندىقتان امەريكالىقتار ءۇشىن چەكسىز بەرىلگەن سىيلىق ناعىز ورىنسىز «توسىن سىي» بولاتىنى انىق.

 مۇسىلمان ەلدەرى

 مۇسىلمان ەلدەرىندە الكوگول، وزگە دە سپيرت تەكتەس ونىمدەردى سىيعا تارتۋعا بولمايدى. سول ءتارىزدى شوشقا دا يسلامدا حارام رەتىندە سانالاتىندىقتان شوشقانىڭ ەتى مەن تەرىسىنەن جاسالعان كەز كەلگەن ونىمدەردى سىيلاۋعا بولمايدى. ادام قولىمەن سالىنعان سۋرەتتەردى، كارتينكالاردى دا بەرۋگە بولمايدى. سىيلىقتى وڭ قولمەن بەرۋ قاجەت، بەرەكە سانالادى. سىيلىق وتاعاسىنا عانا سىيلانادى.

 قىتاي

 قىتاي حالقى سىيلىق العاندى جاقسى كورەدى. ءبىراق مۇندا دا شەكتەۋلەر بار. ماسەلەن، ەركەك ادامعا قارۋ- جاراق ءتارىزدى كادەسىيلاردى (قانجار، پىشاق، پيستولەت) سىيلاۋعا بولمايدى، بۇل دوستىقتى بۇزادى دەپ سانالادى. ايەل ادامعا سارى جانە اق ءتۇستى گۇلدەردى سىيلاۋعا بولمايدى، بۇل قايعى- قاسىرەتتىڭ بەلگىسى تانىلادى. ءتىپتى، اق قاعازدان جاسالعان جاڭا جىلدىق ويىنشىقتار دا قىتاي حالقىنىڭ اشۋىن تۋدىرادى. ويتكەنى اق ءتۇس حريزانتەما گۇلىنىڭ بەلگىسى، ال حريزانتەما گۇلى ءولىمنىڭ بەلگىسى سانالادى.

 جاپونيا

 جاپونيادا دا سىيلىق سىيلاۋ جوعارى ادەپتى قاجەت ەتەدى. سىيلىقتى ەش سەبەپسىز بەرۋگە بولمايدى. قانداي دا ءبىر ءمان بولۋى ءتيىس. جاڭا جىل مەيرامى جاپوندىقتار ءۇشىن اسا ماڭىزدى مەرەكە بولماعاندىقتان، قىمبات سىيلىق بەرۋدىڭ قاجەتى جوق. بالالارعا كونفەت پەن ويىنشىق سىيلاۋ داستۇرگە اينالعان. الايدا ەشقاشان ءتورت نە توعىز زات سىيلاۋعا بولمايدى: « ءتورت» ءسوزىنىڭ دىبىستالۋى «ءولىم» ءسوزىنىڭ دىبىستالۋىنا بايلانىستى، ال «توعىز» ءسوزى «اۋرۋ» سوزىنە جاقىن بولعاندىقتان جاپوندىقتاردىڭ قورقىنىشىن تۋعىزادى. سىيلىقتى ەكى قولداپ، ءيىلىپ سىيلاۋ قاجەت.

 كورەيا

 قىزىل ءتۇس كورەيادا قانمەن، ولىممەن بايلانىستى بولعاندىقتان قىزىل تۇسكە ورالعان سىيلىقتى سىيلاۋشى بولماڭىز. عاشىقتار ءبىر- بىرىنە اياق كيىم سىيلاۋعا بولمايدى، عاشىقتاردىڭ اراسى سۋىپ كەتەدى دەپ جورامالدانادى.

  افريكا

 افريكانىڭ كوپتەگەن حالىقتارى تەك جەرلەۋ سالتاناتىندا عانا قولداناتىندىقتان گۇلدى سىيلىق رەتىندە بەرۋ جاقسىلىقتىڭ بەلگىسى ەمەس. فوتواپپاراتتى دا سىيلاۋعا بولمايدى: افريكا حالىقتارىندا كوبى فوتواپپاراتقا ءتۇسىرۋ ادام جانىن الۋمەن تەڭ.

massaget.kz