قىتايلىق ميللياردەر ما يۋننىڭ ۇلىنا جازعان حاتى - سۋرەت

استانا. قازاقپارات - بۇل كىسىنىڭ ازان شاقىرىلىپ قويىلعان(...) قىتايشا اتى ما يۋن.

جەك ما دەگەن اتپەن الەمگە تانىلعان قىتايداعى ەڭ باي ادام، Alibaba دەپ اتالاتىن ينتەرنەتتە توۆار ساتۋعا ارنالعان ەڭ ءىرى پورتالدىڭ نەگىزىن قالاۋشى.

سول كىسىنىڭ ۇلىنا جازعان حاتى قازىر بۇكىل قىتايعا تىپتەن بۇكىل الەمگە تەز تاراپ كەتتى، سونى اۋدارىپ ۇسىنىپ وتىرمىن.

ساعان بۇل حاتتى جازۋىما 3 نارسە سەبەپ بولدى؛

تاعدىردى بولجاپ بولمايدى، ەشكىم دە ءوزىنىڭ قانشا ءومىر سۇرەتىنىن بىلمەيدى، سوندىقتان كەي نارسەلەردى ەرتەرەك ايتقان دۇرىس.

مەن سەنىڭ اكەڭمىن، مۇنداي اقىل كەڭەستى ساعان مەن ايتپاعاندا كىم ايتادى.

ساعان ايتاتىندارىمنىڭ بارلىعى مەنىڭ ءومىر جولىمدا كەزدەسكەن كەدەرگىلەردەن العان ساباقتارىم، سوندىقتان وسى ساتسىزدىكتەرىمدى قايتالاماۋىڭ ءۇشىن پايداسى بولار دەپ سانادىم.

1) سەنى جاقتىرماعان، ساعان ناشار كوزقاراسپەن قاراعان ادامدارعا ەشقاشان رەنجىمە، ويتكەنى شەشەڭ ەكەۋىمىزدەن باسقا ەشكىم دە ساعان بورىشتار ەمەس. ەگەر دە بىرەۋ ساعان قامقورلىق تانىتار بولسا ونى قادىرلەي ءبىل.

2) ومىرىڭدە كەزدەسكەن كەز كەلگەن ادامدى نەمەسە باعالى زاتتى، باسقا ەشكىم، ەشنارسە ونىڭ ورنىن باسا المايدى دەپ قاراما، وسى كوزقاراستا مىقتى بولساڭ بولاشاقتا اسىلىڭنان ايىرىلىپ قالساڭ دا سابىرلى بولا الاسىڭ.

3) ءومىر وتە قىسقا، ءدال قازىر ۋاقىتىڭدى بوسقا وتكىزىپ جۇرگەنىڭدى ءدام-تۇزىڭ تاۋسىلا باستاعاندا بىلەسىڭ، ءومىردى قانشالىقتى ەرتەرەك قاستەرلەي باستاساڭ ومىردەن الاتىن ءلاززاتىڭ دا سونشالىق كوپ بولادى. ۇزاق ءومىر ءسۇرۋدى ارمانداعاننان گورى ۋاقىتتى ۇنەمدەي بىلگەن دۇرىس.

4) ماحاببات دەگەن ءبىر ءتۇرلى سەزىم عانا، بۇل سەزىم ۋاقىتتىڭ وتۋىمەن، جاساعان ورتاڭنىڭ اۋىسۋىمەن بىرگە وزگەرىپ وتىرادى. ەگەر كۇندەردىڭ بىرىندە سۇيگەنىڭنەن ايىرىلىپ قالساڭ سابىرلىلىقپەن كۇت، ۋاقىتتىڭ ءوزى بارلىعىن ۇمىتتىرادى، كوڭىلىڭ دە ساباسىنا تۇسەدى. ماحابباتتان بال جۇتام دەپ ولەرمەندەنە بەرىلىپ تە كەتپە، ماحابباتتان كەلەتىن قايعىدان قابىرعاڭ قايىسىپ شوگىپ تە كەتپە.

5) كوپتەگەن تابىسقا جەتكەن كاسىپكەرلەردىڭ ءبىلىمى ورتاشا بولعان، ءبىراق بۇل قۇلشىنا ۇيرەنبەگەن ادام دا تابىسقا جەتە الادى دەگەندىك ەمەس. ەسىڭدە بولسىن ءبىلىمىڭ ەشكىم سەننەن تارتىپ الا المايتىن ەڭ مىقتى قارۋىڭ. ادام ءبىلىمسىز دە كاسىپ جاراتا الادى، ءبىراق ءبىلىمسىز ءبارىبىر دە ونى دامىتا المايدى.

6) قالعان ومىرىمدە مەن ساعان مەنى باق دەپ تالاپ قويمايمىن، ءدال سول سياقتى سەن كامەلەتتىك جاسقا جەتكەن سوڭ مەنىڭ دە جاۋاپكەرشىلىگىم اياقتالادى. ءومىر بويى قوعامدىق كولىكپەن جۇرەسىڭ بە الدە مەرسەدەس مىنەسىڭ بە، قارا كوجە ىشەسىڭ بە الدە ماي شاينايسىڭ با، ول ءوز قولىڭدا.

7) ءوزىڭ ۋادەگە بەرىك بول، ءبىراق باسقالارعا بۇل تالاپتى قويا المايسىڭ. باسقالارعا ۇنەمى ىلتيپاتپەن قارا، ءبىراق باسقالارعا دا وزىڭە جاقسى كوزبەن قارا دەپ تالاپ قويا المايسىڭ. سەن ولارعا قالاي قاراساڭ ولار دا ساعان سولاي قاراي بەرمەيدى. ەگەر وسى اقيقاتتى جەتە تۇسىنە الماساڭ ومىردە باسى ارتىق كەلەڭسىزدىكتەرگە ۇشىراي بەرەسىڭ.

8) مەن 26  جىل بويى لوتەرەيا بيلەتىن ساتىپ الىپ كەلەمىن، ءالى ءبىر دە ءبىر رەت ۇتقان جوقپىن، ءتىپتى 3 دارەجەلى ۇتىسقا دا جەتكەم جوق. بۇل دەگەنىمىز ادام تابىسقا جەتۋ ءۇشىن قۇلشىنا ۇيرەنىپ، تىنباي ەڭبەك ەتۋ كەرەكتىگىنىڭ دالەلى، مىنا الەمدە اقى المايتىن اسحانا جوق.

9) ءومىر ءبىر اق رەت بەرىلەدى، سوندىقتان دا ەت جاقىن تۋىسقاندارىڭدى، جاناشىر جاقىندارىڭدى قادىرلەي ءبىل، ەكەۋىمىز دە ماڭگى بىرگە بولا المايمىز، قارا كوز جۇمىلعان سوڭ ەشقاشان قاۋىشا المايمىز.

بۇل حاتتى وقىپ بىتكەن كەزدە سەندە ەكى تاڭداۋ بولادى؛

ءبىرىنشىسى، سەن مۇنى ودان ارى دامىتىپ، وزىڭە ماڭگى ازىق بولاتىن رۋحاني كومەكشى ەتىپ ساقتايسىڭ.

ەكىنشىسى، ەشتەڭە وقىماعان كورمەگەندەي بولىپ بۇرىنعى ءومىرىڭدى جالعاستىراسىڭ.

قىتايشادان اۋدارعان: سەرجان قاسەن