حوككەي: استانانىڭ «بارىسى» وۆەرتايمدا «سيەۆەرستال» كومانداسىن ۇتتى - فوتو
ماتچتىڭ 4-مينۋتىندا قوناقتار قاقپاسى ماڭىندا ابجىلدىك تانىتىپ، شايبانى يەلەنگەن ماكسيم حۋدياكوۆ ماكسيم سەمەنوۆكە ءدال پاس بەردى. م. سەمەنوۆتىڭ الىستان سوققان شايباسىن «سيەۆەرستالدىڭ» قاقپاشىسى كورمەي قالدى ما، ايتەۋىر وتكىزىپ الدى. سودان كەيىن 15-مينۋتتا ايدىن يەلەرى قوناقتاردىڭ ەكى بىردەي ويىنشىسىنىڭ ايىپ ۋاقىتىن وتەۋىن ءتيىمدى پايدالانىپ، برەندون بوچەنسكي ەسەپتى 2:0 گە جەتكىزدى. ەكىنشى كەزەڭدە ۆاديم كراسنوسلوبودتسيەۆتىڭ ادەمى پاسىنان كەيىن كونستانتين پۋشكاريەۆ 34-مينۋتتا مەرگەندىك تانىتتى. ال بەس مينۋتتاي ۋاقىت وتكەننەن كەيىن «بارىستىڭ» ءبىر ويىنشىسى 2 مينۋت ايىپ ۋاقىتىن وتەپ بولماي جاتىپ، قوناقتاردان دميتري كاگارليتسكي كوزگە ءتۇستى.
شەشۋشى، ءۇشىنشى كەزەڭدە «بارىسقا» قاراعاندا، ءجيى شابۋىلداپ، الدەقايدا شيراق ويناعان «سيەۆەرستال» ءبىر ويىنشىسىنىڭ ارتىقتىعىن پايدالانىپ، (دانييل ۆوۆچەنكو) 48-مينۋتتا ەسەپتى 3:2 گە دەيىن قىسقارتتى. سودان كەيىن ۆاديم كراسنوسلوبودتسيەۆ تارتىپسىزدىك جاساپ، ايدىننان قۋىلعان ساتتە «بارىستىڭ» قاقپاشىسى يان لاتسو جاراقات الىپ، ورنىنا پاۆەل پولۋەكتوۆ شىقتى. وسى قاربالاس ساتتە «سيەۆەرستال» تاعى ابجىلدىك تانىتىپ، اناتوليي نيكونتسيەۆ تارازى باسىن تەڭەستىرىپ كەتتى. ءسويتىپ ماتچ بارىسىندا استانالىقتار 3:0 ەسەبىمەن العا شىققانىمەن، باسىمدىلىقتارىن ساقتاي الماي، نەگىزگى ۋاقىت 3:3 ەسەبىمەن تەڭ اياقتالدى.
وۆەرتايم باستالىسىمەن-اق برەندون بوچەنسكي مەرگەندىك كورسەتىپ، كومانداسىنا جەڭىس سىيلادى.
قازىرگى كەزدە 61 ۇپايمەن شىعىس كونفەرەنسياسىندا بۇرىنعىسىنشا توعىزىنشى ورىندا كەلە جاتقان «بارىسقا» ءاربىر ۇپاي اۋاداي قاجەت. ويتكەنى پلەي-وفف باسەكەلەرىنە قاتىسۋ ءۇشىن العاشقى سەگىزدىككە قالايدا ىلىگۋ كەرەك.
استانالىقتار بيىلعى جىلداعى سوڭعى ويىنىن 29- جەلتوقساندا تۋرنير كەستەسىندە كوش باستاپ كەلە جاتقان ماسكەۋدىڭ تسسكا كومانداسىمەن وتكىزەدى.
اۆتور: ەلجان ەرالى
