اقتاۋ تەڭىز پورتى اۆتو كولىكتەردى وتكىزۋ جونىندە جەدەل شارالاردى قولعا الۋدا

استانا. قازاقپارات - اقتاۋ پورتىندا ۇلكەن جۇكتى تەحنيكانىڭ كوپتەپ جينالىپ قالۋى جاعدايىندا جۇكتەردى تيەۋدى قامتاماسىز ەتۋ ءۇشىن جەدەل شارالار قولعا الىنۋدا. اۆتوموبيلدەردىڭ باسىم بولىگى پاروم تەرمينالىنا تۇركيادان كەلەدى جانە قازاقستان مەن ورتا ازيانىڭ ءارتۇرلى ايماقتارىنا باعىت تۇزەيدى،

 دەپ حابارلادى «ق ت ج» ۇك» ا ق باسپا ءسوز قىزمەتى. پورت تولىق قۋاتىندا جۇمىس ىستەۋدە، وعان بارلىق تەحنيكالىق جانە لوگيستيكالىق مۇمكىندىكتەر جۇمىلدىرىلعان.

«بۇگىنگى كۇنى مەملەكەتتىك شەكارا ارقىلى وتكىزەتىن پۋنكت بولعاندىقتان ءبىزدىڭ پورت كەدەندىك جانە شەكارالىق قىزمەتتەرمەن، تەڭىز اكىمشىلىگىمەن، تۇرىك رەسپۋبليكاسىنىڭ كونسۋلدىعىمەن، باكۋ پورتىنىڭ باسشىلىعىمەن جانە تاسىمالداۋشىمەن بىرلەسە وتىرىپ، تۇرىك جۇكتەرىنىڭ جىلجۋىن جانە قۇجاتتاردى راسىمدەۋدى شاپشاڭداتۋ ماسەلەلەرىن پىسىقتاۋدا. ۇلكەن جۇكتى اۆتوكولىكتەردى تاسىمالداۋ ازەربايجان تەڭىز پاروحودتتىعىنىڭ پاروم كەمەلەرىمەن جۇزەگە اسىرىلۋدا، ولاردىڭ سىيىمدىلىعى 33-35  جۇك ماشينالارى»، - دەپ ءتۇسىندىردى اقتاۋ پورتىنىڭ باسشىسى ميحايل يالباچيەۆ.

اقتاۋ تەڭىز پورتىندا  باكۋ پورتىمەن سالىستىرعاندا ءبىر عانا پاروم ايلاعى بار، ال ولاردا مۇنداي ايلاقتار ەكەۋ، سوندىقتاندا دا تيەۋ- ءتۇسىرۋ جۇمىستارىنداعى جانە قۇجاتتاردى راسىمدەۋدەگى ىركىلىستەردى ازايتۋ ءۇشىن قولدان كەلگەننىڭ ءبارى جاسالۋدا.

«اقتاۋ پورتى اۋدانىندا دەمالۋعا جانە تاماقتانۋعا بارلىق جاعدايلار جاسالعان. الايدا، ۇلكەن جۇكتى ماشينالاردىڭ جۇرگىزۋشىلەرى قاراجاتتارىن ۇنەمدەۋ ماقساتىندا وزدەرىنىڭ اۆتوموبيلدەرىندە تۇنەپ، سوندا تاماقتانادى، بۇل پورتتىڭ كىرەبەرىسىندە تەحنيكانىڭ قوردالانىپ قالۋىنا اكەپ سوعادى، ءسويتىپ، اۆتوكولىكتەر كوبەيىپ كەتكەن جاعدايدا تۇراقتار ءۇشىن بوس الاڭ جەتىسپەي قالادى. ءقازىر ءبىز جاعدايدى تۇراقتاندىرۋ جانە ۇلكەن جۇكتى اۆتوكولىكتەردى پاروم ارقىلى وتكىزۋدى ۇيىمداستىرۋ ءۇشىن نەعۇرلىم جايلى جاعدايدى قامتاماسىز ەتۋ شارالارىن الىپ جاتىرمىز»، - دەپ اتاپ ءوتتى م. يالباچيەۆ.

اعىمداعى جەلتوقساننىڭ باسىنان بەرى اقتاۋ پورتى كەمەلەردىڭ پورتقا كىرۋىنە كەدەرگى جاسايتىن گيدرومەتەورولوگيالىق جاعدايلاردى ەسەپكە الا وتىرىپ، 15 پارومدى وڭدەدى، بۇل جاقسى كورسەتكىش. پارومدا بوس تۇرىپ قالاتىن ەڭ كوپ ۋاقىت 61 ساعاتتى قۇرايدى.

ءتورتىنشى توقساندا 428 بىرلىك جۇك اۆتوكولىگى وڭدەلدى، ال مۇنىڭ الدىندا اعىمداعى جىلدىڭ توعىز ايىندا 355 بىرلىك اۆتوكولىك وڭدەلگەن بولاتىن.

قالىپتاسقان جاعدايدى ەسكەرە وتىرىپ، اقتاۋ پورتى ايىنا 1000-عا دەيىن ۇلكەن جۇكتى كولىكتەردى وتكىزۋدى جۇزەگە اسىرماق.